Imbono YeBhayibhile

Ngaba Kuphosakele Ukuzila?

“NGAPHEZU KOKO, BAZALWANA, ASIFUNI UKUBA NINGAZI NTO NGABO BALELE EKUFENI; UKUZE NINGABI LUSIZI NJENGABO BANGENATHEMBA.”—1 TESALONIKA 4:13.

IBHAYIBHILE inika ithemba ngabo bafileyo. Ukuvusa kukaYesu abantu, kuquka neemfundiso zakhe, zalatha kwixesha apho abafileyo beya kuvuselwa ebomi. (Mateyu 22:23-33; Marko 5:35, 36, 41, 42; Luka 7:12-16) Lifanele lisichaphazele njani eli themba? Amazwi ompostile uPawulos acatshulwe ngasentla abonisa ukuba eli themba linokumomeleza ubani xa efelwe ngumntu amthandayo.

Ukuba ukhe wafelwa ngumntu omthandayo, ngokungathandabuzekiyo ukhe wakuva ukukhathazeka okuhambisana nentlungu enjalo. Kwabanye kuthabatha iinyanga okanye iminyaka ukuze bakwazi ukujamelana nokulahlekelwa okunjalo. UTheresa, owafelwa ngumyeni achithe naye iminyaka engama-42 emva kotyando lwentliziyo, uthi: “Ndandothukile kakhulu! Kuqala ndandisoyika kakhulu. Kwaza kamva kwalandela intlungu engathethekiyo eyakhula ngokukhawuleza njengoko ixesha lalihamba. Ndalila gqitha.” Ngaba ukuvakalelwa ngaloo ndlela kubonisa ukuba akunalukholo kwisithembiso sikaYehova sokuvusa abafileyo? Ngaba amazwi kaPawulos abonisa ukuba kuphosakele ukuzila?

Imizekelo YeBhayibhile Yabantu Abazilayo

Iimpendulo zaloo mibuzo sizifumana ngokuhlolisisa imizekelo eseBhayibhileni yabantu abazilayo. Kwizihlandlo ezininzi ukufa kwelungu lentsapho elisondeleyo kwakulandelwa lixesha lokuzila. (Genesis 27:41; 50:7-10; INdumiso 35:14) Iimvakalelo ezazihambisana noku kuzila ngokufuthi zazisiba nzulu kakhulu.

Khawuhlolisise indlela amanye amadoda okholo awazila ngayo xa kwakufe othile amthandayo. Ngokomzekelo, uAbraham wayenethemba elomeleleyo lokuba uThixo wayenokubavusa abafileyo. (Hebhere 11:19) Nangona wayenethemba elinjalo, xa umfazi wakhe wafayo, waya “kumenzela isijwili uSara, wamlilela.” (Genesis 23:1, 2) Xa oonyana bakaYakobi baxoka baza bamxelela ukuba unyana wakhe amthandayo uYosefu ufile, uYakobi “wazikrazula iingubo zakhe zokwaleka . . . waza waqhubeka emzilele unyana wakhe.” (Genesis 37:34, 35) Nasemva kweminyaka emininzi, ingcinga yokufa konyana wakhe yayimkhathaza kakhulu uYakobi! (Genesis 42:36-38) UKumkani uDavide naye wayebonakala ekuhleni ukuba uxheleke umphefumlo kakhulu kukufa koonyana bakhe uAmnon noAbhisalom. Nangona babemkhathaza uDavide nentsapho yakhe, babengoonyana bakhe, yaye ukufa kwabo kwamenza lusizi kakhulu.—2 Samuweli 13:28-39; 18:33.

Maxa wambi, uhlanga lakwaSirayeli lonke lwaluzila, njengoko lwenzayo xa kwafa uMoses. IDuteronomi 34:8 isixelela ukuba amaSirayeli amlilela iintsuku ezingama-30.

Okokugqibela, kukho umzekelo kaYesu Kristu. Kwafa umhlobo wakhe osenyongweni uLazaro. Yaye xa uYesu wabona indlela oodade bakaLazaro, uMarta noMariya, kunye nabahlobo babo ababelila ngayo, “wagcuma emoyeni wakhathazeka.” Nangona wayesazi ukuba kungekudala, wayeza kumvusa umhlobo wakhe, “zathi waxa iinyembezi” kuye. UYesu wayebathanda abahlobo bakhe abasenyongweni uMarta noMariya. Ngoko wachukumiseka kakhulu xa wababona bekhathazekile kukufa komnakwabo.—Yohane 11:33-36.

UAbraham, uYakobi, uDavide kunye noYesu babethembele kuYehova kunye nezithembiso zakhe, kodwa bakhathazeka. Ngaba ukuzila kwabo kwakuluphawu lokuba babuthathaka ngokomoya? Ngaba ukukhathazeka kwabo kwakubonisa ukuba abanathemba kuvuko? Akunjalo konke konke! Ukuzila yindlela eqhelekileyo esisabela ngayo xa umntu esimthandayo esifa.

Isizathu Sokuzila

Yayingeyonjongo kaThixo ukuba abantu bafe. Injongo kaYehova yantlandlolo, njengoko yaxelelwa uAdam noEva, yayikukuba umhlaba wenziwe iparadesi entle ezaliswe yintsapho enothando, neyonwabileyo. Ukufa kwakuza kubakho kuphela xa isibini sokuqala sikhetha ukungamthobeli uYehova. (Genesis 1:28; 2:17) Okubuhlungu kukuba, uAdam noEva abazange bathobele, yaye ngenxa yokungathobeli, “ukufa kwasasazeka kubo bonke abantu.” (Roma 5:12; 6:23) Ngaloo ndlela ukufa lutshaba olukhohlakeleyo olungazange lucetywe.—1 Korinte 15:26.

Ngoko ke, kusengqiqweni ukuba isiganeko esingeyomvelo sokufa komntu osenyongweni sibangele intlungu enzulu kwabo bachaphazelekayo. Sishiya isikhewu esikhulu ebomini babo. UTheresa, umhlolokazi okhankanywe ngasentla, wathi ngokuphathelele umyeni wakhe: “Ndiqinisekile ukuba ndiza kumbona eluvukweni, kodwa ndimkhumbula kakhulu. Leyo yeyona nto ibuhlungu.” Ukufa komzali kunokusikhumbuza ukuba nathi siza kufa. Ukufa komntu oselula kusenza buhlungu ngokukhethekileyo ngenxa yentlungu yokungabuphili ngokwaneleyo ubomi.—Isaya 38:10.

Ewe, ukufa asinto yokwemvelo. Intlungu ebangelwa kuko yinto emele ilindelwe, yaye uYehova akakugqali ukuzila njengokungabi nakholo kuvuko. Njengoko siye sabona kumzekelo ka-Abraham, uYakobi, uDavide, uhlanga lakwaSirayeli kunye noYesu, ukuyibonakalisa ngokuphandle intlungu esezintliziyweni zethu akubonisi ukuba siyasilela ngokomoya.a

Noko ke, nangona njengamaKristu sisiba sentlungwini ngenxa yokufa, asikhathazeki “njengabo bangenathemba.” (1 Tesalonika 4:13) Asibandakanyeki kwiindlela zokuzila ezibaxiweyo kuba siyayazi imeko yabafi. Siyazi ukuba abakho sentlungwini okanye abanxunguphalanga kodwa bakwimeko efanayo naleyo yokulala ubuthongo obunzulu, obuzolileyo. (INtshumayeli 9:5; Marko 5:39; Yohane 11:11-14) Kwakhona sinentembelo epheleleyo yokuba uYesu, “uvuko nobomi,” uya kwenza ngokwesithembiso sakhe sokuba uya kuvusa “bonke abo bakumangcwaba enkumbulo.”—Yohane 5:28, 29; 11:24, 25.

Ngoko ke, ukuba usentlungwini ngeli thuba, thuthuzeleka kukwazi ukuba uYehova uyayiqonda intlungu yakho. Ngamana olu lwazi nethemba lakho ngovuko lungayithomalalisa intlungu okuyo luze lukuncede ukwazi ukujamelana nokulahlekelwa kwakho ngothile.

[Umbhalo osemazantsi]