Izidalwa Ezisengozini Yokuphela—Indlela Obandakanyeke Ngayo
IZINGWE, iimfudo zaselwandle, umkhombe, amabhabhathane—ewe, uludwe lwezidalwa ezisecicini lokuphela lubonakala lungapheli! Ngaphandle kwamathandabuzo uya kuvuma ukuba umntu ubekek’ ityala. Kodwa kukuchaphazela njani oku?
Ngenxa yemeko yehlabathi yezoqoqosho, ngaba kusengqiqweni ukulindela abantu abaxhalabele intlalo-ntle yabo ukuba baxhase iinkqubo zokulondolozwa kwezilwanyana, enoba ezo nkqubo zibiza imali eninzi kangakanani na? ITime ithi: “Ngokuqinisekileyo akukho lula ukuzikhathaza ngokuxhasa ukulondolozwa kwendalo kwinkoliso yeendawo ezikumazantsi eSahara eAfrika, apho izigidi zabantu zijamelene neziphendu zezobupolitika, iimfazwe zobuhlanga, indlala nesifo esingubhubhani.” Kwenzeka okufanayo nakwezinye iindawo.
Kufuneka kwenziwe iinguqulelo ezinkulu ukuze kuconjululwe ingxaki yezidalwa ezisengozini yokuphela. Ngokutsho kweThe Atlas of Endangered Species, “ezi nguqulelo zinkulu kangangokuba zinokwenziwa ngoorhulumente kuphela.” Kwakhona incomela ukuba: “Kwiindawo oorhulumente abanyulwayo kuzo, kuyimbopheleleko yomntu ngamnye ukuqinisekisa ukuba ngonyaka wama-2000 kuya kunyulwa kuphela abezobupolitika abakuxhalabeleyo ukulondolozwa kwendalo.”
Ngaba eli lithemba elisengqiqweni? Xa sikhangela ubungqina bembali, simele sivume ukuba ‘umntu uye wagunyazela umntu, kwakubi kuye’—kwanakwizilwanyana zasendle. (INtshumayeli 8:9) Eneneni, abalondolozi bezilwanyana abaninzi bakholelwa kwelokuba izityalo nezilwanyana ezininzi zisebenza njengemiqondiso yendalo. Xa zisengozini yokuphela, nathi njengabantu sikwimeko efanayo. Kodwa asikokokuqala kwimbali yabantu ukuba ubomi emhlabeni bube phantsi kwesisongelo sokuphela.
Eyona ncwadi yamandulo kwiincwadi zembali inala mazwi: “Uyabona, ndihlisa unogumbe wamanzi ehlabathini, wokonakalisa yonke inyama enomoya wokuphila kuyo ephantsi kwamazulu; konke okusehlabathini kuya kuphuma umphefumlo.” (Genesis 6:17) Sekunjalo, asinguye wonke umntu okanye yonke into eyafayo, kuba uThixo wenza ilungiselelo lokusinda.
Umkhombe Wokusinda
Izazinzulu zikholelwa kwelokuba esona sicombululo kwingxaki yezidalwa zanamhlanje ezisengozini yokuphela ibandakanya ukulondoloza iindawo ezihlala kuzo. Okubangela umdla kukuba, iNew Scientist iyasixelela ngoku yaye iyabhekisela ekusebenziseni kwabalondolozi bezilwanyana “uMkhombe kaNowa njengesikweko.” Umkhombe kaNowa ukuphela kwendlela abantu nezilwanyana abasinda ngayo kuNogumbe womhla kaNowa.
UThixo wambonisa uNowa indlela awayeza kuwakha ngayo lo mkhombe, ityesi enkulu eyenziwe ngamaplanga, eyayiza kudada phezu kwamanzi omkhukula. Oku kwalondoloza ubomi bukaNowa, obomfazi wakhe, oboonyana bakhe abathathu obabafazi babo, kwakunye nobezilwanyana ezazimele iintlobo ezahlukahlukeneyo zezilwanyana, ezasehlathini nezasekhaya—eneneni, ‘inyama yonke enomoya wokuphila kuyo.’ (Genesis 7:15) Ukwanda kwezinto ezahlukeneyo eziphilayo namhlanje kungqina indlela lo mkhombe owayiphumeza kakuhle ngayo injongo yawo.
Noko ke, phawula ukuba, oko kusinda akuzange kuxhomekeke kakhulu kwimigudu yabantu. UNowa nentsapho yakhe kwafuneka bethobele uThixo, eyayinguye onamandla okubalondoloza bephilile. YayinguThixo owaphelisa ukuxabana, ugonyamelo kunye neempawu zokubawa zelo hlabathi langaphambi koMkhukula.—2 Petros 3:5, 6.
Izilwanyana Kwihlabathi Elitsha
UYehova uThixo uthembise ukuba ukuthobela imithetho yakhe kunokuluguqula uluntu ekubeni njengamarhamncwa akhohlakeleyo nalambileyo lube lolufana nezilwanyana ezimbuna nezithobelayo. (Isaya 11:6-9; 65:25) Kwanangoku, sinobungqina obuzeleyo boku. Yiya kwiintlanganiso ezikwiHolo yoBukumkani yamaNgqina kaYehova ekufuphi kuwe, uze uzibonele. Ukuba uYehova unokwenza utshintsho olukhulu ngolo hlobo ebantwini, ngaba akangekwazi nokwenza ilungiselelo lokuba izilwanyana zihlale kunye eluxolweni yaye zinqabisekile, kwanokuba oko kuya kuthetha ukuguqula iimpawu ezinazo ngoku? Enyanisweni, uthembisa oku: “Ngaloo mini ndobenzela umnqophiso namarhamncwa asendle, neentaka zezulu, nezinambuzane zomhlaba: . . . ndibahlalise bekholosile.”—Hoseya 2:18.
Umpostile uPetros wabhala ‘ngemini ezayo yomgwebo neyentshabalalo yabantu abangenabuthixo.’ (2 Petros 3:7) UThixo uya kungenelela ngokutshabalalisa abantu abangenabuthixo. UThixo ‘uya konakalisa abo bawonakalisayo umhlaba.’—ISityhilelo 11:18.
Khawuthelekelele indlela ekuya kuba luvuyo ngayo ukuphila kwihlabathi apho izidalwa zingasayi kuphinde zibe phantsi kwesisongelo. Hayi indlela ekuya kuba kuninzi ngayo ekuya kufuneka sikufundile ngezilwanyana zasendle eziya kube zisingqongile ngelo xesha! Ewe, izingwe, iingonyama, iindlovu, ziya kudakasa ngaphandle kokuphazanyiswa. Izidalwa zasemanzini ziya kwanda, kwanezirhubuluzi, izinambuzane neentaka ezahlukahlukeneyo, kuquka izikhwenene—zonke zilungelelaniswe ngokugqibeleleyo. Xa abantu abathobelayo bebuyiselwe kwimfezeko phantsi koBukumkani obungoMesiya, kuya kwesamela intsebenziswano phakathi kwendalo.