Siyintoni Isicombululo?

“KUKHO inkolelo yokuba intlalo-ntle yoluntu, yaye mhlawumbi kwanokusinda kwethu ngabanye, kuya kuxhomekeka ekwazini kwethu ukubona izifo ezivelayo. . . . Ngesiphi namhlanje ukuba iHIV ibiyintsholongwane ehamba nomoya? Yaye sisiphi isiqinisekiso esinaso sokuba asinakwasulelwa ngale ndlela kwixesha elizayo?” watsho uD. A. Henderson—owaba nendima ephambili ekuphelisweni kwengqakaqha—kwiqela lezazinzulu eGeneva, eSwitzerland, ngowe-1993.

Zinokubonwa njani izifo ezivelayo? Inkqubo yokulumkisa kusengaphambili ngoobhubhani bezifo zakweleenjiko igqibe iilebhu ezingama-35 ezisehlabathini lonke ezo zachazwa kwiWorld Health Organization (WHO). Sekunjalo, uhlolisiso lwezi lebhu lwabonisa ukuba ezingaphantsi kwesiqingatha kuzo zazinezixhobo zokubona iencephalitis yaseJapan, ihantaviruses nomkhuhlane waseRift Valley—zonke izifo ezibulalayo. Zingama-56 ekhulwini kuphela ezinokubona ulubhelushe, intsholongwane ethwalwa ziingcongconi ebangela ukuhlanza, ukusilela kwesibindi nokophela ngaphakathi. Ngowe-1992 ubuncinane bangama-28 abantu abafayo eKenya bebulawa ngulubhelushe ngaphambi kokuba oogqirha bafumanise unobangela. Kangangeenyanga ezintandathu babecinga ukuba balwa nesifo seengcongconi.

Obunye ubuthathaka beenkqubo eziphandayo kukuba azikuqondi ukuvela kwentsholongwane ebulala ngokuthe ngcembe. Ngokomzekelo, iHIV inokuzifihla ngaphakathi emntwini, isasazeke kwabanye, yandule izibonakalise njengoGawulayo kwiminyaka engaphezu kweshumi kamva. Ubhubhani okhoyo onguGawulayo wavela phantse ngaxeshanye kumazwekazi amathathu waza ngokukhawuleza wahlasela amazwe angama-20 awahlukeneyo. Ngokucacileyo, asikho isilumkiso esenziwa ngaphambi koko!

Phezu kwazo nje iingxaki, izazinzulu ezininzi zisajonge kwikamva ngethemba, zizingomb’ izifuba ngezinto ezinkulu ezifunyenweyo nenkqubela eya kubakho kwiminyaka ezayo. I-International Herald Tribune inikela le ngxelo: “Awona mathemba asemagqabini ngenkqubela yokwenyaniso, izazinzulu ezininzi zithi, zizinto zobugcisa ezinxulumene nebhayoloji, ukusetyenziswa kwemizila yemfuza kwiiseli eziphilayo. Izazinzulu zemizi-mveliso yezinto zobugcisa ezinxulumene nebhayoloji zinethemba lokuvelisa iiseli ezikhupha ulwelo olubulala iintsholongwane, oko kukuthi, uhlobo olutsha lwamayeza okubulala iintsholongwane asebenzisana nemizila yemfuza.”

Noko ke, kukho izinto ezingalunganga koku. Imizila yemfuza ebangela iintsholongwane yenze kwaba nokufakwa imizila yemfuza kwintsholongwane engenabungozi ukuze le ntsholongwane ikwazi ukudlulisela le mizila yemfuza ebantwini. Obu bugcisa bunokusetyenziswa ngokunengenelo, mhlawumbi enyanisweni benze kube nokuveliswa oko kubizwa ngokuba ngamayeza okubulala iintsholongwane abangelwa yimizila yemfuza. Kodwa obu bugcisa busenokusetyenziswa ngeenjongo ezingalunganga.

Ngokomzekelo, imizila yemfuza enokubakho esuka kwiEbola inokufakwa ngempazamo okanye ngabom kwintsholongwane, ebangela umkhuhlane okanye imasisi. Ngoko laa ntsholongwane ibulalayo isenokusasazwa ngokukhohlela okanye ngokuthimla. UGqr. Karl Johnson, oye wachitha ubomi bakhe ephanda ngeentsholongwane ezinjengeMachupo neEbola, wathi ixesha lisenokufika ngokukhawuleza xa “ubani ongaqiqiyo onezixhobo ezixabisa iidola ezimbalwa nonemfundo yebhayoloji yakwanokholeji eya kuvelisa intsholongwane eyakwenza iEbola ingabi namandla.” Ezinye izazinzulu ngebhayoloji zinenkxalabo efana neyakhe.

Isicombululo

Ukucombulula iingxaki zezifo ezasulelayo asingomcimbi nje wokuvelisa amayeza amatsha. Kubandakanya ukucombulula iingxaki ezinxulumene nezifo ezibangelwa yindlala, yimfazwe, ziimbacu, kukusetyenziswa kakubi kweziyobisi, kukuxinana kwezixeko, ziindlela zokuphila ezingatshongo khona, ungcoliso nokutshatyalaliswa kwemeko-bume. Nyaniseka kwisiqu sakho. Ngaba ucinga ukuba abantu kungenzeka bazicombulule ezi ngxaki zintsonkothileyo?

ILizwi likaThixo liyalumkisa: “Musani ukukholosa ngamanene, ngonyana womntu yena ungenalo usindiso.” Ngoko ke, sifanele sikholose ngabani? Esi sibhalo sihlabela mgama: “Hayi, uyolo lwalowo uluncedo lunguThixo kaYakobi, lwalowo ulinde kuYehova uThixo wakhe, kuMenzi wezulu nomhlaba.” NguYehova kuphela, uMdali woluntu, onokucombulula iingxaki olujamelene nazo uluntu.—INdumiso 146:3-6.

ILizwi likaYehova eliphefumlelweyo, iBhayibhile, kwingxelo yesiprofeto esikhulu sikaYesu ngokuphathelele ‘umqondiso wokuqosheliswa kwenkqubo yezinto,’ lachaza kusengaphambili iingxaki zonyango ezithwaxa esi sizukulwana sethu. UYesu wathi: “Kuya kubakho neendyikityha zokufa kwiindawo ngeendawo.”—Mateyu 24:3-8; Luka 21:10, 11.

Noko ke, iBhayibhile ikwalatha kwixesha elizayo kwikamva emhlabeni phantsi kolawulo loBukumkani bukaThixo xa ‘engayi kuthi ummi wakhona ndiyafa.’ (Isaya 33:24; Mateyu 6:9, 10) Ngaloo ndlela abo bakholosa ngoYehova banesizathu esinzulu sokukholelwa ukuba uluntu oluthobekileyo kungekudala luya kukhululeka ngokupheleleyo kungekuphela nje kwizifo ezibulalayo ezithwaxa uluntu kodwa kwanakwiingxaki ezifak’ isandla kwizifo. AmaKristu okwenyaniso ayayixabisa imigudu yabezonyango kwidabi elinzima nxamnye neentsholongwane ezibulalayo. Sekunjalo, ayazi ukuba isicombululo esihlala sihleli kwizifo nasekufeni sikuThixo, lowo “ophilisa zonke izifo zakho.”—INdumiso 103:1-3; ISityhilelo 21:1-5; 22:1, 2.

[Umfanekiso okwiphepha 28]

IBhayibhile ithembisa ixesha apho kungayi kubakho bani oya kuthi, “ndiyafa”