Isizathu Sokuba Abaninzi Bengalamkeli Igazi
OKO kwakusaziwa njengesigqibo esingenakulibaleka, inkundla yaseOntario iye yabeka iRed Cross yaseKhanada ityala ngenxa yokwasulelwa kwabantu ababini abatofele igazi yiHIV—bobabini bafumene igazi elinale ntsholongwane lomntu omnye. UJaji Stephen Borins wathi: “Xa into eyintlekele njengegazi elineentsholongwane isongela ubomi babo balamkeleyo, kufuneka inyathelo elikhawulezileyo.”
Ebudeni beminyaka yee-1980, abantu baseKhanada abali-1200 bosulelwa yiHIV, yaye abali-12 000 abongezelelekileyo bosulelwe yihepatitis C—bonke ngenxa yegazi elineentsholongwane nemveliso yegazi. Ukunceda ukunciphisa amanani abantu abosulelwayo, abo banikela ngalo baxilongwa ngenyameko engakumbi. Kodwa asingabo bonke abanikela ngegazi abanyanisekileyo ngendlela ababeziphethe ngayo ngokwesini. Ngokomzekelo, uhlolisiso olwenziwe eUnited States lubonise ukuba umntu om-1 kwabangama-50 abanikela ngegazi akazixeli izinto ezinokuba yingozi, ezinjengobufanasini okanye ukuba neentlobano zesini nonongogo.
Ukongezelela kule ngxaki yinto yokuba igazi elihlolisisiweyo alinikeli siqinisekiso sokuba likhuselekile. Ngokutsho kwephephancwadi iNew Scientist, “ukuba umntu unikela ngegazi ngaphambi kweeveki ezintathu emva kokwasulelwa yiHIV, indlela ezisetyenziswayo zokuxilonga azikwazi kuzifumanisa ezi ntsholongwane. Kumntu one-hepatitis C, kuthabatha iinyanga ezimbini ngaphambi kokuba ifunyaniswe le ntsholongwane.”
Kwiminyaka yakutshanje, inani labantu abaseKhanada abafuna ukunikezela—okanye ukutofelwa igazi—liye lehla ngokuphawulekayo. Umbhali wemihlathi uPaul Schratz uyabhala: “Ngenxa yokuphelelwa ngumdla kwabantu ekunikeleni ngegazi, nokwanda kwabantu abangenakunikela ngegazi, ndiyavuya kuba amaNgqina kaYehova aqalisa uphando lwezinto ezinokusetyenziswa endaweni yegazi.”
Okubangela umdla kukuba, iThe Toronto Star ithi ebudeni bomnye unyaka kutshanje, abantu bangama-40 “kwizibhedlele zaseKhanada baye baxoka bathi bangamaNgqina kaYehova ngenxa yokuba bengafuni ukutofelwa igazi.” Uhlolisiso lubonisa ukuba malunga nabantu abangama-90 ekhulwini baseKhanada bakhetha ezinye iindlela ezinokusetyenziswa kunegazi elinikelweyo. Ngoko ke, ukusetyenziswa kwegazi akuseyombambano yonqulo kuphela.