Abantu Abaselula Bayabuza . . .

Ngaba UThixo Uyayiva Imithandazo Yam?

“Ndithandaza ngento yonke kuba uYehova ngumhlobo wam, yaye ndiyazi ukuba uya kundinceda xa ndinengxaki.”—Andrea.

UANDREA oselula uqinisekile ukuba uThixo uyayiva imithandazo yakhe. Kodwa asingabo bonke abantu abaselula abanentembelo enjalo. Abanye baziva bekude kakhulu kuThixo ukuba bangasondela kuye. Banokude bangaqiniseki enoba uThixo ubakhathalele kangangokuba angade abaphulaphule xa bethandaza.

Yintoni imfihlelo yomthandazo? Ngokulula nje, kukuba nobuhlobo bokwenene noThixo. Umdumisi wathandaza: “Abo balaziyo igama lakho baya kukholosa ngawe.” (INdumiso 9:10) Kuthekani ngawe? Ngaba umazi kakuhle uThixo kangangokuba unethemba lokuba uyayiva imithandazo yakho? Ngaphambi kokuba ufunde uye phambili, nceda uzame ukuphendula le mibuzo isebhokisini ethi “Umazi Kakuhle Kangakanani UThixo?” Mingaphi onokuyiphendula?

UMAZI KAKUHLE KANGAKANANI UTHIXO? Iimpendulo zikwiphepha 14

1. Ngubani igama likaThixo, yaye lithetha ntoni?

2. IBhayibhile ithi ziziphi iimpawu ezine eziphambili zikaThixo?

3. Yiyiphi indlela ebalaseleyo uThixo alubonakalisa ngayo uthando kubantu?

4. Sinokubunandipha njani ubuhlobo noThixo?

5. Sifanele sibe nasiphi isimo sengqondo esifanelekileyo xa sithandaza?

Ngaba uyakwazi ukuphendula eminye yale mibuzo ngoku, nangaphambi kokuba ulifunde lonke eli inqaku? Ngoko sele usazi okuninzi ngoThixo kunokuba inkoliso yabantu isazi. Noko ke, kusenokwenzeka ukuba iimpendulo zakho zityhila ukuba ufanele ufumane ulwazi olungakumbi ngaye, ukuze umazi ngokusondele ngakumbi. (Yohane 17:3) Unolo sukelo engqondweni, khawuhlolisise izinto ezimbalwa iBhayibhile esifundisa zona ‘ngoMphulaphuli wemithandazo.’—INdumiso 65:2.

UThixo Ungumntu Wokwenene

Okokuqala, iBhayibhile isinceda siqonde ukuba uThixo akangomandla nje athile azimele geqe. Ungumntu onegama elinguYehova. (INdumiso 83:18) NgesiHebhere elo gama lithetha ukuba “Ubangela Kubekho.” Unokuba yiyo nantoni na afuna ukuba yiyo ukuze aphumeze injongo yakhe. Amandla athile azimele geqe akanako ukwenza oko! Ngoko xa uthandaza, unokuqiniseka ukuba akuthethi namandla athile azimele geqe okanye nomoya. Uthetha nomntu, onokuyiphulaphula aze ayiphendule imithandazo yakho.—Efese 3:20.

Kungoko uDiana oselula esithi: “Ndiyazi ukuba nokuba ndiphi na, uYehova uya kundiphulaphula.” Ukuba unaloo ntembelo, uThixo ungowokwenene kuwe! IBhayibhile ithi “lowo uzayo kuThixo umele akholwe ukuba ukho.”—Hebhere 11:6.

Umthombo Wobulumko Namandla

UThixo unokusinceda kuba unamandla amangalisayo. Loo mandla akanamlinganiselo, njengoko ebonakaliswa bubukhulu nokuntsonkotha kommandla wendalo. IBhayibhile ithi uYehova uzazi zonke iinkwenkwezi ngamagama—nangona kukho amawaka ezigidi angenakubalwa! Ngaphezu koko, ungumthombo wamandla akwezo nkwenkwezi. (Isaya 40:25, 26) Ngaba oku akumangalisi? Yaye nangona ezi ngongoma zimangalisa, iBhayibhile ithi ‘zingamagqabantshintshi nje emisebenzi yakhe’!—Yobhi 26:14, INguqulelo YesiXhosa yowe-1996.

Kwakhona, khawucingisise ngobulumko bukaYehova obungenamlinganiselo. IBhayibhile ithi iingcamango zakhe “zinzulu kakhulu.” (INdumiso 92:5) Wadala abantu, ngoko ke usazi bhetele kunokuba thina sizazi. (INdumiso 100:3) Ngenxa yokuba wabakho “ukususela kwixesha elingenammiselo ukusa kwixesha elingenammiselo,” unamava angenamlinganiselo. (INdumiso 90:1, 2) Akukho nto angayaziyo.—Isaya 40:13, 14.

UYehova uwasebenzisa njani loo mandla nobulumko? Eyesi-2 yeziKronike 16:9 ithi: “Kuba, ngokubhekisele kuYehova, amehlo akhe asingasinga emhlabeni wonke ukuba ababonise amandla abo bantliziyo ziphelele kuye.” Akukho nanye ingxaki onokuba nayo uThixo angenakuyicombulula okanye akuncede uhlangabezane nayo. UKayla oselula ukhumbula oku: “Kutshanje, xa mna nentsapho yasekhaya besijamelene nobunzima, ndathandaza kuYehova, yaye ndivakalelwa kukuba uye wasinceda sakwazi ukunyamezela obo bunzima, iingxaki kunye neemvakalelo ebekuya kuba nzima ukuzinyamezela.” Xa uthetha noThixo, uya kumthombo wobulumko. Ayikho enye into enokukunceda ngaphezu koko!

UThixo Wokusesikweni Nothando

Kodwa wazi njani ukuba uThixo ufuna ukukunceda? Kuba uYehova ukhethe ukuzenza aziwe, kungekhona ngamandla akhe amakhulu okanye ngobulumko bakhe obunzulu okanye ngokusesikweni kwakhe okungaguqukiyo. Kunoko, uYehova waziwa ngokukhethekileyo ngophawu lwakhe lothando. Eyoku-1 kaYohane 4:8 ithi “uThixo uluthando.” Yaye lolo thando olubangela sithembe ukuba uyayiphendula imithandazo yethu. Eyona mbonakaliso yothando ibalaseleyo yaba kukunikela ngoNyana wakhe njengedini lentlawulelo ukuze sinandiphe ubomi obungunaphakade.—Yohane 3:16; 1 Yohane 4:9, 10.

Ngenxa yokuba uThixo eluthando, akufanele woyike ukuba usenokungakukhathaleli okanye aqhubane nawe ngolunya. IDuteronomi 32:4 ithi, “zonke iindlela zakhe zisesikweni.” Uthando lukaThixo luya kuqinisekisa ukuba uya kuphulaphula. Oku kusenza sizive sikhululekile ukumxelela ezona ngcinga zethu zobuqu neemvakalelo zethu.—Filipi 4:6, 7.

Ubuhlobo NoThixo

Enyanisweni, uYehova uyasimema ukuba sithethe naye. Akafuni ukuba singamazi. Ngokwahlukileyo koko, ukutyhubela imbali yoluntu uYehova ubemema abantu ukuba babe ngabahlobo bakhe. Phakathi kwabo bakhe banandipha ubuhlobo noThixo, ababeyikholisa intliziyo yakhe, yayingamadoda nabafazi, abaselula nabadala. Babequka abantu abanjengoAbraham, uKumkani uDavide kunye noMariya unina kaYesu.—Isaya 41:8; Luka 1:26-38; IZenzo 13:22.

Nawe unokuba ngomnye wabahlobo bakaYehova. Kambe ke, ubuhlobo obunjalo abuthethi ukuthi uThixo ufanele umgqale njengomthombo wamandla onokuthetha naye kuphela xa unqwenela okuthile okanye unengxaki. Imithandazo yethu ayifanele ibhekisele kuphela kwizinto esizifunayo. Ukuba sifuna uThixo abe ngumhlobo wethu, sifanele sibe nomdla kwiminqweno yakhe—kungekuphela nje eyethu—yaye sifanele senze ukuthanda kukaThixo. (Mateyu 7:21) Ngoko ke, uYesu wafundisa abafundi bakhe ukuba kwimithandazo yabo banikel’ ingqalelo kwizinto ezibalulekileyo kuThixo. Wathi: “Nize nithandaze ngale ndlela: ‘Bawo wethu osemazulwini, malingcwaliswe igama lakho. Mabufike ubukumkani bakho. Makwenzeke ukuthanda kwakho nasemhlabeni, njengasezulwini.’” (Mateyu 6:9, 10) Imithandazo yethu ikwafanele izaliswe yindumiso nombulelo kuThixo!—INdumiso 56:12; 150:6.

Sekunjalo, singaze sicinge ukuba iimfuno zethu okanye izinto ezibalulekileyo kuthi zincinane kakhulu okanye akubalulekanga ukuba sithandaze ngazo. USteve uthi: “Nangona ndizama ukumxelela yonke into, maxa wambi ndivakalelwa kukuba andifanele ndimkhathaze uThixo ngezinto ezingabalulekanga.” Xa uqalisa ukuvakalelwa ngaloo ndlela, zama ukukhumbula oko uYesu wakufundisa abafundi bakhe: “Oongqatyana abahlanu bathengiswa ngeengqekembe ezimbini ezixabiso lincinane, akunjalo? Kanti akukho namnye kubo olibalekayo phambi koThixo. . . . Musani ukuba noloyiko; nixabiseke ngaphezu koongqatyana abaninzi.” (Luka 12:6, 7) Ngaba oku akukhuthazi?

Ngoko, kulula ukubona ukuba okukhona uye usazi ngoYehova, kokukhona uya kushukumiseleka ukuba usondele kuye ngomthandazo yaye kokukhona uya kuba nentembelo yokuba uYehova unako yaye uya kukunceda. Ngoko ke, ufanele ube nasiphi isimo sengqondo xa usondela kuThixo ngomthandazo? Ufanele ube nentlonelo, uthobeke uze ungazingci. Ngaba ucinga ukuba likho igosa likarhulumente apha emhlabeni ebeliya kukuphulaphula ukuba ubucela into ngekratshi okanye ngokungenantlonelo? Ngoko akufanele umangaliswe kukuba uYehova alindele ukuba uhlonele yena nemilinganiselo yakhe ngaphambi kokuba aphendule imithandazo yakho.—IMizekeliso 15:29.

Amawaka abantu abaselula aboyikayo uThixo bafunde ukuthulula iintliziyo zabo kuye. (INdumiso 62:8) UBrett uthi: “Xa uYehova ephendula imithandazo yam, kuyandikhuthaza ukwazi ukuba usengumhlobo wam.” Kuthekani ngawe? Unokubunandipha njani ubuhlobo obufanayo noThixo? AmaKristu amabini aselula agqabaze ngale ndlela ilandelayo:

URachel: “Ukuze ndisondelelane noYehova, ndivakalelwa kukuba kufuneka ndilifunde nzulu iLizwi lakhe, kwaye ndizama ukuhlakulela umdla wofundisiso olunjalo.”—1 Petros 2:2.

UJenny: “Ndivakalelwa kukuba okukhona usiba nesabelo enkonzweni yakhe, kokukhona uziva usondele kuYehova.”—Yakobi 4:8.

Ngaba wakha wacinga ngendlela ekuyingenelo ngayo ukuthandaza? Omnye umKristu oselula uthi: “Bendiya kuziva ndisondele kuThixo ukuba ubenokuthetha nam okanye andithumelele umyalezo.” Njengoko uYehova engasiphenduli ngokuvakalayo xa sithandaza, umthandazo usinceda ngayiphi indlela? Oku kuza kuxutyushwa kwinqaku elilandelayo.

[Ibhokisi ekwiphepha 14]

Iimpendulo zemibuzo ekwiphepha 12

1. NguYehova. Lithetha ukuba “Ubangela Kubekho.”

2. Luthando, amandla, okusesikweni nobulumko.

3. Wathumela okuphela koNyana amzeleyo, uYesu, ukuba aze kusifela.

4. Ngokungaxhalabi zizilangazelelo zethu nje kuphela kodwa ngokuba nomdla ekuthandeni kukaThixo nangokukwenza.

5. Sifanele sithobeke, sihlonele size singabi ngabazingcayo.

[Imifanekiso ekwiphepha 13]

Ukufundisisa iBhayibhile nokufunda kwindalo kuya kukunceda umazi ngakumbi uThixo