Imbono YeBhayibhile
Ngaba UThixo Uyazixhasa Iimfazwe?
AKUNGOKU abalawuli, iinjengele nabefundisi beyintyontyela baze bayiqhwabel’ izandla imfazwe besithela ngoThixo! Emva kokusikelelwa nguPopu Urban II, ngowe-1095 uMkhosi Wokuqala Womnqamlezo wenjenjeya ukusinga “kwisiXeko Esingcwele” iYerusalem ngenjongo yokuphinda usithabathe sibe phantsi kweNgqobhoko. Wathi ungekayenzi loo nto, elinye iqela laloo Mkhosi labulawa ngabantu baseTurkey, ababenenzondelelo ngoAllah njengokuba namajoni oMkhosi Wokuqala Womnqamlezo ayenjalo ngoBathathu Emnye.
NgoAgasti 1914, igatyana lomfana laseJamani elalikwiMfazwe Yehlabathi I labhala lenjenje: “Ukuba okusesikweni kukhona yaye nguThixo olawula imicimbi kwimbali yoluntu—nto leyo endiqinisekileyo ngayo—simele soyise.” Kwakuloo nyanga, UCzar Nicholas II wafunza imikhosi yaseRashiya ukuba iye kuhlasela iJamani esithi: “Ndithi phambili kuni magorhandini amajoni nani mahlakani am abekekileyo. UThixo unathi!”
Zithi zakomelezwa ngolu hlobo, izigidi ngezigidi zamajoni zisinge kwithafa ledabi zinyathelela phezulu, ziqinisekile ukuba zixhaswa nguThixo. Abantu abaninzi bavakalelwa kukuba uThixo uyazivumela ezo mfazwe ukuze abantu bafumane inkululeko, yaye xa bezithethelela bade bakhankanye iimfazwe ekuthethwa ngazo kwiZibhalo zesiHebhere (ngokuqhelekileyo ezibizwa ngokuba yiTestamente Endala). Ngaba loo ngcaciso yabo iyavumelana neLizwi likaThixo?
Iimfazwe ZikaSirayeli Wamandulo
UYehova uThixo wayalela ukuba amaSirayeli alwe namaKanan aqaqadekileyo ukuze awasuse kwiLizwe Lesithembiso. (Levitikus 18:1, 24-28; Duteronomi 20:16-18) Kanye njengoko uThixo wohlwaya abenzi bobubi bomhla kaNowa ngomkhukula waza watshabalalisa abantu baseSodom naseGomora ngomlilo, wasebenzisa uhlanga lakwaSirayeli ukuze aphumeze umgwebo wakhe.—Genesis 6:12, 17; 19:13, 24, 25.
Ngokutsho kweBhayibhile, zikho nezinye iimfazwe uThixo awayalela amaSirayeli ukuba azilwe nxamnye neentshaba ezaziwasongela. Xa luthobela uYehova, olu uhlanga lwalusoyisa kwezo mfazwe. (Eksodus 34:24; 2 Samuweli 5:17-25) Kodwa amaSirayeli ayesoyiswa xa esilwa engayalelwanga nguThixo. Cinga nje ngoKumkani uYerobhoham. Egatya isilumkiso esingqalileyo sesiprofeto, wathumela umkhosi omkhulu ukuba uye kulwa noYuda. Lathi liphela elo dabi, kwaba sele kufe amajoni kaYerobhoham angama-500 000. (2 Kronike 13:12-18) KwanoKumkani uYosiya owayethembekile wakha walwa imfazwe ekwakungeyomfuneko ukuba alwe kuyo. Ngenxa yokwenza isigqibo ngokungxama, waphulukana nobomi bakhe.—2 Kronike 35:20-24.
Ezi ziganeko zibonisa ntoni? Zibonisa ukuba kuSirayeli wamandulo, nguThixo owayesenza isigqibo sokuba kuliwe imfazwe. (Duteronomi 32:35, 43) Abantu bakhe babesilwa ngenxa yeenjongo ezithile. Noko ke, ezo njongo zaphunyezwa kudala. Ngokubhekele phayaa, uYehova waxela kwangaphambili ukuba abo bamkhonzayo ‘kwimihla yesiphelo baya kuwakhanda amakrele abo abe ngamakhuba’ yaye abayi ‘kuphinda bafunde imfazwe.’ (Isaya 2:2-4) Ngokucacileyo, iimfazwe ekuthethwa ngazo eBhayibhileni azibathetheleli abo balwayo namhlanje bengayalelwanga nguThixo.
Impembelelo Yeemfundiso ZikaKristu
Ngoxa wayelapha emhlabeni, uYesu wabonisa indlela esinokulubonakalisa ngayo uthando olunzulu endaweni yentiyo, wathi: ‘Thandanani njengoko ndinithandileyo.’ (Yohane 15:12) Kwakhona wathi: “Banoyolo abanoxolo.” (Mateyu 5:9) Apha, igama lesiGrike elithi “abanoxolo” alithethi nje ukubakho kwenzolo. Eneneni lithetha ukuhlakulela uxolo, nokuzama ukwenza okulungileyo.
Ekubanjweni kukaYesu, umpostile uPetros wasebenzisa isixhobo esiyingozi ezama ukumkhusela. Kodwa uNyana kaThixo wamkhalimela, wathi: “Buyisela ikrele lakho endaweni yalo, kuba bonke abathabatha ikrele baya kutshabalala ngekrele.” (Mateyu 26:52) AmaKristu enkulungwane yokuqala awasebenzisa njani la mazwi? Phawula ezi ngcaphulo zilandelayo.
“Ukuyihlolisisa ngenyameko yonke inkcazelo ekhoyo [kubonisa] ukuba, de kwalixesha likaMarcus Aurelius [121-180 C.E.], akukho mKristu waba lijoni; yaye akukho joni laqhubeka lisemkhosini emva kokuba libe ngumKristu.”—The Rise of Christianity.
“Indlela amaKristu [okuqala] ayezenza ngayo izinto yayahluke ngokupheleleyo kuleyo yamaRoma. . . . Ekubeni uKristu wayeshumayela isigidimi soxolo, ayengavumi ukuba ngamajoni.”—Our World Through the Ages.
Ekubeni abafundi bakaKristu babengavumi ukukhonza kumkhosi wamaRoma, abaninzi babulawa ngamaRoma. Kwakutheni ukuze amaKristu enze esi sigqibo sabangela ukuba athiywe ngabantu abaninzi? Kwakungenxa yokuba uYesu wawafundisa ukuba abe ngabantu abanoxolo.
Iimfazwe Zanamhlanje
Khawucinge nje ukuba bekuya kuba njani ukuba abalandeli bakaKristu bebenokuba kumaqela achaseneyo alwayo, bezama ukubulalana. Oko bekuya kuba nxamnye nemilinganiselo yobuKristu. Eneneni, abo bathobela uThixo ekuthethwa ngaye eBhayibhileni abayi kwenzakalisa nabani na—kwaneentshaba zabo.a—Mateyu 5:43-45.
Ngokucacileyo, uThixo akazixhasi iimfazwe zale mihla eziliwa ngabantu ngenjongo yokuphumeza iminqweno yabo. Njengoko enoxolo, amaKristu enyaniso abonakalisa uxolo oluya kubakho emhlabeni wonke xa kulawula uBukumkani bukaThixo.
[Umbhalo osemazantsi]
a IBhayibhile ithetha ‘ngeHar–Magedon,’ ekwabizwa ngokuba ‘yimfazwe yemini enkulu kaThixo uSomandla.’ Le asiyomfazwe yabantu, kodwa yimfazwe kaThixo aza kutshabalalisa ngayo abenzi bobubi. Ngoko ke, iHar–Magedon ayinanto yakwenza neemfazwe zanamhlanje, okanye ayithethi kuthi uThixo uyazixhasa.—ISityhilelo 16:14, 16; 21:8.
[Umfanekiso okwiphepha 28]
UNjengele Francisco Franco waseSpeyin, emi neqela labefundisi bamaKatolika
[Inkcazelo]
U.S. National Archives photo
[Umfanekiso okwiphepha 29]
Amajoni esikelelwa ngabefundisi bobuOthodoki bamaGrike ngaphambi kokuba anduluke ukuya eKosovo, ngoJuni 11, 1999
[Inkcazelo]
AP Photo/Giorgos Nissiotis