Intlekele Egqugqisileyo

UErika uneenyanga ezintandathu ubudala. Noko ke, ubunzima bomzimba wakhe nobude bakhe phantse bulingana nobosana olunenyanga enye okanye ezimbini ubudala. Nangona enomzimba omncinane kangako, imilenze nesisu sakhe idumbile yaye ubuso bakhe buvuthelene bangqukuva. Uphatshile, iinwele zixhwithekile yaye zimbatshile nolusu lwakhe luxwebile. Ukhangeleka enengcwangu. Njengoko ugqirha ehlola amehlo kaErik, umele amhlole ngenyameko kuba izihlunu zamehlo akhe zinokukrazuka lula. Yaye uErik ukhangeleka ephazamisekile engqondweni. Okubuhlungu kukuba, asinguye yedwa okule meko.

“KUNEGALELO ekufeni kwabantwana abangaphezu kwesiqingatha ehlabathini lonke—kuye kwabulala abantu abangaphezu kwabo babulawa Kukufa Okumnyama. Ukanti, akusosifo sasulelayo. Imiphumo yako ichaphazela izigidi zabantu abaye basala beyimilwelwe, bethwaxwa zizigulo yaye bephazamisekile engqondweni. Kuthwaxa amabhinqa, iintsapho nebutho labantu ngokubanzi.”—IThe State of the World’s Children yeUnited Nations Children’s Fund.

Yintoni le kuthethwa ngayo apha? Kuthethwa ngokungondleki—ingakumbi oko kubangelwa kukungafumani komzimba iiprotini ezaneleyo, yaye iWorld Health Organization (WHO) ithi le ‘yingxaki engaqondakaliyo efuna ingqalelo ngokukhawuleza.’ Igqugqise kangakanani le ngxaki? IWHO ithi “ngomnye woonobangela bokufa kwesiqingatha sabantwana abali-10.4 lezigidi nyaka ngamnye.”

Abantu abangondlekanga banokuhlaselwa zizigulo ezahlukahlukeneyo, basenokubhitya ngenxa yokungafumani izakha-mzimba ezaneleyo—njengeevithamin neemineral—okanye batyebe ngokugqithiseleyo bahlaselwe nazezinye izifo ezinganyangekiyo ezibangelwa kukungondleki. Noko ke, iWHO ithi ukungafumani komzimba iiprotini ezaneleyo “lolona hlobo lokungondleki lubulalayo.” Abona bantu bangamaxhoba olo hlobo lokungondleki ngabantwana abangaphantsi kweminyaka emihlanu ubudala.

Khawukhe ucinge nje ngoErik okhankanywe ekuqaleni nangezinye izigidi zabantwana abathwaxwa kukungondleki. Bazibona sele bekule meko yaye akukho nto banokuyenza ukuze baphume kuyo. Ingcali kwimibandela yokondla abantwana, uGeorgina Toussaint wathi kuVukani!: “Abona bantu bangamaxhoba ale ngxaki ngabantu nje abamsulwa.”

Abanye basenokucinga ukuba le yingxaki engenakuphepheka—baqiqa ngelithi akukho kutya kwaneleyo. Okuhlekisayo kukuba, ngokutsho kweWHO, “namhlanje siphila kwihlabathi elinentabalala yokutya.” Kukho ukutya okunokwanela bonke abantu abasemhlabeni—nabangaphezu kwabo bakhoyo ngoku. Ukongezelela, ukungondleki kwabantu sesona sigulo sinokuthintelwa nesinokunyangwa lula. Ngaba ezi zibakala azikwenzi uvuk’ umnyele?

Ngoobani Abachaphazelekayo?

Asingobantwana kuphela abathwaxwa yingxaki yokungondleki. Ngokutsho kwengxelo yeWHO eyenziwa ngoJulayi 2001, “ingxaki yokungondleki igqugqisile, ithwaxa abantu abamalunga nama-800 ezigidi—ama-20 ekhulwini kubantu abahlala kumazwe asakhasayo.” Oku kuthetha ukuba ehlabathini lonke ngumntu om-1 kwabasi-8 ochatshazelwa yile ngxaki.

Nangona abona bantu baninzi bangondlekanga ingabaseAsia—ingakumbi abo bahlala kwimimandla esemazantsi nesembindini—eyona ndawo inomlinganiselo ophakamileyo wabantu abangondlekanga yiAfrika. Kulandela amazwe athile asakhasayo akwiLatin America nakwiCaribbean.

Ngaba wona amazwe afumileyo akachatshazelwa yile ngxaki? Akunjalo. IThe State of Food Insecurity in the World 2001, ithi kukho izigidi ezili-11 zabantu abangondlekanga abahlala kumazwe afumileyo. Abanye abantu abangondlekanga abazizigidi ezingama-27 bahlala kumazwe akhulayo, ingakumbi lawo akwiMpuma Yurophu nakwindawo eyayisakuba yiSoviet Union.

Yintoni ebangela ukuba ukungondleki kube yingxaki enkulu ngolu hlobo? Ngaba ikho into enokwenziwa ukuphucula le ngxaki yokungondleki? Ngaba ukungondleki kuya kuze kuphele kwesi sijikelezi-langa sethu? Amanqaku alandelayo aza kuphendula le mibuzo.

[Umbhalo osemazantsi]

[Isicangca/Imaphu ekwiphepha 4]

(Ukuba ufuna inkcazelo ehlahlelwe kakuhle, yiya kwimpapasho)

ABEMI BALA MAZWE BANOKUCHATSHAZELWA YINGXAKI YOKUNGONDLEKI

BASENOKUNGACHAPHAZELEKI

BASENOKUNGACHAPHAZELEKI KANGAKO

BASENOKUCHAPHAZELEKA KAKHULU

BASENOKUNGACHAPHAZELEKI KONKE KONKE OKANYE IZIBALO AZIPHELELANGA

[Umfanekiso okwiphepha 3]

Abantu abalindele uncedo eSudan

[Inkcazelo]

UN/DPI Photo by Eskinder Debebe