Ukubulala Egameni LikaThixo
NGUMBHALELI KAVUKANI! EFRANSI
“Egameni Likathixo, Siyabulala Ibe Siya Kuqhubeka Sibulala”
NGAPHANTSI kwalo mxholo ucatshulwe ngasentla, i-International Herald Tribune yathi: “Kule nkulungwane, abantu abadla ngokuba nethemba maxa wambi abayijonga njengeyokhanyo, njengezinye iinkulungwane ezingaphambi kwayo bekugquba umkhwa ombi wokubulalana kwabantu egameni likaThixo.”
Lo mbhali wacaphula imizekelo yokubulalana kwabantu bonqulo ngokumanyumnyezi kwiinkulungwane zokuqala. Ngoko, esalatha ekubulaweni kwabantu ngokumanyumnyezi okuye kwenzeka kwinkulungwane yama-20, waqukumbela ngelithi: “Sibona ukuqhubeka kwenkohlakalo eyoyikisayo yokunganyanyezelwa kweembono zabanye, nto leyo eyayiqhubeka kwakudaladala. Unqulo luseyindlela yokuthethelela ugonyamelo lwezobupolitika nokohluthwa kwemihlaba.”
Bambi bazama ukuthethelela iimfazwe zanamhlanje zonqulo ngokuthi uThixo wakuvumela ukubulawa kwamaKanan ngamaSirayeli amandulo. Kodwa, oko akusosingxengxezo sokulwa imfazwe kwabo bathi bangamaKristu namhlanje. Ngoba? Ngenxa yokuba amaSirayeli ayalelwa ngokuthe ngqo nguThixo ukuba asebenze njengabaphumezi bemigwebo yakhe yobulungisa nxamnye nabantu abanqula iidemon, abanonqulo olwaluquka ukuziphatha okubi ngokwesini okugqithiseleyo nokubingelela ngabantwana.—Duteronomi 7:1-5; 2 Kronike 28:3.
Okungqina ukuba iimfazwe zoSirayeli wamandulo zazingeyomilo nje eqhelekileyo yindlela uThixo awayelenza loyise ngokumangalisayo ngayo olu hlanga. Ngokomzekelo, amaSirayeli amandulo akha ayalelwa ukuba asebenzise amaxilongo, imiphanda, nezibane—zixhobo ezo ezingenakuze zisetyenziswe kwimfazwe eqhelekileyo! Ngasihlandlo sithile iimvumi zemiswa phambi komkhosi wakwaSirayeli owawujamelene nemikhosi emikhulu eyayihlasela yeentlanga ezahlukahlukeneyo.—ABagwebi 7:17-22; 2 Kronike 20:10-26.
Ngaphezu koko, xa amaSirayeli ayesilwa iimfazwe engathunywanga nguThixo ngamaxesha athile, wayengawasikeleli ibe ayesoyiswa. (Duteronomi 28:15, 25; ABagwebi 2:11-14; 1 Samuweli 4:1-3, 10, 11) Noko ke, akunakubhekiselwa kwiimfazwe zamaSirayeli xa kuthethelelwa iimfazwe eziliwa kwiNgqobhoko.
Egameni lonqulo, amaHindu aye alwa nxamnye namaSilamsi namaSikh; amaSilamsi angamaShiite aye alwa imfazwe nxamnye namaSilamsi angamaSunni; ibe eSri Lanka, amaBhuda namaHindu aye abulalana.
Umzekelo ocacileyo wokubulalana egameni likaThixo ziimfazwe ezaqhubeka eFransi ebudeni benkulungwane ye-16. Ibali lezi mfazwe liquka ezona ziganeko ekwaphalala kuzo izantyalantyala zegazi kwimbali yeenkonzo zamaRoma Katolika nezamaProtestanti eYurophu. Makhe sihlolisise ezi mfazwe, ukuze sibone oko sinokukufunda kuzo.
[Inkcazelo Ngomfanekiso okwiphepha 3]
U.S. Army photo