Intuthuzelo Kwababandezelekileyo
UKUHLASELA kwabanqolobi ngoSeptemba 11, 2001, kwisiXeko saseNew York naseWashington, D.C., kwashiya abantu abaninzi betyhwatyhwa ehlabathini lonke. Ngosuku nje olunye, abantu abangamawaka, ekwakukho phakathi kwabo amakhulu amaqhawe angabacimi mlilo, amapolisa kunye nabasebenzi bonyango olukhawulezileyo, baphulukana nobomi.
Ukususela ngoko, amaNgqina kaYehova aye azama ukuthuthuzela abo balahlekelwe ngababathandayo kuloo ntlekele. Oko akwenze ukuze ‘abophe abantliziyo zaphukileyo’ aze ‘athuthuzele bonke abazilileyo.’—Isaya 61:1, 2.
Ukutyhubela iminyaka, amaNgqina kaYehova afumanise ukuba abo bafelwa ngabantu ababathandayo badla ngokuzibuza le mibuzo ingezantsi. IBhayibhile iyayiphendula. Kutheni ungajongi iZibhalo ezicatshulwe ngezantsi kweyakho iBhayibhile?
Ngaba ukufa komntu kumiselwa kwangaphambili?
KwiNtshumayeli 9:11, iBhayibhile ithi bonke abantu behlelwa “lixesha nasisihlo esingenakubonwa kwangaphambili.” Ukuba ukufa kumiselwa kwangaphambili, kutheni iBhayibhile isikhuthaza ukuba sizikhusele?—Ngokomzekelo, bona iDuteronomi 22:8.
Kutheni sisifa?
Isibini sokuqala uAdam noEva, sabekwa kumhlaba oyiparadesi. Ukuba sasiqhubeke sithobela, sasingayi kufa. Sasiza kufa kuphela xa singamthobeli uThixo. (Genesis 1:28; 2:15-17) Okubuhlungu kukuba, uAdam noEva abazange bamthobele uMdali wabo. Oko kwabangela ukuba bohlwaywe ngokufa. Ekubeni bonke abantu beyinzala kaAdam noEva, bazuz’ ilifa isono nokufa. IBhayibhile ithi: “Isono sangena ngamntu mnye ehlabathini [uAdam] nokufa ngaso isono, ngaloo ndlela ukufa kwasasazeka kubo bonke abantu.”—Roma 5:12.
Abafi bakweyiphi imeko?
Emva kwemvukelo ka-Adam, uThixo wathi: ‘Uya kubuyela emhlabeni, kuba uthatyathwe kuwo. Ngokuba uluthuli, uya kubuyela kwaseluthulini.’ (Genesis 3:19) Ngaloo ndlela, umntu ofileyo akazi nto, akaphili. IBhayibhile ithi: “Abaphilayo bayazi ukuba baya kufa; kodwa abafileyo, abazi nto konke konke.” (INtshumayeli 9:5) Kwakhona iBhayibhile ithi xa umntu esifa, ‘ubuyela emhlabeni wakhe; ngaloo mini ziyatshabalala iingcamango zakhe.’—INdumiso 146:3, 4.
Ngaba sinomphefumlo ongafiyo?
IBhayibhile ifundisa ngokucacileyo ukuba umphefumlo nguwe, kungekhona into onayo engafiyo. (Genesis 2:7; IMizekeliso 2:10; Yeremiya 2:34) Ngenxa yoko, sinokuthi xa umntu esifa, umphefumlo ufile. IBhayibhile itsho ngokucacileyo ukuba: ‘Umphefumlo [oko kukuthi, umntu] owonayo uya kufa.’—Hezekile 18:4.
Liyintoni ithemba ngabantu abafileyo?
IBhayibhile isixelela ukuba injongo kaThixo kukubuyisela abantu abafileyo ebomini ngokubavusela kwiparadesi esemhlabeni, apho kungayi kubakho kugula nakufa. UYesu wathi: “Liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe baze baphume.”—Yohane 5:28, 29; ISityhilelo 21:1-4.
Xa wayethetha ngomhlobo wakhe owayesandul’ ukufa uLazaro, uYesu wafanisa ukufa nokulala. (Yohane 11:11-13) Ngaphezu koko, emva kokuba evuswe nguYesu, uLazaro akazange athi wayekwindawo yentuthumbo okanye yolonwabo ngelo thutyana wayefe ngalo. (Yohane 11:37-44) Oku kuyaqondakala, kuba abantu abafileyo abazi nto. Ababandezeleki kunoko balinde “ilixa” abaya kuvuswa ngalo. Eyona nkalo ibalulekileyo yeyokuba, ngokuvusa uLazaro uYesu wayebonisa ukuba abantu abafileyo banokuphinda baphile. Eneneni, ngokwenza loo mmangaliso uYesu wabonisa ngomlinganiselo omncinane, oko kuza kwenzeka emhlabeni phantsi kolawulo loBukumkani bukaThixo. (IZenzo 24:15) Enjani yona intuthuzelo kwabo bafelwa ngababathandayo ngeli xesha limaxongo!