Izinto Ezininzi Ezifanele Zenziwe Ngoomama
4:50 kusasa. UAlex, oselusana elila yaye esozela ukhwela ebhedini kwicala likaHelen, unina. Abanye abantwana ababini—uPenny (5) noJoanna (12)—kunye nomyeni wakhe, uNick, balele. UHelen ukhwelisa uAlex ebhedini aze amncancise. Emva koko uphelelwa bubuthongo.
5:45 kusasa. UHelen uyachwechwa aye ekhitshini, azenzele ikofu aze afunde.
6:15–7:20 kusasa. UNick uyavuka. UHelen uvusa uPenny noJoanna, enze isidlo sakusasa aze enze eminye imisebenzi yasendlwini. Ngeye-7:15, uNick uya emsebenzini, aze ase uJoanna esikolweni. Unina kaHelen uyafika eze kugcina usana olunguAlex.
7:30 kusasa. UHelen usa uPenny kwisikolo sabantwana abancinane. Indlela eya emsebenzini inika uHelen ithuba lokucingisisa ngocelomngeni lokuba ngumama. Uthi: “Ngowona msebenzi unzima ndakha ndawenza.”
8:10 kusasa. UHelen uhleli edesikeni yakhe enomsebenzi omninzi afanele awenze. Uxhalabele ukuba xa enokuphinda akhulelwe kusenokwenzeka aphulukane nomsebenzi wakhe. Yaye intsapho yakhe iyawufuna umvuzo owongezelelekileyo.
10:43 kusasa. Emva kokuba uHelen ebeke umnxeba phantsi—ebenikw’ ingxelo kuwo ngokuphathelele abantwana bakhe—ugxa wakhe emsebenzini uNancy umthuthuzela ngelithi: “Ubakhulisa ngendlela entle kakhulu.” Iinyembezi ziyazehlela kuHelen.
12:05 emva kwemini. Ephethe iqebengwana, uHelen ukhumbula iimini ezingaphambi kokuba kuzalwe intombi yakhe yokuqala. Ngezo mini, wayenezinto ezininzi awayeceba ukuzenza “ngexesha lakhe lokuphumla.” Kodwa ekugqibeleni uthi: ‘Izinto ziyenzeka!’
3:10 emva kwemini. Emva kokutsalelwa umnxeba izihlandlo eziliqela exelelwa ngemidlalo yobuntwana eyenziwa nguAlex ekhaya, uHelen uthetha ngolwalamano olukhethekileyo analo nabantwana bakhe, uthi: “Akukho mntu ndakha ndamthanda ngolu hlobo.” Uthando lwakhe olunzulu luye lwamnceda wakwazi ukumelana nobunzima obungalindelekanga aye wajamelana nabo ekuqaleni.
5:10 emva kwemini. Emva kokuya kuphuthuma uJoanna, uHelen uya kwiindawo ezahlukahlukeneyo ukuze alungise izinto ezithile. Utsalela umnxeba uNick aze amkhumbuze ukuba nguye ofanele aphuthume uPenny.
6:00–7:30 ngokuhlwa. Akuba efikile ekhaya, uHelen ukhulula uMakhulu ‘kumsebenzi wokugcina uAlex,’ wenza umsebenzi wasendlwini aze alungiselele isidlo sangokuhlwa. Xa ebuzwa ngeenzima zokukhulisa usana, enesingqala uHelen uthi: “Akukho nto yimbi usana luyifunayo ngaphandle konina: iingalo zakhe, umzimba wakhe nobisi lwakhe yaye lumenza angalali.”
8:30–10:00 ebusuku. UHelen uncedisa uJoanna enze umsebenzi wesikolo owenzelwa ekhaya aze ancancise uAlex. Ngoxa uNick efundela uPenny kangangesiqingatha seyure, uHelen wenza eminye imisebenzi yasendlwini.
11:15 ebusuku. Emva kokuba uPenny noJoanna beye kulala, uAlex usahleli ezingalweni zikanina, kodwa ekugqibeleni ude alale. UHelen uthi kuNick, osele eyokotheka bubuthongo: “Ndicinga ukuba ndingamlalisa ngoku.”