Imbono YeBhayibhile
Ngaba Ufanele Uboyike Abafi?
THETHA nje ngombandela ongabafi, yaye abantu abaninzi bayarhoxa baze bangathethi ngokubhekele phayaa ngawo. Noko ke, bambi, asikuba abawuthandi nje kuphela lo mbandela; kodwa baphethwe luloyiko. Ngoko akuyonto ingaqhelekanga ukufumana amasiko nezithethe anxulumene nokoyika abafi ehlabathini lonke. Ngokomzekelo, makhe siqwalasele amasiko awenziwa kumazwe akumazantsi eSahara eAfrika.
Elinye ibhinqa kwisixeko esikwiNtshona Afrika likukhumbula kakuhle oko kwenzekayo emva kokufa kwelungu lentsapho yakowalo. Libalisa lisithi: “Isalamane sam sasidla ngokulungiselela umfi ipleyiti yokutya size siyibeke ngobunono kwigumbi lakhe lokulala. Xa sele simkile, ndandidla ngokuya apho ndize ndikutye oko kutya. Xa esi salamane sibuya, sasivuya gqitha! Sasikholelwa ukuba lo ufileyo wayezifumene ezo zimuncumuncu. Oku kwaqhubeka kangangethuba elithile de ndagula. Ndaphelelwa ngumdla wokutya yaye ndandingatyi nakuphi na ukutya. Oku kwandenza ndaphakuphaku! Abaninzi kwizalamane zam bagqiba ngelithi ukugula kwam kwakubangelwa sisalamane sethu esifileyo. Zazicinga ukuba ukhona umntu esimqumbeleyo apha entsatsheni.”
Kwakweso sixeko sinye, ukuba intsapho ethile inamawele lize elinye life, akumele kubekho namnye othetha ngomfi lowo kwelo khaya. Ukuba ubani ubuza ngeli wele lifileyo, ngokwesiko loo ntsapho iya kuphendula ithi: “Liye kuthenga ityuwa.” Bakholelwa ngamandla kwelokuba iwele elisaphilayo liya kufa ukuba kuthethwe inyaniso.
Ngokulandelayo, yiba nalo mfanekiso-ngqondweni: Indoda ebinabafazi abathathu iye yafa. Ngosuku olusemva komngcwabo, aba bafazi benzelwa isinxibo esimhlophe esikhethekileyo. Kwangaxeshanye, kwakhiwa indawo ekhethekileyo eyenziwe ngomthi yaza yafulelwa kufutshane nelo khaya, apho aba bafazi baza kuhlamba khona baze banxibe ezo zivatho zimhlophe. Akukho namnye umntu onokungena kuloo ndawo ngaphandle kwabo kunye nebhinqa elikhethelwe ukubancedisa. Ngaphambi kokuba aphume kweli gumbi lokuhlambela likhethekileyo, ubuso bala mabhinqa buyagqunywa. Kwakhona la mabhinqa anxiba emqaleni intambo “yokuwakhusela.” Oku kuhlamba kulisiko kwenziwa rhoqo ngoLwesihlanu nangoMvulo kangangeentsuku ezili-100. Ebudeni beli thuba akanakuthabatha nantoni na ngokungqalileyo kumntu oyindoda. Ukuba indoda ifuna ukuwanika into ethile, imele kuqala iyibeke phantsi okanye etafileni. Liya kwandula ke elo bhinqa liyichole. Akukho namnye ovunyelwa ukuba ahlale okanye alale koomandlalo bala mabhinqa. Nanini na esimka ekhaya, kumele ngamnye wawo aphathe induku ekhethekileyo. Kucingwa ukuba ukuba naloo nduku kuya kuwakhusela ekuhlaselweni yindoda yawo efileyo. Ukuba akayilandeli le migaqo ingasentla, kucingelwa ukuba le ndoda ifileyo inokuba nomsindo ize iwenzakalise.
Amava anjalo aqhelekile kuloo mmandla wehlabathi. Noko ke, ezi ndidi zamasiko azipheleli nje eAfrika.
Ukoyikwa Kwabafi Kwandile
Enye intyilalwazi, iEncarta, ithetha oku kulandelayo ngendlela abantu abaninzi ababajonga ngayo ookhokho babo abafayo: “Izalamane ezafayo . . . kukholelwa ukuba ziye zaba zizidalwa zokomoya ezinamandla okanye, zibe ngoothixo, nangona oko kungafane kwenzeke. [Le ngcamango] isekelwe kwinkolelo yokuba ookhokho bangamalungu akhutheleyo ebuthweni, anomdla kwimicimbi yezalamane zawo ezisaphilayo. Iye yasasazwa ngokubanzi kubantu baseNtshona Afrika . . . , ePolynesia naseMelanesia (abantu baseDobu naseManus), phakathi kwabantu abahlukeneyo baseIndiya nabaseYurophu (abantu bamandulo baseScandinavia namaJamani), yaye ingakumbi eTshayina naseJapan. Ngokuqhelekileyo, kukholelwa ukuba ookhokho banegunya elikhulu, benamandla akhethekileyo okuphembelela ukwenzeka kwezinto okanye ukulawula intlalo-ntle yezalamane zabo ezisaphilayo. Ukhuseleko lwentsapho luyenye yezinto eziyintloko abazixhalabeleyo. Bagqalwa njengabalamleli phakathi kothixo ophakamileyo, okanye oothixo, nabantu, yaye banokunxibelelana nabaphilayo ngamaphupha nangokubalawula. Abantu bayaboyika yaye bayabahlonela. Xa bengakhathalelwa, ookhokho banokubangela kubekho isifo namanye amashwa. Isicamagusho, isikhungo, umthandazo, nedini ziindlela ezahlukeneyo abaphilayo abanokunxibelelana ngazo nookhokho babo.”
Eneneni, kunokudlalwa ngengeniso yentsapho ngenxa yokoyika abafi. Ngokufuthi, abo bakholelwa ngamandla ukuba kufanele koyikwe abafi bafuna amatheko awenziwe ngocoselelo ekufuneka kutyiwe kuze kuselwe kuwo, izilwanyana eziphilayo zokwenza idini, kunye nesinxibo esibiza imali eninzi.
Kodwa ngaba ngokwenene izalamane ezifileyo okanye ookhokho bakwimeko efuna ukuba boyikwe baze bahlonelwe? Lithini iLizwi likaThixo, iBhayibhile?
Ngaba Abafi Banokukwenzakalisa?
Usenokuba nomdla kukwazi ukuba iBhayibhile iyathetha ngeenkolelo ezinjalo. Kwincwadi yeDuteronomi, kuyathethwa ngoqheliselo olunxulumene nokoyikwa kwabafi. Ithi: ‘Maze kungafunyanwa namnye kuwe . . . obopha ngomabophe, nobuza koneshologu, nosiyazi noquqela kwabafileyo. Kuba balisikizi kuYehova bonke abenza ezo zinto.’ (Akekeliswe sithi.)—Duteronomi 18:10-12.
Phawula ukuba uYehova uThixo wazigweba izithethe ezinjalo. Ngoba? Ngenxa yokuba zisekelwe kubuxoki. Obona buxoki ngokuphathelele abafi bobokuba umphefumlo uyaqhubeka uphila. Ngokomzekelo, iphephancwadi iThe Straight Path lathi ngokwenzekayo kubafi: “Ukufa kukuphuma nje komphefumlo. . . . Ingcwaba yindawo yokugcina umzimba kuphela, kungekhona umphefumlo.”
IBhayibhile ayivumelani noko. Zifundele ngokwakho kuHezekile 18:4: “Yabonani, yonke imiphefumlo yeyam; umphefumlo woyise unjengomphefumlo wonyana, yeyam yomibini; umphefumlo owonayo kuya kufa wona.” Kwakhona, imeko yabafi yachazwa ngokucacileyo eLizwini likaThixo kwiNtshumayeli 9:5: “Abadla ubomi bayazi ukuba baya kufa; ke bona abafileyo abazi lutho.” Oku kuchaza isizathu sokuba ukutya okushiyelwe umntu ofileyo kungatyiwa de kube kutyiwe ngothile ophilayo.
Noko ke, iBhayibhile ayisishiyi singenathemba ngabo basemangcwabeni. Banokuphinda baphile! IBhayibhile ithetha ‘ngovuko.’ (Yohane 5:28, 29; 11:25; IZenzo 24:15) Oku kuya kwenzeka ngexesha likaThixo elifanelekileyo. Okwangoku, abafi balele bengekho zingqondweni emangcwabeni, ‘baphumle,’ de kube lixesha likaThixo “lokubavusa.”—Yohane 11:11-14; INdumiso 13:3.
Ngokuqhelekileyo abantu boyika into abangayaziyo. Ulwazi oluchanileyo lunokumkhulula umntu kwiinkolo ezingenasihlahla. IBhayibhile isazisa inyaniso ngemeko yabo basemangcwabeni. Ngamazwi acacileyo, akuyomfuneko ukuba woyike abafi!—Yohane 8:32.