Imbono Yebhayibhile

IFêng Shui—Ngaba Iwalungele AmaKristu?

EASIA, amangcwaba akhethwa ngokuvisisana nayo. Izakhiwo zenziwa zize zihonjiswe ngokuvisisana nayo. Kuthengwa umhlaba uze uthengiswe ngokuvisisana nayo. NgesiTshayina kuthiwa yifêng shui, uhlobo oluthile lokuvumisa. Nangona ifêng shui ibithandwa kakhulu eAsia kangangeenkulungwane, kwiminyaka yakutshanje iye yanwenwela nakumazwe aseNtshona. Amanye amagcisa okwakha asebenzisa yona ekwenzeni oorhec’ izulu, iiofisi namakhaya. Abanye abafazi abangaphangeliyo bayisebenzisela ukuhombisa amakhaya abo. Iincwadi ezininzi namaziko eInternet ayayikhuthaza yaye afundisa ngayo.

Kutheni ithandwa kangaka? Ngokutsho komnye oyimelayo, ifêng shui “inokuphucula indlela yokuphila, impilo, iphucule imitshato okanye ubuqabane, ize nobutyebi noxolo lwengqondo.” Ngoxa konke oko kubonakala kunomtsalane, luyintoni olu qheliselo, yaye afanele alujonge njani amaKristu?

Yintoni?

Amagama esiTshayina athi fêng shui ngokoqobo athetha “amanzi-umoya.” Imvelaphi yefêng shui ibuyela umva iye kutsho kumawakawaka eminyaka xa iintanda-bulumko zaseMpuma zathi zavela. Phakathi kwezi kwakukho inkolelo ebizwa ngokuba yiyin neyang (ubumnyama nokukhanya, ubushushu nengqele, okufanelekileyo nokungafanelekanga). Ingcamango yeyin neyang yaxutywa nengcamango yechʼi, ngokoqobo ethetha “umoya.” Iyin, iyang nechʼi kwakunye nezinto ezintlanu ezisisiseko, umthi, umhlaba, amanzi, umlilo nesinyithi, zibumba inxalenye ebalulekileyo yengcamango yefêng shui. Abo bazinikele kwifêng shui bakholelwa kwelokuba iintambo zamandla zikho kuwo wonke umhlaba. Usukelo lwabo kukukhangela iindawo apho la mandla, okanye ichʼi yomhlaba nesibhakabhaka ifumana khona ukulungelelana. Oku kwenziwa ngokutshintsha ukuma komhlaba okanye ngokwenza utshintsho kwisakhiwo ngokwaso okanye kwisiza esithile. Ukwenza olu lungelelwano kumele kuze nethamsanqa kwabo basebenza okanye bahlala apho.

Ngokuqhelekileyo, abo bangamachule efêng shui bajonga ikhampasi yokuvumisa.a Le yikhampasi encinane enemagnethi ebekwa phakathi kwibhodi yokuvumisa ngeenkwenkwezi. Le khampasi inezangqa, ezahlulwe yimigca. Le khampasi yokuvumisa inenkcazelo ephathelele izinto ezifana namakroza, amaxesha onyaka nawemijikelo yelanga. Xa kuhlolwa isiza okanye isakhiwo, kuye kujongwe le khampasi. Ichule lefêng shui lijonga apho inaliti yale khampasi idibana khona nemigca nezangqa yaye emva koku liyakwazi ukubona ukuba yintoni efunekayo ukuze “kulungiswe” esi siza.

Iindlela ezimi ngayo izakhiwo ezikufutshane, imijelo yamanzi, iinkqubo zogutyulo kwanokufakelwa kweefestile neengcango esakhiweni kusenokujongwa xa kucingwa ngokulungelelaniswa kwesiza. Ngokomzekelo, eKhanada unovenkile waxhoma isipili emva kocango lwangasemva lwevenkile yakhe ukuze “alungise” indlela ezimi ngayo iingcango zayo. Umvumisi ngokufanayo unokuncomela ukuba kususwe izityalo okanye ifanitshala, kutshintshwe umfanekiso, kongezelelwe iintsimbi zomoya, okanye kubekwe ichibi leentlanzi ukuze kuzinziswe isakhiwo okanye igumbi.

Imbono YamaKristu

Ngokucacileyo, imizi yogcino-zincwadi emininzi idibanisa iincwadi ezithetha ngefêng shui neencwadi zokuvumisa ngeenkwenkwezi nokuxel’ ithamsanqa. Enyanisweni, iWebster’s Ninth New Collegiate Dictionary ithetha ngayo “njengokuvumisa usebenzisa amanani okanye imigca okanye iinkalo zokuma komhlaba.” (Akekeliswe sithi.) Ngenxa yoko, kwaziwa ngokubanzi ukuba ifêng shui nokuvumisa ziindlela zokuxel’ ithamsanqa. Ziquka ukusebenzelana nemimoya, zinto ezo ezingekho ntsha kuluntu.

Xa amaSirayeli ayishiyayo iYiputa aza ekugqibeleni angena kwilizwe laseKanan kwinkulungwane ye-15 B.C.E., ukuvumisa kwazo zonke iintlobo kwakwesamele kuwo omabini la mazwe. Esebenzisa uMoses, uThixo wathi, njengoko kubhalwe kwiDuteronomi 18:14: “Ezi ntlanga uhlutha ilizwe lazo zaziphulaphula abo baqhelisela umlingo nabavumisi; kodwa wena, akakunikanga nantoni na enjengaleyo uYehova uThixo wakho.” Iindlela ezininzi zokuvumisa eYiputa naseKanan zazivela kwiBhabhiloni yamandulo. Xa uYehova wadubaduba ulwimi lwabantu baseBhabhiloni, banwenwela kwezinye iindawo, behamba noqheliselo olunxulumene nokuvumisa kwaseBhabhiloni nokusebenzelana nemimoya.—Genesis 11:1-9.

Ngokungqongqo nangokuphindaphindiweyo uYehova uThixo walumkisa uSirayeli ukuba angavumisi njengezinye iintlanga, esithi: “Maze kungafunyanwa namnye kuwe . . . ovumisayo, noqhelisela umlingo, nohlaba izihlabo . . . Kuba uYehova uyamcekisa wonke ubani ozenzayo ezi zinto, yaye kungenxa yezi zinto zicekisekayo le nto uYehova uThixo wakho azigxothayo phambi kwakho.” (Duteronomi 18:9-12; Levitikus 19:26, 31) Abavumisi babebulawa ngaphandle kwamathandabuzo.—Eksodus 22:18; Levitikus 20:27.

Kutheni ukuvumisa kwakungafunwa kangaka nje? IZenzo 16:16-19 zibalisa ngebhinqa ‘elalinedemon yokuvumisa.’ Ewe, ukuvumisa kunxulumene ngokusondeleyo nobudemon. Ukuvumisa nangayiphi na indlela kunokukusondeza kuSathana needemon zakhe! Oko kunokukwenzakalisa ngokomoya.—2 Korinte 4:4.

Ezinye iindlela ezithandwayo zokuhombisa nokulungisa umhlaba, enoba zezaseMpuma okanye zezaseNtshona, kusenokwenzeka ukuba ekuqaleni zaziphenjelelwa lunqulo lobuxoki njengefêng shui. Noko ke, amaxesha amaninzi, ezo ndlela zisenokuba azisenanto yakwenza nonqulo. Sekunjalo, ibiya kuba kukwaphulwa okucacileyo komthetho kaThixo ukusebenzisa ifêng shui ukuxela kusengaphambili ikamva okanye ukuzisa ithamsanqa okanye impilo entle. Ukwenza oko bekuya kuba kukwaphula umyalelo ocacileyo weBhayibhile wokuphepha ukuchukumisa nantoni na “engahlambulukanga.”—2 Korinte 6:14-18.

[Umbhalo osemazantsi]

[Umfanekiso okwiphepha 15]

Ikhampasi yokuvumisa

[Inkcazelo]

Pages 2 and 15: Hong Kong Tourism Board