Abantu Abaselula Bayabuza . . .

Ndinokuphumelela Njani Ukuhlala Kwilizwe Lasemzini?

“Ukufika kwam kwisikhululo seenqwelo-moya, ekuphela kwento endandifuna ukuyenza, kukugoduka! . . . Ndandingasenamdla wanto. Ngamafutshane, ndandikhumbula ekhaya kunanini na ngaphambili.”—U-Uta.

KUYOYIKEKA ukuba wedwa kwilizwe lasemzini. Kodwa njengoko inqaku elandulelayo kolu ngcelele libonisile, ulutsha oluninzi lukhetha ukuchitha ixesha elithile kwilizwe lasemzini. Abanye bayahamba ukuze bafumane imfundo okanye bafumane uqeqesho olukhethekileyo. Abanye bafuna ukufunda ulwimi. Abanye bafuna nje ukuzuza imali. Noko ke, abanye baye bafuduka ukuze bakhonze kumazwe asemzini apho kukho imfuneko yabashumayeli boBukumkani.

Masithi uhlala kwilizwe lasemzini ngezizathu ezihle—izizathu ezibandakanya iintswelo nosukelo lwakho lokomoyaa—unokwenza ntoni ukuze uqiniseke ukuba ukuhlala kwakho apho kuyimpumelelo?

Zimisele Ukuzivumelanisa Neemeko

Okokuqala, umele ufune ukuzivumelanisa neemeko. Oku akuthethi ukuba ulahle imigaqo yobuKristu okanye indlela yakho yemihla ngemihla yokwenza izinto ngokomoya. Kodwa oku kunokuthetha ukuba uhlakulele ukuthanda ukutya uhlobo olutsha lokutya, ukufunda imithetho emitsha yokuziphatha, okanye ukuzama iindlela ezintsha zokwenza izinto. Mhlawumbi la masiko matsha anokwahluka kakhulu kwindlela obuzenza ngayo izinto ekhaya. Kodwa umyalelo kaYesu othi “musani ukugweba” unokusetyenziswa apha. (Mateyu 7:1) Eneneni, akukho hlanga okanye indlela yokuphila enelungelo lokuzibanga ibhetele kunezinye. (IZenzo 17:26) Kanye njengoko abantu abadala befanele bakuphephe ukuthelekisa ulutsha lweminyaka edluleyo nolu lwezi mini, ngoko ke abantu abaselula abakwilizwe lasemzini bafanele bakuphephe ukuthelekisa ilizwe lasemzini nelabo. (INtshumayeli 7:10) Nikela ingqalelo kwizinto ezintle elinazo eli lizwe nendlela yakhona yokuphila. Kwakhona, okukhona ukhawuleza ukufunda ulwimi lweli lizwe, kokukhona uya kukhawuleza ukuqala uzive usekhaya.

Umpostile uPawulos wazivumelanisa neemeko ngokuphumelelayo kwiindlela zokuphila ezahlukahlukeneyo kumsebenzi wakhe wobuvangeli basemazweni kuba wayefuna ukuba “zizinto zonke kubantu bazo zonke iintlobo.” (1 Korinte 9:22) Isimo sengqondo esinjalo sinokukunceda ukuba uqhelane neemeko. UAdrianne usisicakakazi (au pair) uhlala eJamani, wenzela intsapho ethile umsebenzi wasekhaya ukuze afumane igumbi lokuhlala nokutya. Uthi: “Ndimele ndibe bhetyebhetye kuba andikwazi ukulindela abanye ukuba baziqhelanise neemeko zam.”

‘Ndikhumbula Ekhaya!’

Ebudeni beeveki ezimbalwa zokuqala, asinto ingaqhelekanga ukuziva udakumbile yaye ukhumbula ekhaya. IBhayibhile isibonisa ukuba uYakobi ‘wayeyilangazelela kakhulu indlu kayise,’ nangona uYakobi wayekwilizwe lasemzini ngaphezu kweminyaka engama-20! (Genesis 31:30) Ngoko musa ukumangaliswa ukuba maxa wambi uyanxunguphala. Kakade ke, ukuba uhlala ucinga ngoko ukushiye ngasemva, uya kudakumba nangakumbi. (Numeri 11:4, 5) Eyona ndlela isemagqabini yokoyisa unxunguphalo kukuziqhelanisa nendlela entsha yokuphila kwemihla ngemihla nemeko-bume entsha. Nangona kukuhle ukuhlala uqhagamshelana nentsapho yakowenu ngokubhala iileta okanye ngokutsala umnxeba, ukutsalela umnxeba kakhulu ekhaya kunokukuthintela ekuziqhelaniseni nekhaya elitsha.

Ulutsha oluninzi olungamaKristu lufumanisa ukuba ukubuyela kwimisebenzi yalo yokomoya yemihla ngemihla kuyeyona nto iphambili yokuphelisa ubulolo. (Filipi 3:16) Ekhumbula iiveki zakhe zokuqala kwilizwe lasemzini, uAmber uthi: “Kwakunzima ngeengokuhlwa, xa kwakungekho nto yakwenza, ngoko ndandizama ukwenza ufundisiso olongezelelekileyo okanye ukufunda incwadi.” URachel oselula, isicakakazi saseBritani esiseJamani, uthetha ngamava akhe xa ecebisa oku: “Ngokukhawuleza yiba ngoxakekileyo. Qalisa ukuya kwiintlanganiso ngoko nangoko.” Ekuqaleni, usenokufuna uncedo lokuya kwiintlanganiso. Kodwa phakathi kwebandla lamaKristu, unokufumana abahlobo abafanelekileyo abanokuba ‘njengabantakwenu noonyoko.’—Marko 10:29, 30.

Ukuba nesabelo kumsebenzi wamaKristu wokushumayela nako kuyinxalenye ebalulekileyo kwimisebenzi yemihla ngemihla yokomoya. Ukushumayela akusayi kuba yingenelo ngokomoya nje kuphela kuwe kodwa kunokukunceda uziqhelanise nendlela entsha yokuphila nolwimi olutsha.

Okokugqibela, zibekele ixesha elithe rhoqo lokuthandaza nelesifundo sobuqu. Ezo zinto zibalulekile ukuze uhlale uphilile ngokomoya. (Roma 12:12; 1 Timoti 4:15) Ngenxa yoku, UAdrianne, okhankanywe ngaphambilana, waqiniseka ukuba uza noncwadi lweBhayibhile ngolwimi lwakhe.

Ukuhlala Nentsapho Olundwendwe Lwayo

Amanye amaKristu aselula aye alungiselela ukuhlala neentsapho ezikholwayo ngoxa bekwilizwe lasemzini. Nangona intsapho olundwendwe lwayo ingenakulindelwa ukuba ithabathe umsebenzi wokuba ngumzali, inokuba lunxulumano oluhle ize ikukhuthaze ngokomoya.—IMizekeliso 27:17.

Sekunjalo, kubalulekile ukuba nonxibelelwano olukhululekileyo ukuze ugcine ulwalamano oluhle. (IMizekeliso 15:22; 20:5; 25:11) UAmber uthi: “Kufuneka wazi ngoko ufanele ukwenze. Ufanele ukwazi oko bakulindeleyo abo ulundwendwe lwabo. Yaye bafanele bakwazi oko ukulindeleyo.” Fumanisa ukuba yiyiphi imithetho yasendlwini yaye ulindelwe ukuba ube nesabelo ukusa kuwuphi umkhamo kwimisebenzi yasekhaya. Imibandela enjalo ifanele ixutyushwe ngokucokisekileyo.

Imeko yakho iya kuba lucelomngeni ngakumbi ukuba, ngokomzekelo, usebenzela intsapho olundwendwe lwayo engabelani nawe ngeenkolelo zakho. Ekubeni le ntsapho inokungakuqondi ukuma kwakho kwimigaqo yeBhayibhile, unokuzifumanisa ukwiimeko ezikwenza ulalanise. (IMizekeliso 13:20) Iimbopheleleko zokwenza umsebenzi wasekhaya zinokungqubana neembopheleleko zokomoya, njengokuya kwiintlanganiso zamaKristu. Ngoko ukuba iimeko ezingaphephekiyo zikunyanzelela ukuba uhlale nentsapho engabelani nawe ngeenkolelo, ngoko ziliqela izinto ofanele uzilumkele.

URachel uncomela oku: “Qiniseka ukuba bayakwazi ukuba ungumKristu. Kuhle ukubaxelela ngokunyanisekileyo ngoko nangoko.” Ukucacisa ngemilinganiselo yakho yonqulo neyokuziphatha kunokuba yinkuselo. Kwakhona, ufanele uyenze icace kumqeshi wakho indlela ezibaluleke ngayo kuwe iintlanganiso zamaKristu nokushumayela. Okokugqibela, kububulumko ukuqiniseka ukuba imibandela ebalulekileyo kuwe njengeeyure zokusebenza, ixesha lekhefu, nentlawulo ibhalwe phantsi ngaphambi kokuba uqalise. Oku kunokuthintela ingxaki kwixesha elizayo.

Ukucombulula Iingxaki

Phezu kwayo yonke imigudu oyenzayo, sekunjalo kusenokuvela ingxaki. Ngokomzekelo, kuthekani ukuba abo ulundwendwe lwabo bathi phum’ uphele ekhayeni labo? Oku kusenokukunxunguphalisa. Ukuba kubakho ukungaqondani, usenokuzama ukuthetha nabo ulundwendwe lwabo ngendlela ezolileyo nesengqiqweni. (IMizekeliso 15:1) Kulungele ukuzivuma naziphi iimpazamo oye wazenza. Mhlawumbi baya kutshintsh’ ingqondo. Ukuba akunjalo, kuya kufuneka ufune enye indawo yokuhlala.

Ezinye iingxaki zinokufuna ucele uncedo kothile. Ngokomzekelo, usenokuba nengxaki yemali okanye ugule. Usoyika ukuba abazali bakho basenokuza kukuphuthuma, unokuba madolw’ anzima ukubazisa ngoko kwenzekayo. Ngaphezu koko, bakude kakhulu yaye basenokungazi ukuba baqhubane njani nale meko kwilizwe lasemzini. Noko ke, abazalwana abakwibandla lasekuhlaleni basenokuba namava ngeengxaki ezinjalo yaye basenokukwazi ukunikela icebiso elisebenzisekayo. Basenokukwazi nokukunceda ukuba wenze isigqibo enoba ufanele ubazise abazali bakho ngalo mbandela kusini na.

Ukubuyela Ekhaya

Phezu kwawo nje amagingxigingxi nocelomngeni, ukuchitha ixesha kwilizwe lasemzini kunokuba ngamava anomvuzo, ingakumbi ukuba uya apho ngenxa yezizathu zokomoya. Kakade ke, kusenokufika ixesha lokuba ubuyele ekhaya. UAndreas uthi: “Ndinezinto ezininzi ezintle endizikhumbulayo—kungekudala ezimbi ziyalibaleka—kwakunzima kum ukuba ndihambe.” Sekunjalo, musa ukulindela ukuba ngesiquphe abahlobo okanye intsapho yakokwenu itshintshe indlela yayo yokwenza izinto kuba ngoku ubuye neengcamango ezintsha ozifunde kwilizwe lasemzini. Ngaphezu koko, ungayicaphukisi ngokuhlala uyikhumbuza ngendlela izinto ezenziwa ngayo kwenye indawo. Ngokwemvelo, uya kufuna ukuxelela wonke ubani ngamava akho, kodwa unganxunguphali ukuba abanye abanamdla njengawe.

Licacile elokuba, isigqibo sokuhlala okwethutyana kwilizwe lasemzini sifanele sithatyathwe nzulu. Ukuba, emva kokuxubusha lo mbandela nabazali bakho, ugqiba kwelokuba kukho izizathu ezivakalayo zokuba ufuduke, kulungele ukuhlangabezana nocelomngeni oya kujamelana nalo. Njengaso nasiphi na isigqibo esikhulu ojamelana naso ebomini, kububulumko ukubala iindleko.—Luka 14:28-30.

[Umbhalo osemazantsi]

[Ibhokisi/Umfanekiso okwiphepha 11]

Amacebiso Okhuseleko

● Gcina incwadi yakho yokundwendwela, imali netikiti lokugoduka kwindawo ekhuselekileyo.

● Yenza umbhalo okhutshelweyo wencwadi yakho yokundwendwela kunye nencwadi yemvume yokungena kunye/okanye nemvume yakho yokuhlala, itikiti lakho lokugoduka namanye amaphepha abalulekileyo. Yigcine kuwe enye iseti yemibhalo, uze uthumele enye iseti kubazali okanye kubahlobo bakho ekhaya.

● Ngalo lonke ixesha yiba neenombolo zomnxeba zabazali nabahlobo bakho basekhaya nezentsapho olundwendwe lwayo.

● Gcina ihambo enyulu namalungu esini esahlukileyo, enoba ngawentsapho olundwendwe lwayo, esikolweni, emsebenzini okanye kwezinye iindawo.

● Ubuncinane funda amagama namabinzana asisiseko olwimi lwelizwe olundwendwe kulo.

● Ngaphambi kokuba uhambe yiya kuxilongwa. Qiniseka ukuba unesixa esaneleyo sawo nawaphi na amayeza afunekayo.

[Umfanekiso okwiphepha 10]

Ukuba kubakho ukungaqondani nentsapho olundwendwe lwayo, thetha nayo ngendlela ezolileyo