Imbono YeBhayibhile
Imithandazo Ayiphulaphulayo UThixo
“Qhubekani nicela, niya kunikwa; qhubekani nifuna, niya kufumana; qhubekani ninkqonkqoza, niya kuvulelwa. Kuba wonk’ ubani ocelayo uyamkela, nalowo ufunayo uyafumana, nalowo unkqonkqozayo uya kuvulelwa.”—LUKA 11:9, 10.
ENENTEMBELO epheleleyo kumazwi kaYesu Kristu acatshulwe ngasentla, amaKristu amaninzi abhenela kuThixo ngomthandazo xa eneengxaki nezinto eziwaxhalabisayo, eqinisekile ukuba uyawathanda yaye uwakhathalele. Noko ke, wambi ahlala enxubile njengoko elindele ukuphendulwa kwemithandazo yawo. Ngaba uvakalelwa kukuba imithandazo yakho iphelel’ emoyeni? Ngaba uThixo uyayiphulaphula imithandazo yakho?
Nangona kusenokubonakala ngathi imithandazo yethu ayiphendulwa, oku akuthethi ukuba uThixo akayiphulaphuli. IBhayibhile isiqinisekisa ngelithi: “Amehlo kaYehova aphezu kwabo bangamalungisa, neendlebe zakhe zisingisele esikhungweni sabo.” (1 Petros 3:12) Ngoko uYehova uThixo uyayiphulaphula imithandazo yamalungisa, enokuba athandaza ngokuvakalayo okanye entliziyweni. (Yeremiya 17:10) Kwakhona uYehova uhlolisisa iintshukumisa zomthandazo ngamnye, ekusenokwenzeka ukuba nalowo uthandazayo akaziqondi kakuhle.—Roma 8:26, 27.
Noko ke, kukho iindlela ezithile ezimele zisetyenziswe ukuze imithandazo yamkeleke kuThixo. Okokuqala, kufanele kuthandazwe kuThixo kuphela—kungekhona kuYesu, “kwingcwele” okanye kwisithixo. (Eksodus 20:4, 5) Kwakhona, kumele kuthandazwe egameni loNyana kaThixo, uYesu Kristu. (Yohane 14:6) Ngaba oku kuthetha ukuba imithandazo yethu iqala iviwe nguYesu, aze yena ayidlulisele kuThixo? Akunjalo. Kodwa, xa sithandaza kuYehova egameni likaYesu, sibonisa ukuba singabafundi bakaKristu kwaye siyaqonda ukuba lidini lakhe kuphela elisinceda sisondele kuThixo.—Hebhere 4:14-16.
Simele sithandaze sinokholo. Umpostile uPawulos wathi: “Ngaphandle kokholo akunakwenzeka ukumkholisa kakuhle [uThixo], kuba lowo uzayo kuThixo umele akholwe ukuba ukho nokuba ungumvuzi wabo bamfuna ngenyameko.” (Hebhere 11:6) Umntu unokwazi njani ukuba unalo ukholo olunjalo? Umbhali weBhayibhile uYakobi uyaphendula: “Mna ndokubonisa ukholo lwam ngemisebenzi yam.” (Yakobi 2:18) Ewe, ukholo luba nemisebenzi, yaye loo misebenzi ibonisa ukuba siyamthanda uThixo yaye sizama ukumkholisa.
Kwakhona abanquli bakaThixo bamele bazingise emthandazweni. UYesu wakucacisa oku kuLuka 11:9, 10 ocatshulwe ekuqaleni. Ngapha koko, ukuba umntu uthandaza kube kanye ngokuphathelele umbandela othile, ngaba oko akubonisi ukuba akalufuni ngokwenene uncedo?
Oko Kuthenjiswa NguThixo
Enoba sinokuzingisa okanye sithandaze ngokunyaniseka kangakanani na, sisaphila ‘kumaxesha amanqam ekunzima ukujamelana nawo.’ (2 Timoti 3:1) Nakuba ngokwenene uYesu wathi abalandeli bakhe baya konwaba, akazange athi bagonyiwe ezingxakini. (Mateyu 5:3-11) Noko ke, watsho nokuba abafundi bakhe baya konwaba nangona bezilile, belambile, benxaniwe okanye betshutshiswa.
Ulonwabo awathetha ngalo uYesu aluxhomekekanga ekuphileni ubomi obutofotofo. Kodwa, lulwaneliseko esiba nalo ngenxa yokukhonza uThixo. Ngoko, sinokonwaba ngomlinganiselo othile nangona sineenzingo.—2 Korinte 12:7-10.
Ukumelana Neengxaki Zethu
Ngoko, ngaba kuyinkcitha-xesha ukuthandaza kuThixo ngokuphathelele imibandela enjengokufumana iqabane lomtshato elifanelekileyo okanye ukumelana neengxaki zentsapho, impilo enkenenkene okanye iingxaki zomsebenzi? Akunjalo, kuba nangona uThixo engathembisi ukulungisa iingxaki zethu ngokungummangaliso, uya kusinika ubulumko bokumelana nazo. Ebhekisela kwiimvavanyo, uYakobi wathi: “Ukuba kukho nabani na kuni oswele ubulumko, makaqhubeke ebucela kuThixo, kuba unika bonke ngesisa, engangcikivi; yaye uya kubunikwa.” (Yakobi 1:5) Ngoko uYehova uya kusikhokela esebenzisa umoya wakhe oyingcwele. Oku kuya kusinceda siqonde size sisebenzise imigaqo yeBhayibhile xa sisenza izigqibo.
Kambe ke, umoya kaThixo awusenzeli zigqibo. Kunoko, kufuneka senze umgudu. Ngokomzekelo, ngaba xa sinengxaki, senza uphando size siphonononge amasuka-ndihlala ayo? Ukwenjenjalo kuya kumenza uThixo aqonde ukuba sinokholo. (Yakobi 2:18) Ngaba siye senza unako-nako, ukuzama ukucombulula ingxaki esinayo, sizingisa ekuceleni ukhokelo lukaThixo? (Mateyu 7:7, 8) Ngaba siye sayihlolisisa ngenyameko imigaqo yeBhayibhile ephathelele le ngxaki? ILizwi likaThixo linokusenza ‘siwuxhobele ngokupheleleyo wonke umsebenzi olungileyo.’—2 Timoti 3:16, 17.
Ngoxa uThixo enokungenelela kwimicimbi yabantu aze acombulule zonke iingxaki zabo, ubavumele ukuba basebenzise inkululeko abanayo yokuzikhethela. Ngelishwa, abaninzi basebenzisa loo nkululeko ukuze bacinezele abanye. Ngenxa yoko, ezinye iingxaki esizithandazelayo aziyi kuphela de kufike ihlabathi elitsha likaThixo. (IZenzo 17:30, 31) Ezo ngxaki zisenokuquka iziganeko ezenzeka kwindawo esihlala kuyo, njengolwaphulo-mthetho okanye imfazwe; okanye kusenokufuneka sinyamezele ubunzima obubangelwa ngabantu abasichasayo. (1 Petros 4:4) Simele siqonde ukuba, sisaphila kweli hlabathi linabantu abangahloneli Thixo, ezinye izinto azinakulunga.
Noko ke, uThixo uyabathanda abanquli bakhe yaye ufuna ukubanceda. Xa kulawula uBukumkani bakhe kuphela emhlabeni, uya kuziphelisa kuthi nya izintsompothi zeengxaki kweli hlabathi. (ISityhilelo 21:3, 4) De lifike elo xesha, sifanele siqhubeke sicela ulwalathiso lwakhe ngendlela yokumelana neengxaki zobomi. Ukuba senjenjalo, sinokuqiniseka ukuba uYehova uya kusizalisekisa esi sithembiso sakhe siseBhayibhileni kuIsaya 41:10: “Musa ukoyika, kuba ndinawe. Musa ukubhekabheka, kuba ndinguThixo wakho. Ndiza kukuqinisa. Ndiza kukunceda ngokwenene. Ndiza kukubamba nkqi ngokwenene ngesandla sam sasekunene sobulungisa.”