Ukozela Kwabakwishumi Elivisayo—Ngaba Oku Kuyaxhalabisa?
NGUMBHALI KAVUKANI! EKHANADA
IPHEPHANDABA laseKhanada iGlobe and Mail lithi ukungalali ngokwaneleyo kubangela ukungasebenzi kakuhle kwengqondo nokulibala, yaye abafundi abakwishumi elivisayo baphakathi kwabona bantu basesichengeni sokwehlelwa yile ngxaki. “Kanti kuthiwa ukungalali ngokwaneleyo kwabantwana abancinane nabakwishumi elivisayo kubangela ukuba bangabi nasimilo, babe nochuku baze badlamke ngokugqithisileyo.” Izazinzulu ziye zenza uphando ngokuphathelele oko kwenzekayo kubafundi bamabanga aphakamileyo abamalunga nama-2 200 xa belele, yaye zifumanise ukuba abamalunga nama-47 ekhulwini balala ngaphantsi kweeyure ezisibhozo busuku ngabunye.
IGlobe ithi ngoxa abantwana besenokungalali ngokwaneleyo ngenxa yendlela abaphila ngayo, “kusenokwenzeka ukuba abanye babo banengxaki yempilo engekabonwa. Xa belele, abantwana abamalunga ne-4 ekhulwini abaneminyaka emi-4 ukuya kweli-18 ubudala, bavaleka imibhobho yokungenisa umoya [sleep apnea].” Xa belele, uqhoqhoqho uyavaleka kancinane okanye uvaleke ngokupheleleyo, nto leyo ebangela ukuba ioksijini ingangeni. Ngenxa yoko, ingqondo ayiphumli ngokwaneleyo yaye abantwana bavuka bediniwe okanye benochuku.
Iimpawu zale ngxaki zinokuquka ukurhona, ukusoloko uvuka unentloko ebuhlungu, ukulibala nokungakwazi ukunikela ingqalelo kwakunye nokusoloko usozela emini. Abazali bakhuthazwa ukuba ngamathuba athile baphulaphule indlela abaphefumla ngayo abantwana babo xa bekobunzulu ubuthongo. UGqr. Robert Brouillette, onolwazi ngeengxaki zobuthongo ebantwaneni eMontreal Children’s Hospital, uthi umntwana onale ngxaki unokuyeka ukuphefumla ngoxa elele, nangona kusenokwenzeka ukuba isifuba sakhe siyashukuma. Uthi: “Usenokuqalisa ukuphefumla xa evuka okanye othuke nje okwethutyana, [aze] atsale umoya nje kabini kathathu, buphinde buhle ubuthongo.” Oku kunokwenzeka kangangamakhulukhulu ezihlandlo busuku ngabunye, nto leyo ebangela ukuba umntwana avuke ediniwe.
IAmerican Sleep Disorders Association icebisa ukuba igumbi lokulala liphole, libe mnyama yaye lingabi naziphazamiso zinjengomabonwakude okanye ikhompyutha. Ukuba nexesha lokulala nelokuvuka kuyabanceda abantwana abancinane nabakwishumi elivisayo ukuba balale ngokwaneleyo. Abanye abantu abanengxaki yokuvaleka kwemibhobho yokungenisa umoya xa belele (sleep apnea) badla ngokusebenzisa umatshini wokuphefumla, ongenisa umoya ezimpumlweni nasemlonyeni, ukuze kuvuleke uqhoqhoqho. Omnye ugqirha wabantwana wathi: “Ubuthongo bubaluleke nangaphezu kokutya. Bubaluleke nangaphezu kokwenza umthambo. Ubuthongo buluncedo kwindlela asebenza ngayo amadlala ethu, kwindlela esivakalelwa ngayo kwanakwinkqubo yokuzikhusela komzimba.”