Amanyala Ayaboniswa Nakwikhompyutha
KULO LONKE IHLABATHI, IZIGIDI NGEZIGIDI ZABANTU ZISEBENZISA i-Internet umhla nezolo. Abaninzi bayisebenzisela ukuqhuba ushishino, ukuhlola iindaba zehlabathi, ukukhangela imozulu, ukufunda ngamazwe awahlukahlukeneyo, ukufumana iinkcukacha eziphathelele ukhenketho, okanye ukuqhagamshelana nentsapho nezihlobo ezikwiindawo ezahlukeneyo zehlabathini. Kodwa abanye—abakhulileyo abatshatileyo nabangatshatanga, kwakunye nenani elivakalayo labantwana—basebenzisa esi sixhobo ngenjongo eyahluke kwaphela: UKUZE BABONE AMANYALA.
AMANYALA AKWIKHOMPYUTHA, akwabizwa ngokuba yicyberporn, athandwa gqitha kangangokuba alushishino olwenza izigidi ngezigidi zeerandi. IThe Wall Street Journal yathi: “Ukuba uthetha ngeWeb site enemali [enengeniso], lishishini elingcolileyo [elibonisa amanyala].”
Le Journal yaqhubeka ichaza isizathu sokuba abantu bakuthande kangaka ukubukela amanyala kwi-Internet, isithi: “Abathengi banokubukela izinto ezimbi bengadanga baye kwivenkile yeencwadi ezingcolileyo okanye bajikele ngemva kwivenkile ekufutshane ethengisa iividiyo. Abathengi banokubukela izinto ezingcolileyo emakhayeni abo—okanye eziofisini.”
Amanyala Nabantwana
Okulusizi kukuba, uninzi lwabo babukela icyberporn ngabantwana. Abantwana abalelwayo ngumthetho ukuba bathenge iincwadi ezibonisa amanyala okanye ukuba baqeshe iividiyo ezibonisa amanyala banokuzibukela ezi zinto emakhayeni abo ngokucofa nje amaqhosha. Kukho intaphane yamanyala apho.
Abantwana abaninzi bavula i-Internet ngaphandle kokwazi kwabazali babo. Enyanisweni, iThe Detroit News ithi “abantwana abangaphezu kwababini kwabahlanu bangena kwiweb site okanye kwamanye amajelo nakuba abazali abamalunga nama-85 ekhulwini benemigaqo engavisisaniyo nokwenjenjalo.”
Ngoxa uninzi lwabantwana—nabantu abasele bekhulile—beyifihla into yokuba babukela amanyala, asingabo bonke abakubona kuyimfuneko ukwenjenjalo. Abanye bakujonga ukwenza loo nto njengohlobo lokuzihlaziya olungeyongozi. Abanye bayavuma ukuba amanyala akabalungelanga abantwana kodwa baqiqa ngelithi into eyenziwa ngabantu abakhulileyo ngasese ifuna bona.
Kwamanye amazwe impikiswano ephathelele amanyala iye yajika yaba lidabi elikhulu lezobupolitika. Kwelinye icala, abo bamela ilungelo lokuba nenkululeko yokuthetha bayawathethelela amanyala, yaye kwelinye icala, abo bamela imilinganiselo yentsapho baphembelela abasemagunyeni ukuba baziphelise izinto ezibonisa amanyala.
UVukani! akathabathi cala kwimibandela yezobupolitika. Injongo yolu ngcelele lwamanqaku kukwazisa abafundi bethu ngeengozi zokubukela amanyala, ukubanika amacebiso ngeendlela abanokuzikhusela ngazo bona nabathandekayo babo, nokubanika amacebiso asekelwe eBhayibhileni anokunceda nabani na oye wabambiseka ngamanyala nofuna ukuphuncula.