Khawuqwalasele Iinwele Zakho

ENYE incwadi ithi “Kubantu abakubudala obahlukahlukeneyo nakumaqela athile, iinwele zityhila okuthile ngomntu wazo.” Akumangalisi ke ngoko, ukuba abantu abaninzi benomdla wokugcina iinwele zabo zisempilweni yaye zibukeka.

UVukani! ubuze oomakhwekhwetha abane ekulondolozeni iinwele imibuzo eqhelekileyo ngokuyilwa kweenwele nangendlela yokuzilondoloza. Njengoko kuye kwabonakala, kuninzi okubandakanyekileyo ngeenwele zakho kunokuba sicinga.

Ukukhula Kweenwele Nokuwa Kwazo

Umbuzo: Zenziwe ngantoni iinwele?

Impendulo: Iinwele zineprotini engumcu ebizwa ngokuba yikeratini (keratin). Unwele ngalunye lukhula kwintunjana esentlonzeni ebizwa ngokuba yifollicle. Emazantsi entunjana nganye, kukho into ebizwa ngokuba yipapilla, yona enegazi elininzi. Le papilla ivelisa iiseli zeenwele ezithi zinyuke ngefollicle zize ziqine zibe lunwele.

Umbuzo: Kukho inkolelo yokuba iinwele zikhula ngokukhawuleza xa zichetywa. Ngaba oku kuyinyaniso?

Impendulo: Akunjalo. Bambi abantu bacinga ukuba iinwele, zondliwa ngumzimba njengokuba amasebe omthi esondliwa sisiqu somthi. Kodwa xa iinwele ziphumile entlonzeni, ziyinto efileyo. Ngoko ke, ukuphungula iinwele akukuchaphazeli ukukhula kwazo.

Umbuzo: Yintoni ebangela iinwele zibe ngwevu?

Impendulo: Kwinwebu engaphakathi ezinweleni kukho iseli enika iinwele umbala wazo. Njengoko ezi seli zisifa, iinwele ziyajika zibe ngwevu; le yinxalenye yokwaluphala. Ukuba neenwele ezingwevu ngaphambi kwexesha kunokubangelwa yimfuza okanye ukugula. Noko ke, yintsomi into yokuba iinwele ziba ngwevu ngexesha nje elifutshane. Iseli enika umbala weenwele ingaphantsi kwentlonze. Ngoko ke kufuneka ixesha elide ukuze iinwele ezingwevu zikhule (malunga neesentimitha ezisisi-1,25 ngenyanga) zize zibonakale entloko.

Umbuzo: Yintoni ebangela ukuba iinwele ziwe?

Impendulo: Ukuwa kweenwele kuyinxalenye yemvelo yomjikelo weenwele. Ngokomlinganiselo, wonke umntu uwelwa ziinwele ezingama-50 ukusa kwezingama-80 ngosuku. Kodwa impandla yamadoda yenziwa lufuzo yaye kubonakala ngathi yenziwa kukungalungelelani kwencindi yamadlala okubangela ukuba iinwele ziwe ngokupheleleyo. Ukuwelwa ziinwele okungaqhelekanga kubizwa ngokuba yialopecia.a

Umbuzo: Bambi bathi iinwele ziyimbonakaliso yempilo kabani. Ukhe wakuphawula oku?

Impendulo: Ewe. Phantsi kwentlonze, iinwele zondliwa ligazi. Ngoko ke, iinwele ezisempilweni zinokubonisa ukuba igazi elizondlayo lisempilweni. Noko ke, umntu otya ukutya okungenasondlo okanye ozifica ngotywala usenokuphawula ukuba iinwele zakhe ziba yephuyephu zize ziwe msinya, kuba kaloku igazi lakhe alizondli kakuhle iinwele zakhe. Ukuwelwa ziinwele okanye ukuba neenwele ezingomelelanga kusenokuba ngumqondiso wokugula okanye wokukhulelwa.

Ukugcina Intlonze Neenwele Zakho Zisempilweni

Umbuzo: Khawusichazele ngendlela yokuhlamba iinwele nentlonze ngesepha yeenwele.

Impendulo: Amava abonisa ukuba abantu abaliqela abanengxaki yokoma kwentlonze bahlamba intloko besebenzisa isepha yeenwele ngokufuthi kakhulu. Kakade ke, ioli esezinweleni zakho itsala ubumdaka ize igcine inkwethu yaye obo bumdaka bunokuvala imijelo ehambisa ioli eya kwiifollicles. Ngoko ukuhlamba iinwele zakho usebenzisa isepha yeenwele ngokuthe rhoqo kuyimfuneko. Kodwa ezi oli zemvelo zikhusela isikhumba sakho kwiintsholongwane ezinokuba yingozi zize zenze ukufuma okuyimfuneko. Ngokusoloko uzihlamba iinwele zakho ngesepha yeenwele, uvimba intlonze yakho le nwebu iyimfuneko yaye ubangela iingxaki ezifana nokoma kwentlonze. Inkoliso yeengcaphephe zeenwele zicebisa ukuba uzihlambe iinwele nanini na zimdaka. Abantu abaneenwele ezinamafutha kakhulu bafanele bazihlambe ngesepha yeenwele ngokufuthi ngakumbi kunabo baneenwele ezomileyo.

Xa uhlamba intloko ngesepha yeenwele, yiphulule ngobunono intlonze yakho. Oku kususa iiseli ezifileyo kwintlonze yakho yaye kwenza ukuba igazi elondla iinwele zakho lihambe ngendlela efanelekileyo. Khumbula ukuyihlamba ngokucokisekileyo isepha! Ukuba akukhange uyihlambe isepha ezandleni zakho, ulusu lwakho luya koma luze luchachambe. Ngokufanayo, ukuba isepha yokuhlamba iinwele ayisuswanga kakuhle, intlonze inokoma ize ibe nezikhokho.

Umbuzo: Kunokunyangwa njani ukoma kwentlonze?

Impendulo: Ngokusela amanzi amaninzi, nokutya ukutya okunesondlo. Oku kugcina ulusu lwakho lufumile kuze kondle igazi. Sebenzisa isepha yeenwele exutywe ngokulungeleleneyo, uze uyiphulule ngobunono rhoqo intlonze yakho. Bambi abantu basebenzisa amafutha okuthambisa iinwele angasukiyo xa uhlamba iinwele nezinye iintlobo zamafutha xa bethambisa intlonze yabo.

Ukulungisa Iinwele Zakho

Umbuzo: Yintoni umntu afanele ayikhumbule xa etyelele igcisa leenwele?

Impendulo: Ukuba ufuna ukutshintsha indlela ozilungisa ngayo iinwele zakho, phatha umfanekiso obonisa le ndlela ufuna zibe yiyo mhlawumbi ude uze nomfanekiso obonisa indlela ongayifuniyo. Yivakalise ngokucacileyo iminqweno yakho nexesha olungele ukulichitha unyamekela iinwele zakho suku ngalunye, kuba ezinye iindlela zokulungisa iinwele zifuna uchithe ixesha kuzo kunokuba kunjalo ngezinye. Khumbula ukuba ngokuqhelekileyo kuthabatha amatyelelo amabini okanye amathathu ukuze lowo ulungisa iinwele zakho azazi nokuze anxibelelane ngokukhululekileyo nawe. Ngoko ke unganikezeli ngokukhawuleza ukuba akazenzi ngendlela ofuna ngayo!

Oko Iinwele Zakho Zikutyhilayo

Ukunyanyekelwa kweenwele nokuzilungisa yenye yeendlela zokubonakalisa ubuntu bakho. Iinwele ziye zachetywa, zafakelwa, zolulwa, zaphothwa, zajikwa umbala, zaza zalungiswa ngeendlela ezahlukahlukeneyo ukuze zifanele iifashoni, iinkolelo zonqulo kwaneembono zasekuhlaleni nezobupolitika. Khawuqwalasele iinwele zakho. Yintoni eziyityhilayo ngawe? Iinwele ezisempilweni ezilungiswe kakuhle zimenza mhle umninizo yaye ziyathandwa ngabanye.

[Umbhalo osemazantsi]

[Imifanekiso ekwiphepha 26]

Ukutya izidlo ezinesondlo nokusela amanzi amaninzi kunokunceda ukunyanga intlonze eyomileyo

[Umfanekiso okwiphepha 26]

Ukuhlamba ngokufuthi gqitha ngesepha yeenwele kunokubangela ukuba intlonze yakho iphulukane neeoli ezikhuselayo

[Umfanekiso okwiphepha 26]

Ukuba neenwele ezingwevu kuyinxalenye yokwaluphala