IHigh Blood Pressure—Ukuyithintela Nokuyigcina Ikumlinganiselo Ofanelekileyo

NGUMBHALI KAVUKANI! EBRAZIL

IZIBILINI zaziphezulu kuMarian! Wasuka wamongoza kanobom. Uthi: “Ndandisithi ndiyafa.” UMarian waxelelwa ngugqirha ukuba umongoza ngenxa yehigh blood pressure (iarterial hypertension). UMarian wathi: “Kungekho nto ndiyivayo nje mna.” “Baninzi abantu abangazaziyo ukuba banehigh blood pressure kuba nje bengaboni zimpawu,” waphindisa ngelitshoyo ugqirha.

Injani eyakho iblood pressure? Ngaba indlela ophila ngayo ingakubangela ube nehigh blood pressure ngeny’ imini? Ungayigcina njani iblood pressure ikumlinganiselo ofanelekileyo?a

Iblood pressure sisantya elihamba ngaso igazi emithanjeni. Ukuze sibonwe esi santya, kusetyenziswa isixhobo sokuxilonga esinelaphu elibotshelelwa engalweni. Kwesi sixhobo kuvela amanani amabini. Ngokomzekelo, kusenokuvela u-120/80. Inani lokuqala kuthiwa yisystolic blood pressure kuba lichaza iblood pressure xa kubetha intliziyo (isystole), kanti inani lesibini kuthiwa yidiastolic blood pressure kuba lichaza iblood pressure xa intliziyo iyekelele (idiastole). Isantya seblood pressure sijongwa ngeemilimitha zemekyuri, yaye xa iblood pressure yomntu ingaphezu ko-140/90, oogqirha badla ngokuthi uyagula loo mntu.

Inyuswa yintoni iblood pressure? Masithi unkcenkceshela igadi yakho. Xa uvula impompo okanye ucinezela intloko yethumbu lokunkcenkcesheIa, ubangela ukuba amanzi aphume ngesantya esiphezulu. Kunjalo ke nangeblood pressure: Ukunyuka kwesantya sokuhamba kwegazi okanye ukucinezeleka kwemithambo yegazi kuyayinyusa iblood pressure. Ibangelwa yintoni ihigh blood pressure? Inokubangelwa zizinto ezininzi.

Izinto Ongenakwenza Nto Ngazo

Abaphandi bafumanise ukuba, xa kukho umntu onehigh blood pressure kwintsapho yakowenu, usesichengeni sokuphathwa sesi sifo. Iingxelo zibonisa ukuba amawele angumceph’ ucandiwe ngawona asesichengeni sokuhlaselwa yihypertension kunamawele angafaniyo. Olunye uhlolisiso luthetha “ngokubhaqwa kwemizila yemfuza ebangela iarterial hypertension,” nto leyo engqina ukuba kukho imizila yemfuza ebangela ihigh blood pressure. Kuthiwa ihigh blood pressure inyuka ngokugqithiseleyo njengoko umntu ekhula kanti inyuka ngakumbi kumadoda antsundu.

Iindlela Onokuyiphepha Ngazo

Zikhethe ngenyameko izinto ozityayo! Ityuwa (isodium) inokuyinyusa iblood pressure kwabanye abantu, ngokukodwa kubantu abanesifo seswekile, abo baphethwe yihypertension ngamandla, abantu abakhulileyo nabanye abantu abantsundu. Amafutha amaninzi egazini anokwenza icholesterol emithanjeni (iatherosclerosis), nto leyo ecutha imithambo ize inyuse iblood pressure. Abantu abathe kratya ngama-30 ekhulwini kubunzima obufanele umzimba wabo basesichengeni sokuba nehigh blood pressure. Uhlolisiso lubonise ukuba ukutya kakhulu ipotassium necalcium kunokuyihlisa iblood pressure.

Kuthiwa ukuba uyatshaya usenokuba neatherosclerosis, isifo seswekile, isifo sentliziyo nestroke. Ngenxa yoko, umntu otshayayo enehigh blood pressure usengozini yokuba nesifo sentliziyo. Nangona kukho ukuphikisana, icaffeine—esekofini, etini, nakwiziselo ezihlwahlwazayo—kunye nokudandatheka nokuxinezeleka kunokuyinyusa ngakumbi iblood pressure. Ukongezelela, izazinzulu ziyazi ukuba ukuzintyintya okanye ukuba likhoboka lotywala nokungenzi mthambo kunokuyinyusa iblood pressure.

Ukuzigcina Usempilweni

Akuyomfuneko ukuba ulinde de ube nehigh blood pressure ukuze uqalise ukuyinyanga. Umntu ufanele azigcine esempilweni esemncinane. Ukuzinyamekela ngoku kuya kwenza izinto zibe lula kwikamva.

IThird Brazilian Consensus on Arterial Hypertension yachaza iindlela zokugcina iarterial blood pressure ikumlinganiselo ofanelekileyo. Ezo ndlela ziluncedo kubantu abanehigh blood pressure nabangenayo.

Abaphandi bacebisa ukuba abantu abatyebe kakhulu batye ukutya okuneekilojoule ezimbalwa, baphephe ukutya okuhlisa umzimba “ngokukhawuleza,” baze babe nosukelo lokwenza umthambo rhoqo. Bakwacebisa ukuba umntu angatyi ityuwa engaphezu kweegram ezintandathu okanye itispuni elinye letyuwa ngemini.b Loo nto ithetha ukuba ufanele uthi chatha intwana nje yetyuwa xa upheka, uze ungakutyi kakhulu ukutya okunkonkxiweyo, neemveliso zenyama (njengesalami, iham, isoseji, nezinye), nesmoked foods. Kwakhona ungayinciphisa ityuwa oyityayo ngokungayigaleli xa usitya nangokufunda oko kubhalwe ngaphandle kwiipakethe zokutya okunkonkxiweyo ukuze ubone ukuba kunetyuwa engakanani na.

Enye into ecetyiswa yiBrazilian Consensus kukutya kakhulu ipotassium kuba “isenokuyilwa ihypertension.” Ngenxa yoko, phakathi kokutya okunempilo kufanele kubekho “ukutya okunesodium encinane nokunepotassium eninzi,” okufana neembotyi, imifuno eluhlaza, iibhanana, iivatala, iminqathe, iibhithi, iitumato namaorenji. Enye into ebalulekileyo kukubusebenzisa ngendlela efanelekileyo utywala. Abanye abaphandi bathi amadoda anehypertension akafanele asele utywala obungaphezu kweemililitha ezingama-30 ngemini; wona ke amabhinqa okanye abo banomzimba omncinane abafanele basele ngaphezu kweemililitha ezili-15 ngemini.c

IBrazilian Consensus yaqwela ngelithi ukwenza umthambo kugcina iblood pressure ikumlinganiselo ofanelekileyo yaye kunciphisa amathuba okuba sengozini yokuba nearterial hypertension. Ukwenza umthambo olula, njengokuhamba-hamba, ukukhwela ibhayisikile nokuqubha, kangangemizuzu engama-30 ukuya kwengama-45, izihlandlo ezithathu ukuya kwezihlanu ngeveki kunokuba luncedo.d Phakathi kwezinye izinto ezinokukunceda uhlale usempilweni kukuyeka ukutshaya, ukugcina amafutha asegazini ekumlinganiselo ofanelekileyo (icholesterol netriglycerides) neswekile ikumlinganiselo ofanelekileyo, ukutya icalcium nemagnesium ngokwaneleyo, nokuphepha uxinezeleko nokudandatheka. Amayeza anceda ukuxinana kweempumlo, awokunyanga iasidi anesodium eninzi, amayeza akwenza ungakuthandi kangako ukutya, nawokunyanga intloko enkqenkqethayo anecaffeine anokuyinyusa iblood pressure.

Ngokuqinisekileyo, ukuba unearterial hypertension, ngugqirha wakho onokukucebisa ngezinto ofanele uzitye nendlela omele uphile ngayo, ngokubona ingxaki onayo. Noko ke, enoba ukweyiphi imeko kusoloko kuluncedo ukuzigcina usempilweni kwasebuntwaneni, kungekhona nje kubantu abanehypertension kodwa kwintsapho xa iyonke. UMarian, ekuthethwe ngaye ekuqaleni kweli nqaku, kwafuneka atshintshe indlela aphila ngayo. Ngoku usebenzisa amayeza yaye uphila ngendlela eqhelekileyo nangona enengxaki yempilo. Kuthekani ngawe? Ngoxa silinde ixesha laxa abantu beya kuba yimiqabaqaba ‘kungekho mmi uya kuthi: “ndiyagula,”’ gcina iblood pressure yakho ikumlinganiselo ofanelekileyo!—Isaya 33:24.

[Imibhalo esemazantsi]

[Ibhokisi ekwiphepha 14]

IINDLELA ZOKUTHINTELA IHIGH BLOOD PRESSURE

1. Izinto Ezinokuba Luncedo Ekuthomalaliseni I-“High Blood Pressure”

• Nciphisa umzimba

• Musa ukuyitya kakhulu ityuwa

• Yitya kakhulu ukutya okunepotassium

• Musa ukubusela kakhulu utywala

• Yenza umthambo rhoqo

2. Ezinye Iindlela Eziluncedo Ekugcineni I-“Blood Pressure” Ikumlinganiselo Ofanelekileyo

• Yitya izinto ezinecalcium nemagnesium

• Yitya imifuno enentswane

• Sebenzisa amayeza okuthomalalisa uxinezeleko

3. Ezinye Izinto Ezinokuba Luncedo

• Yeka Ukutshaya

• Gcina icholesterol ikumlinganiselo ofanelekileyo

• Gcina iswekile ikumlinganiselo ofanelekileyo

• Phepha amayeza anokunyusa iblood pressure

[Inkcazelo]

Lithatyathwe kwiThird Brazilian Consensus on Arterial Hypertension—Revista Brasileira de Clínica & Terapêutica.

[Imifanekiso ekwiphepha 15]

Ukwenza umthambo rhoqo nokutya ukutya okunempilo kuyigcina ikumlinganiselo ofanelekileyo iblood pressure