Amanzi—Amandla Obomi Esi Sijikelezi-langa
NANGONA engenambala, engenavumba, engenancasa yaye engenazo neekilojoule, amanzi abalulekile kuzo zonke izinto eziphilayo emhlabeni. Akukho mntu, kungekho silwanyana okanye isityalo esinokuphila ngaphandle kwawo. Enoba yindlovu okanye yintsholongwane, ifuna amanzi; ayikho into enokuthabatha indawo yawo. Mntu ngamnye kubantu abangamawaka ezigidi amahlanu emhlabeni kufuneka efumene amanzi aziilitha ezi-2,5 suku ngalunye kwiziselo nasekutyeni ukuze ahlale esempilweni. Ukuba amanzi akakho, akukho nto iya kuphila.
Ngaphandle kwamanzi, kunokuba nzima ukukhulisa izityalo okanye ukondla imfuyo. Xa amanzi engekho, akunakubakho kutya—xa ukutya kungekho akunakubakho nto iphilayo.
Ngethamsanqa, amanzi adlal’ abantwana. Xa sifotwa kummandla osemoyeni, isijikelezi-langa sethu esihle nesiluhlaza sikhangeleka ngokungathi bekumelwe kuthiwe ngaManzi, kunokuba kuthiwe nguMhlaba. Eneneni, ukuba amanzi asehlabathini ebesigubungele ngokulinganayo esi sijikelezi-langa, umhlaba wonke ubuya kuba nolwandlekazi oluziikhilomitha ezi-2,5 ubunzulu. Wonke ummandla womhlaba unokugqunyelelwa luLwandlekazi lwePasifiki, kubekho nenye inxalenye yomhlaba esalayo.
Kambe ke, awona manzi maninzi omhlaba akwiilwandle, ibe amanzi olwandle amtyuba. Ukuba umntu ebeya kusela amanzi olwandle kuphela, kungekudala ebeya kufa lunxano aze aphelelwe ngamanzi emzimbeni ngoxa umzimba uzama ukukhupha ityuwa eninzi ekuwo. Amanzi olwandle akanakusetyenziswa kulimo okanye kwimizi-mveliso—abulala izityalo ezininzi ibe abangela oomatshini babe nomhlwa ngokukhawuleza. Ngoko, amaxesha amaninzi, abantu banokuwasebenzisa amanzi olwandle kuphela xa behluza ityuwa ekuwo, ibe oku kubiza imali eninzi.
Asisi-3 ekhulwini nje kuphela amanzi asehlabathini acocekileyo, angekho mtyuba. Phantse onke loo manzi acocekileyo—malunga nama-99 ekhulwini awo—akwimisinga yomkhenkce nakumkhenkce ookwiindawo eziphakamileyo okanye asemathunjini omhlaba. Asisi-1 ekhulwini kuphela afumanekayo ebantwini.
Isi-1 ekhulwini asiniki themba kwaphela. Ngaba kunokwenzeka ukuba siphelelwe ngamanzi acocekileyo? Kusenokungabi njalo. Iphephancwadi elithi People & the Planet lithi: “Kwanala [asisi-1 ekhulwini], ukuba asasazwe kakuhle ehlabathini lonke aza ongiwa, anokwanela okanye asenobakunceda ngokuphindwe kabini okanye kathathu abemi abakhoyo ngoku ehlabathini.”
Ngokusisiseko, amanzi akhoyo emhlabeni akandi okanye abe mancinane. IScience World ithi: “Amanzi owasebenzisayo namhlanje asenokuba akha athob’ unxano lwesirhubuluzi samandulo. Kungenxa yokuba onke amanzi esinawo eMhlabeni ngoku ngalawo sakha sanawo—okanye esiya kuhlala sinawo.”
Oku kungenxa yokuba amanzi asehlabathini nangqonge ihlabathi akamanga, ayajikeleza—asuka kwiilwandlekazi aye esibhakabhakeni, enjenjeya ukuya emhlabeni, aqukuqele emilanjeni, aze aphinde aye kutshona kwiilwandlekazi. Kunjengokuba indoda esisilumko yabhala kude kudala: “Yonke imilambo iya elwandle, ukanti ulwandle aluzali; endaweni eya kuyo imilambo, ibuya iye kwakhona.”—INtshumayeli 1:7.
Noko ke, emaninzi enjalo amanzi acocekileyo emhlabeni, iliwa libhek’ umoya kweminye imimandla. Amanqaku alandelayo axubusha ezi ngxaki namathemba okuzicombulula.
[Inkcazelo Ngomfanekiso okwiphepha 23]
NASA photo