Yiba Nembono Elungeleleneyo Ngomculo
ISHISHINI lomculo lenza izigidi ngezigidi zeerandi namhlanje. Iimvumi ezidumileyo nabo bazixhasayo zenza imali eninzi. Sekunjalo, liyinyaniso elokuba ukungonwabi, ukufa ngaphambi kwexesha nokuzibulala kuye kwenzeka kwiimvumi eziphumelelayo. Yaye kuye kwaboniswa ngokucacileyo ukuba olunye uhlobo lomculo luthob’ isidima ngokokuziphatha, ngokweemvakalelo nangokomoya ibe unokukhokelela kugonyamelo nesimilo esingathandekiyo.
Noko ke, kulungile ukuba nembono elungeleleneyo ngomculo. Ngoxa kukho umculo omninzi ongafanelekanga, olunye uhlobo lomculo lunokubenza mnandi ubomi bethu luze lubangele umlinganiselo othile wovuyo nolwaneliseko. Lunokusakha ngokweemvakalelo nangokomoya. Khawuqwalasele imizekelo embalwa.
Iindumiso ezili-150 zeBhayibhile zibubugcisa obumangamalisayo—ziyimibongo, iingoma ezingcwele nemithandazo. Namhlanje zifundwa ngovuyo ngamakhulukhulu eelwimi. Noko ke, amaHebhere amandulo ayengazifundi nje kuphela ezi ndumiso; ayezicula. Ayekwenza oko ephelekwa zizixhobo zomculo—indlela enamandla yokudibanisa ubulumko boThixo wawo, uYehova, njengoko buchazwa ngamazwi neemvakalelo ezazivuswa ziimvumi ezivunyiweyo kubaphulaphuli. Njengoko wawungekho semva, kuyabonakala ukuba umgangatho nohlobo lomculo wamaHebhere wawungaphezu koweentlanga ezaziwangqongile ngelo xesha.
Kamva, amaKristu enkulungwane yokuqala ayecula iindumiso nezinye iingoma ezingcwele ukuze adumise uThixo ethomalalisa noxinezeleko. Ngaloo ndlela, umculo wawuwonwabisa. Yaye ngokucula kwawo iingoma ezisekelwe eBhayibhileni, ayebethelela ngakumbi ezintliziyweni zawo ulwazi ngoThixo, nto leyo eyayifuneka ukuze kwalathiswe indlela awayephila ngayo.—Mateyu 26:30; IZenzo 16:25.
AmaGrike amandulo ayekholelwa ekubeni umculo uphucula ubuntu uze wenze indoda okanye ibhinqa liphelele. Kweli hlabathi lenkulungwane yama-20, elibethelela imfundo yenzululwazi, yezoqoqosho, nezifundo eziphathelele ingqondo, ukuphuhliswa kweemvakalelo kusetyenziswa ubuchule akuyonto ikhathalelweyo.
Hlala Ulungelelene
Ukuphulaphula umculo omnandi kunokuba yingenelo kuze kubangele uyolo. Kanti, umntu unokuziyolisa ngakumbi ngokudlala isixhobo somculo okanye ukucula neqela labahlobo. Ukwazi umculo kunokusizisela uyolo olukhulu ngokwenene.
Kambe ke, njengazo zonke ezinye izinto ezimnandi ebomini, kufuneka ulungelelwano, ubulumko, nokulukhetha kakuhle olu hlobo lokuzonwabisa. Oku akumele ukwenze kuhlobo lomculo olukhethayo kuphela kodwa umele uphaphele nexesha olichitha uphulaphule okanye udlala umculo.
Ukuba uhlobo oluthile lomculo luba nempembelelo engafunekiyo kwiimvakalelo, izenzo nolwalamano lwakho, khetha olunye uhlobo lomculo. Khusela iindlebe zakho ukuze kukhuseleke iimvakalelo zakho ze kukhuseleke intliziyo nengqondo yakho!
Oku kunjalo ingakumbi ngokuphathelele amazwi. Anokukwenza ufane nabantu abaneembono ezahlukileyo kwezakho ngokuphathelele ubomi nokuziphatha, nabakhuthaza indlela yokuziphatha engahloneli Thixo neyokuziphatha kakubi. Kwezinye iimeko negama lengoma linokuvuselela iimvakalelo ezingafanelekanga.
ILizwi likaThixo, iBhayibhile, libongoza abo bafuna ukumkholisa ukuba ‘bayinikele imizimba yabo ibe yimibingelelo ephilayo, engcwele, eyamkelekileyo kuThixo, inkonzo ke leyo engcwele ngokwamandla abo engqiqo.’ (Roma 12:1) Ngokucacileyo, iimvakalelo zethu ziyinxalenye yaloo ‘mbingelelo uphilayo.’ Ngoko ukuba sinokuze sifumanise ukuba iimvakalelo zethu ziqalisa ukugqumelela ukuba nengqiqo zize ziphazamise amandla ethu okucinga ngenxa yamandla omculo, ngoko nangoko sifanele sitshintshe umculo esiwuphulaphulayo. Khumbula ukuba: Amandla omculo anokuyichaphazela intliziyo nengqondo yakho—enoba akwenza oko ngendlela efanelekileyo okanye engafanelekanga!
[Ibhokisi/Umfanekiso okwiphepha 10]
Ukuvuselela Amandla Okufunda
“Uphando lubonisa ukuba ukuwuphulaphula rhoqo umculo ovisisanayo kunokuvuselela amandla osana okufunda. Kodwa kumakhaya amaninzi azize ziwuve umculo onjalo.”—Audio, March 1999.