Iqwarhashe—Ihashe Lasendle LaseAfrika

NGUMBHALI KAVUKANI! EAFRIKA

KHAWUKHANGELE amaqwarhashe amalunga newaka egqabadula engenalo noluncinane uvalo kumadlelo aseAfrika. Nezo mpango zimibalabala zihla zinyuka njengoko iintamo zazo ezingqebesha zilengetyeka zihambisana nezingqi zazo ezinamandla. Isandi sokubetha kwazo inqina sitsho ngolwandile kuloo mathafa. Emva kwazo kuvuka umpongo lothuli olubomvu olubonakala kangangeekhilomitha eziliqela. Zibaleka zikhululekile zijambatyeka, zingaziva zibophelelekile nangayiphi na indlela.

Ingathi kukho le nto izixeleleyo singayiboniyo, nazo zithob’ isantya, zada zema ke. Ngaloo mazinyo azo omeleleyo nangqingqisholo, zixhwitha ingca eyomileyo. Uphaphile lo mhlambi, uhlal’ uhlale uphakamise iintloko, uphulaphule ujoje nomoya. Iindlebe zawo zisichol’ emoyeni isandi esitsholo kude somgqumo wengonyama, nto leyo ezitsho zinxube. Azisifuniseli eso sandi. Exhom’ iindlebe, nengca sel’ ithe xhonkxosholo emilonyeni, la maqwarhashe ajongisa ngakwicala ovela kulo lo mgqumo. Engarhaneli bungozi bungako, ayagoba aqhubeke nengca kwakhona.

Lithi lakuthand’ ukuqina ilanga, aphinde av’ endleleni. Ngoku la mahashe asendle arhogole amanzi ngasemlanjeni. Kwiindonga eziphakamileyo, ayema aze aqondele kumanzi angabaleki kangako nangqoqo, efutha kwaye egquba kuloo mhlaba umgqubagqubane. Ithuku lithatha libeka, ayaqonda ukuba kusenokubakho ingozi kuloo manzi acwengileyo omlambo. Kodwa unxano aluva nto zitshoyo, ngoko amanye aqalisa ukutyhuluba. Ngomkhulu wona umtsi, nango esenjenjeya ukusinga eziphelweni zomlambo. Ngalinye kuwo lisela kutsho kuthi qabu, lize lenjenjeya ukubuyela emathafeni.

Kuthi kwakuhlwa lo mhlambi uthi chu ngcembe phakathi kwelo dobo. Ethiwe gubungu lithinzi lokutshona kwelanga, ubona ubuhle bawo, obuphelekwa bubuhle bamadlelo aseAfrika.

Amibalabala Kwaye Anobuhlobo

Amaqwarhashe asoloko esenza into enye mihla le. Ukusoloko efuna ukutya namanzi kuwagcina esendleleni. Njengoko esitya emathafeni, amaqwarhashe ayabengezela equm-qum kananjalo, ufele lwawo olumibalabala luthe nca kuloo mizimba yawo yomeleleyo. Imibala yeqwarhashe ngalinye imi ngendlela efana yodwa kanti abanye bathi, awakho amabini anemibala emi ngendlela efana ncam. Umbala omhlophe othe qhakra nemigca emnyama iwenza ahambe odwa kwezinye izilwanyana ezihlala emathafeni. Kanti imbonakalo yawo inomtsalane kwaye ibonisa ubuhle bemvelo beAfrika ngokwayo.

Amaqwarhashe anobuhlobo gqitha ngemveli. Ezi zilwanyana zibumba amaqhina awomeleleyo aqhubeka ekho ngalo lonke ixesha lokuphila kwawo. Nangona umhlambi ubunjwa ngamawakawaka, wahlulahlulwe waziintsatshana ezibunjwa yinkunzi neemazi zayo. Le ntsatshana ilondoloza ucwangco ngokuthi ngokungqongqo yahlulahlule amalungu ayo ngokwezintlu. Imazi engutshotsh’ entla yiyo egqibayo ngokuba intsapho iya ngakweliphi icala. Iyakhokela, ngoxa ezinye iimazi namankonyane azo ziyilandela zenze umgca ngokwezintlu zazo. Noko ke, ekugqibeleni, iba yinkunzi ephetheyo. Ukuba ifuna intsapho yayo ibheke kwelinye icala, iya kwimazi ekhokelayo iyigudlele kwelinye icala.

Amaqwarhashe ayathanda ukukhothana, kwaye kungeyonto inqabileyo nokuwabona ephululana kwaye esithana nqamfu nqamfu iimbambo ezi, amagxa nomqolo. Kuyabonakala ukuba ukukhothana oku komeleza amaqhina phakathi kwezi zilwanyana kwaye kuqala amankonyane eseneentsukwana ezelwe. Ukuba akukho lungu limbi lentsapho lokukhotha, iqwarhashe elirhawuzelelwayo lizinceda ngokuziqengqa eluthulini okanye lizikhuhle emthini, kwisiduli seentubi, okanye kwenye nje into emileyo.

Ukusinda NgezikaSibi

Ubomi beqwarhashe busengozini. Iingonyama, izinja zasendle, amaxhwili, amahlosi neengwenya zikugqala njengokudla cofileyo ukufumana esi silwanyana sibunzima buziikhilogram zingama-250. Iqwarhashe linokubaleka kangangeekhilomitha ezingama-55 ngeyure kodwa maxa wambi lifunyanwa lingalindelanga ngamarhamncwa aqubulayo. Iingonyama ziyawaxhwarhela, iingwenya zizithi qhushe ngaphantsi kwamanzi anodaka, kanti amahlosi wona azifihla ebumnyameni.

Ukukhuseleka kwamaqwarhashe kuxhomekeke ekuphapheni nakumalungu omhlambi xa ewonke. Ngoxa amanye elele ebusuku, kusoloko kukho la ahleliyo, ephulaphule kwaye eliliso. Ukuba iqwarhashe lithi ntla ngerhwamncwa lisiza, liyafutha ngelokwenza umqondiso kuwo wonke umhlambi. Ngokufuthi, xa elinye ilungu lomhlambi ligula okanye lilidala ukuba lingabaleka, amanye amaqwarhashe athoba isantya okanye alinde de esi silwanyana singenamendu sidibane nomhlambi kwakhona. Xa kukubi, ngokungenaloyiko inkunzi ima phakathi kwerhamncwa neemazi, ilulume ize ilukhabe utshaba ukuze inike umhlambi ixesha lokubaleka.

Olo manyano lwentsapho luboniswa sisiganeko esiphawulekayo esenzeka kwithafa laseSerengeti eAfrika, njengoko sabonelwa sisazi ngezemvelo uHugo van Lawick. Xa wayebalisa ngendlela ugxudululu lwezinja zasendle olwaqalisa ngayo ukuleqa umhlambi wamaqwarhashe, wasibalisela ngendlela ezi zinja ezakwazi ngayo ukutyumba imazi yeqwarhashe, inkonyane layo, nelinye elinonyaka ubudala. Njengoko omnye umhlambi wawugqabadula ubheka phaya, unina neli linonyaka ubudala ngobukroti balwa nezi zinja. Akuzange kube kudala ezi zinja zakhulelwa buburhalarhume, kwaye le mazi kunye neli qwarhashe linonyaka ubudala zaqalisa ukudinwa. Kwabonakala ngathi ngokuqinisekileyo izinto ziza kukhawuleza ziqoshele. UVan Lawick uthi xa ekhumbula le meko inganiki themba: “Ngequbuliso ndeva umhlaba usithi ndi, kwaye ndathi ndakujonga emacaleni ndimangalisiwe ndabona amaqwarhashe alishumi esiza engxamile. Kamva lo mhlambi warhangqa le mazi namankonyane ayo aza ewonke ajika abuyela apho ebevela la alishumi. Ezi zinja zawaleqa malunga neemitha ezingama-50 kodwa azizange zikwazi ukuwuqhekeza lo mhlambi zaza zaphelelwa kungekudala.”

Ukukhulisa Intsapho

Imazi yeqwarhashe iyalikhusela inkonyane layo elisandul’ ukuzalwa yaye ekuqaleni iyalikhetha kwamanye amalungu omhlambi. Ngeli xesha libalulekileyo lokuzikhetha, eli nkonyane liyakwazi ukusondelelana nonina. Eli nkonyane liselula lifunda imigca emnyama nemhlophe kanina efana yodwa. Emva koko, liya kuva xa libizwa ngunina, live ivumba lakhe lazi nemibalabala yakhe yaye alisayi kuya nakweyiphi na imazi.

Amankonyane asandul’ ukuzalwa akazalwa enemigca emhlophe namnyama ecacileyo yabazali bawo. Eyawo imigca iba bomvu bumdaka kwaye iya isiba mnyama njengoko ekhula. Kumhlambi omkhulu, amankonyane aphuma kwiintsapho ezahlukeneyo ayahlanganisana ukuze adlale. Ayabaleka aleqane, ekhabalaza ebaleka phakathi kwalawo madala athi nawo maxa wambi adlale nawo. Ejakatyula ngaloo milenzana yawo ityokololwana, la mankonyane adla ngokuleqa iintaka nezinye izilwanyana ezincinane. Amaqwarhashe amancinane, neengotyongotyo zawo zemilenze, amehlo amnyama amakhulu, nezikhumba zawo ezikhazimlayo nezithambileyo, azizilwanyana ezihle nezithandekayo ekumnandi ukuzibukela.

Adlamkile Kwaye Ayamangalisa

Namhlanje imihlambi emikhulu yamaqwarhashe isabonakala ibaleka ngodlamko ikhululekile kumadlelo amakhulu aseAfrika. Ubona nje ummangaliso ohambayo.

Ngubani obengayi kuvuma ukuba iqwarhashe, elinemigca emnyama nemhlophe efana yodwa, elinyaniseke gqitha kwintsapho yalo, lidlamkile kwaye likhululekile, lisisidalwa esichukumisayo nesibangela umdla? Ukwazi ngeso silwanyana kuphendula umbuzo owabuzwa kumawaka eminyaka eyadlulayo: “Ngubani na owathumela iqwarhashe likhululekile?” (Yobhi 39:5) Impendulo izicacele. NguMyili wazo zonke izidalwa eziphilayo, uYehova uThixo.

[Ibhokisi ekwiphepha 14]

Kutheni Iqwarhashe Linemigca?

Abo bakholelwa kwindaleko bakufumanisa kunzima ukuchaza imigca yeqwarhashe. Abanye bacinga ukuba isebenza njengesilumkiso. Noko ke, licacile elokuba iingonyama namanye amarhamncwa amakhulu akayoyiki kwaphela imigca yeqwarhashe.

Abanye baye bathi le migca yenzelwe umtsalane ongokwesini. Noko ke, ekubeni onke amaqwarhashe enemigca efanayo ingapheleliselwanga kwisini esithile, kusenokuba akuchananga oku.

Enye into edla ngokuthethwa kukuba imigca emhlophe nemnyama yenzelwa ukuthothisa ubushushu belanga elitshisayo laseAfrika. Kodwa kutheni ezinye izilwanyana zingenayo imigca?

Enye into ethanda ukuthethwa yile yokuba imigca yeqwarhashe isebenza njengesigqubuthelo sokuzifihla. Izazinzulu ziye zafumanisa ukuba ubushushu bamathafa aseAfrika buyenza ibe luthuzuli imibala yeqwarhashe, nto leyo eyenza kube nzima ukulibona mgama. Noko ke, eso sigqubuthelo sokuzifihla somgama omde besingasayi kusebenza, ekubeni iingonyama ezilolona tshaba luphambili lweqwarhashe, zihlasela kufutshane kuphela.

Kwakhona kuye kwathiwa isixaka-xaka esibalekayo semizimba enemigca yamaqwarhashe siyazibhida iingonyama ezizingelayo, izenza zingakwazi ukujongana nesilwanyana esinye. Kodwa, enyanisweni uhlolisiso lwezilwanyana zasendle luye lwabonisa ukuba iingonyama zinobuchule kwaye ziyaphumelela ekuhlaseleni amaqwarhashe njengokuba kunjalo xa zihlasela ezinye izilwanyana.

Enye into ephinda ixake kuyo yonke le nto kukuba imigca yeqwarhashe maxa wambi isenokulifaka enkathazweni. Ebusuku, kumathafa akhanyiswe yinyanga, imigca yeqwarhashe emhlophe nemnyama ilenza libonakale kunezinye izilwanyana ezinombala omnye. Ekubeni ngokuqhelekileyo iingonyama zizingela ebusuku, oko kubonakala kulibeka egcakasini.

Ngoko layifumana phi ke imigca iqwarhashe? Eyona nto inokusenza siyiqonde kakuhle le nto ngala mazwi alula: “Sisandla sikaYehova esenze oku.” (Yobhi 12:9) Ewe, uMdali wayila izidalwa ezisemhlabeni zaneempawu ezimangalisayo wazinika ubomi ngezizathu umntu angenakuzazi. Ukudalwa ngendlela emangalisayo kwezinto eziphilayo kufeza enye injongo. Kubangela ulonwabo, uyolo novuyo ezintliziyweni zabantu. Enyanisweni, ubuhle bendalo buye bachukumisa abaninzi namhlanje kanye njengokuba kwaba njalo kuDavide mandulo, owabhala wathi: “Hayi indlela emininzi ngayo imisebenzi yakho, Yehova! Yonke uyenze ngobulumko. Uzele umhlaba yimveliso yakho.”—INdumiso 104:24.