Ithetha Ukuthini Yonke Le Nto?

UKUBA ubunokuhlalutya imilinganiselo yokuziphatha kwiminyaka yakutshanje, ubuya kubona into ecacileyo. Ngaphandle kwamathandabuzo, imilinganiselo yokuziphatha ayisiwa so ngabantu abaninzi. Yintoni kanye eyona ntsingiselo yoku?

Ngaba njengokuba abanye abantu besitsho ithetha ukuthi yonke impucuko yethu noluntu xa lulonke lujongene nentshabalalo? Okanye ngaba utshintsho olunjalo luyinxalenye nje yamahla-ndinyuka abesoloko ekho kwimbali?

Bacinga ngolo hlobo abantu abaninzi. Bajonga ukuwohloka kwemilinganiselo yokuziphatha yemihla yethu njengomkhwa ongomnye webisoloko ikho ukutyhubela imbali. Banolindelo olupheleleyo lokuba izinto ziya kutshintsha ekugqibeleni yaye imilinganiselo ephakamileyo yokuziphatha iya kubuya ibekho. Ngaba banyanisile?

‘Imihla Yokugqibela’

Makhe sihlolisise izibakala ngokuvisisana nencwadi ethe kangangeenkulungwane yasebenza njengegunya elamkeleke ngokubanzi ngokuphathelele imibandela engemilinganiselo—iLizwi likaThixo, iBhayibhile. Kuyasikhanyisela ukuthelekisa ihlabathi lanamhlanje nenkcazelo ebuprofeti enikelwa yiBhayibhile ngelona xesha lamanqam kwimbali yoluntu. Eli lixesha elibiza ngokuba ‘yimihla yokugqibela’ okanye ‘ukupheliswa kwenkqubo yezinto.’ (2 Timoti 3:1; Mateyu 24:3) Njengoko la mabinzana ebonisa, eli xesha liya kuphawula isiphelo nesiqalo esitsha.

ILizwi likaThixo laxela kwangaphambili ukuba imihla yokugqibela iya kuphawulwa ‘ngamaxesha amanqam ekunzima ukujamelana nawo.’ Ngelokunceda abakhi-mkhanya abaphaphileyo babone imihla yokugqibela, iBhayibhile inikela iinkcukacha eziliqela ezithi xa zidibene zinikele inkcazelo ecacileyo, okanye umqondiso oyintlanganisela weli xesha likhethekileyo.

Imikhwa Emibi Esebantwini

Phawula enye yeenkalo zalo mqondiso ebonakalayo namhlanje: “Abantu baya kuba nembonakalo yozinikelo lobuthixo kodwa bengaphili ngokuvisisana nalo.” (2 Timoti 3:2, 5) Alikho elinye ixesha embalini eliye laphawulwa kukubekelwa konqulo ecaleni ngolu hlobo. UThixo uye wabekelwa bucala luluntu ngokubanzi njengokuphela kwegunya, yaye abanye abantu abayamkeli iBhayibhile njengekuphela komthombo wenyaniso. Kambe ke, iinkonzo zisekho kodwa ezininzi azisenampembelelo kangako. Zifana nje nonomgogwana.

IBhayibhile ichaza enye inkalo yalo mqondiso: ‘Abantu baya kuba . . . ngabangenakuzeyisa, iindlobongela,’ yaye “ngenxa yokwanda kokuchas’ umthetho uthando lwenani elikhulu ngakumbi luya kuphola.” (2 Timoti 3:2, 3; Mateyu 24:12) Igama lesiGrike eliguqulelwe ngokuthi “iindlobongela” phakathi kwezinye izinto lithetha, “ukungabi naluvelwano neemvakalelo.” Namhlanje, nabantwana abaselula bazibonisa ‘beziindlobongela’ yaye benza ulwaphulo-mthetho olunobundlobongela.

Ukongezelela, inkqubela ekhawulezileyo yezobugcisa nezoqoqosho nokubawa okubangelwe zezi zinto kuye kwabangela abantu abaninzi bayilahlele kude imilinganiselo yangaphambili. Bengabakhathalele abanye, basebenzisa naziphi na iindlela, nezokunganyaniseki ukuze bafumane nantoni na enokwanelisa iimfuno zabo zokuzingca. Ukwanda ngendlela egqithe emgceni kokungcakaza kububungqina boku kuzingca yaye uhlolisiso olwenziwe ngolwaphulo-mthetho lwamashumi eminyaka ambalwa adluleyo lukwenza kucace okwekati emhlophe ehlungwini oku.

Enye inkalo exhaphake ngokukhethekileyo kumhla wethu yile: ‘Abantu baya kuba . . . ngabathandi beziyolo kunokuba ngabathandi bakaThixo.’ (2 Timoti 3:2, 4) Omnye umzekelo ngowokuba, abantu bafuna uyolo lwesini kodwa, abayifuni imbopheleleko yokuphila neqabane elinye lomtshato ubomi babo bonke. Umphumo uye waba kukwanda kokuqhekeka kweentsapho, abantwana abangonwabanga nabangasondelelananga neentsapho zabo, abazali abangatshatanga nezifo ezidluliselwa ngeentlobano zesini.

Enye inkalo yalo mqondiso kukuba “abantu baya kuba ngabazithandayo, abathandi bemali.” (2 Timoti 3:2) Ngokutsho kwephephancwadi laseJamani iDie Zeit, “eyona nto iphembelela inkqubo [yezoshishino namhlanje] kukuzingca.” Kunanini na ngaphambili, ukusukela imali kuyeyona nto ibalulekileyo kubomi babantu abaninzi. Kolu sukelo lokuzingca, iyatyeshelwa eminye imilinganiselo.

Iziganeko Zehlabathi

Ngaphandle kokuchaza ukuwohloka kwemilinganiselo yabantu yokuziphatha, iBhayibhile iphinda ichaze kusengaphambili ukuba imihla yokugqibela iya kuphawulwa ziziphendu ezingaqhelekanga eziya kuchaphazela intsapho yoluntu. Ngokomzekelo ithi, “uhlanga luya kuvukelana nohlanga, nobukumkani buvukelane nobukumkani; kuya kubakho iinyikima zomhlaba ezinkulu, neendyikitya zokufa nokunqongophala kokutya kwiindawo ngeendawo.”—Luka 21:10, 11.

Ngaphandle kwenkulungwane yama-20, alikho elinye ixesha embalini apho abona bantu baninzi baye babandakanyeka kwiziganeko ezininzi ezigungqisa ihlabathi ngexeshana nje elifutshane. Ngokomzekelo, abantu abangaphezu kwe-100 lamawaka baye babulawa ezimfazweni ngelo xesha, inani eliliphindaphinda kaninzi eleengxwelerha zemfazwe kwiinkulungwane eziliqela ezidluleyo zidityanisiwe. Inkulungwane yama-20 iye yaneemfazwe ezimbini ezahlukileyo kuzo naziphi na ezinye kangangokuba kuye kwathiwa ziimfazwe zehlabathi. Imilo yehlabathi efana nale ayizange ibekho ngaphambili.

Amandla Aphembelela Ububi

Kwakhona iBhayibhile ichaza ubukho besidalwa somoya esinamandla nesingendawo, ‘esibizwa ngokuba nguMtyholi noSathana,’ esinjongo yaso ikukulukuhla abantu bemke kwimilinganiselo yokwenyaniso aze abatsalele kwimilinganiselo yokuziphatha eyonakeleyo. Ithi ebudeni bemihla yokugqibela, uye wehla weza emhlabeni, “enomsindo omkhulu, esazi ukuba ixesha analo lifutshane.”—ISityhilelo 12:9, 12.

UMtyholi uchazwa eBhayibhileni ‘njengomlawuli wegunya lomoya, moya lowo ngoku osebenza koonyana bokungathobeli.’ (Efese 2:2) Oku kuthetha ukuba uMtyholi unempembelelo enamandla kubantu abaninzi, ngokuqhelekileyo bona bengazi, njengokuba maxa wambi sisenokungayiphawuli into engabonakaliyo engcolisa umoya.

Ngokomzekelo, impembelelo kaSathana ibonakala kwiindlela ezininzi zonxibelelwano zala maxesha: iividiyo, imifanekiso eshukumayo, oomabonwakude, i-Internet, izibhengezo, iincwadi, amaphephancwadi namaphephandaba. Izinto ezininzi, ingakumbi ezo zijoliswe kulutsha olungalumkanga, zizaliswe zizenzo ezigabadeleyo nezilizothe, njengobuhlanga, ubugqi, ukuziphatha okubi nogonyamelo olunenkohlakalo.

Abantu abaninzi abanyanisekileyo baye bachukunyiswa kukufana phakathi kwenkcazelo enikelwa yiBhayibhile ngemihla yokugqibela nezinto ezenzeka ehlabathini ngomhla wethu. Liyinyaniso elokuba, kuye kwakho ezinye iziganeko embalini ngaphambi kwenkulungwane yama-20 eziye ngandlela ithile zabonakala zivisisana nenkcazelo yeBhayibhile. Kodwa ngaba lo mqondiso ubonakala kuphela kwinkulungwane yama-20 neyama-21?

Ixesha Elitsha Elizayo

IBhayibhile ibonisa ukuba abo bathi uluntu luya kutshatyalaliswa nabo bathi izinto ziya kuhlala zinjengoko zazinjalo abachananga. Kunoko, ibonisa ngokucacileyo ukuba ibutho labantu elikhoyo ehlabathini namhlanje neliphethe umhlaba liya kuthatyathelwa indawo yinto entsha ngokupheleleyo.

Emva kokuba uYesu echaze iinkalo eziliqela zomqondiso wemihla yokugqibela, wathi: “Ngale ndlela kwanani, xa nibona ezi zinto zisenzeka, yazini ukuba ubukumkani bukaThixo bukufuphi.” (Luka 21:31) UBukumkani bukaThixo basezulwini babungumxholo oyintloko wentshumayelo kaYesu. (Mateyu 6:9, 10) Yaye uThixo wammisela njengoKumkani wobu Bukumkani, obuliqumrhu eliya kulawula kungekudala phezu kwawo wonke umhlaba.—Luka 8:1; ISityhilelo 11:15; 20:1-6.

Ekupheleni kwemihla yokugqibela, uBukumkani bukaThixo basezulwini phantsi kukaKristu buya kutshabalalisa zonke iintshaba zabo—uMtyholi nabaxhasi bakhe—buze buthabathele indawo ibutho lanamhlanje elinemilinganiselo yokuziphatha ewohlokileyo ngehlabathi elitsha lobulungisa. (Daniyeli 2:44) Kweli hlabathi litsha, abantu abaneentliziyo ezilungileyo baya kufumana ubomi obungunaphakade kumhlaba otshintshwe wenziwa iparadesi.—Luka 23:43; 2 Petros 3:13; ISityhilelo 21:3, 4.

Abo bakucekisayo ukuwohloka kwemilinganiselo namhlanje nabaqondayo ukuba umqondiso oyintlanganisela wemihla yokugqibela uzalisekiswa ziziganeko ezenzekayo banokukhangela phambili kwikamva elizukileyo. Ngenxa yoku siyambulela uThixo uSomandla, osikhathalelayo thina njengabantu nonenjongo ezukileyo ngendalo yakhe, umhlaba.—INdumiso 37:10, 11, 29; 1 Petros 5:6, 7.

AmaNgqina kaYehova ayakumema ukuba ufunde okungakumbi ngokuphathelele uMdali wethu onothando nangethemba lokuphila kwihlabathi elinemilinganiselo yokuziphatha ecocekileyo alilungiselele bonke abantu abalifunayo. Njengoko iBhayibhile isitsho, “oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”—Yohane 17:3.

[Umfanekiso okwiphepha 10]

Abantu abanentliziyo ezilungileyo baya kunandipha ubomi obungunaphakade kumhlaba oyiparadesi