Uxolo Lwehlabathi Asilophupha Nje!
UKUBA uAlfred Nobel ebenokuyibona yonke into ebisenzeka kwinkulungwane edluleyo, ngaba ebenokuba nethemba lokuba kuya kuze kubekho uxolo ehlabathini? Ngokungathandabuzekiyo, bekuya kumvuyisa ukubona abantu abaninzi besenza unako nako wokuphelisa imfazwe. Sekunjalo, bekuya kufuneka aginye le nyaniso ikrakra. UNjingalwazi Hugh Thomas uyishwankathela kakuhle ngale ndlela: “Nangona kwinkulungwane yamashumi amabini kuye kwaphuculwa intlalo-ntle yoluntu waza norhulumente wabonakalisa inkxalabo ngamahlwempu ngendlela ephawulekayo, ukusetyenziswa kweengadla-ngadla zemipu, iinkanunu, ii-B-52, iibhombu zenyukliya, kwaneentolo-mlilo bekubalasele ngendlela efanayo. Bekukwakho neemfazwe eziye zasuba imiphefumlo emininzi nezibangele umonakalo omkhulu ngendlela engazange ibonwe ngaphambili.” UThomas wongezelela ngelithi “ngoko ke, enoba kule nkulungwane iye yenziwa inkqubela okanye akunjalo, oko kuxhomekeke kwindlela mntu ngamnye abona ngayo.”
Ngaba kukho nto ibonakalisa ukuba luza kubakho uxolo ngoku njengoko sikwinkulungwane yama-21? Nakanye! Lithetha ngokuhlaselwa kwesiXeko saseNew York neWashington, D.C. ngabanqolobi ngoSeptemba 11, 2001, iphephancwadi iNewsweek lithi: “Ukuba abantu bayakwazi ukuthabatha ii-767 (iinqwelo-moya zokuthutha abantu) bazisebenzise njengeentolo-mlilo, kubonakala kungekho nanye into enokubaxaka okanye ibathintele.”
Bambi bathi ukuze kubekho uxolo ehlabathini, kumele kwenzeke ezi zinto zimbini: Okokuqala, abantu bafanele batshintshe isimo sengqondo sabo nendlela abazenza ngayo izinto, kanti okwesibini, zonke iintlanga zimele zimanyane phantsi korhulumente omnye. IBhayibhile yaxela kwangaphambili ngexesha ekuya kubakho uxolo ngalo—kodwa olo xolo aluyi kubangelwa yimizamo yabantu. INdumiso 46:9 ithi ngoMdali, uYehova uThixo: “Uphelisa iimfazwe kuse esiphelweni somhlaba.” Uya kukwenza njani uThixo oku? Uya kusebenzisa uBukumkani bakhe, obebusoloko buthandazelwa ngabantu abanyanisekileyo abaninzi. Obo Bukumkani, asiyonto ingaqondakaliyo isezintliziyweni, kodwa ngurhulumente uThixo aya kumisela ngaye uxolo ehlabathini lonke. Ephefumlelwe, umprofeti uIsaya waxela kwangaphambili ukuba abalawulwa baloo rhulumente abasayi ‘kuphinda bafunde mfazwe.’ (Isaya 2:4) Ngenkqubo yokufundisa eyenziwa emhlabeni wonke, abantu baya kufundiswa ukuhlala ngoxolo baze ‘bakhande amakrele abo abe ngamakhuba nemikhonto yabo ibe zizikere zokuthena imithi.’
AmaNgqina kaYehova sele ekwenza oku. Akavumi ukuphakamisa izigalo nxamnye nabanye abantu, nangona eziintlanga ezahlukahlukeneyo yaye ehlala kumazwe awahlukahlukeneyo angaphezu kwama-200. Ukungabi nanxaxheba kwawo kwiimfazwe eziliwa kweli hlabathi ligquba iimfazwe, kububungqina bokuba uxolo lwehlabathi asilophupha nje.
Ngaba ungathanda ukufunda okungakumbi ngeli themba loxolo lokwenene lisekelwe eBhayibhileni? Nceda ubhalele abapapashi beli phephancwadi, usebenzisa idilesi eya kuba kufutshane nawe kwezidweliswe kwiphepha 5, okanye uqhagamshelane namaNgqina kaYehova akwindawo ohlala kuyo.