Imbono YeBhayibhile
Sifanele Siyisebenzise Njani Inkululeko Yethu Yokuzikhethela?
UTHIXO wadala abantu bokuqala uAdam noEva banobuchule bokukwazi ukuzikhethela. Wanika uAdam imbopheleleko yokunyamekela umyezo waseEden. Umsebenzi ka-Adam wawuquka ukuthiya izilwanyana amagama. (Genesis 2:15, 19) Okubaluleke ngakumbi kukuba, uAdam noEva babenelungelo lokuzikhethela enoba bayafuna kusini na ukuthobela uThixo.—Genesis 2:17, 18.
Zininzi kakhulu izigqibo eziye zenziwa ngabantu ukususela ngelo xesha—ezininzi zizigqibo ezilungileyo, ezinye zezobuyatha ukanti zimbi zizigqibo ezingendawo. Ezinye izigqibo ziye zaphumela kwintlekele yodwa. Sekunjalo, uThixo akakaze aphazamisane nelungelo lethu lokuzikhethela. NjengoBawo onothando, uThixo ulungiselele iBhayibhile ukuze isincede xa sisenza izigqibo ezilungileyo. Kwakhona uyasilumkisa ngemiphumo yokwenza ukhetho oluphosakeleyo. IBhayibhile ithi siya kuvuna oko sikuhlwayelayo.—Galati 6:7.
Ukwenza Izigqibo Kwimibandela Yobuqu
UThixo uyasixelela indlela avakalelwa ngayo ngemibandela ethile, aze asiyalele ngokuthe ngqo oko sifanele sikwenze. Noko ke, kwimibandela eliqela, iBhayibhile ayinikeli mithetho ingqalileyo esixelela ngoko sifanele sikwenze kwimibandela yobuqu. Kunoko, inikela ulwalathiso oluphangaleleyo ukuze umntu azenzele ukhetho ngendlela afuna ngayo. Ngokomzekelo, phawula oko ikutshoyo ngokuzonwabisa.
IZibhalo zithi uYehova ‘nguThixo onoyolo.’ (1 Timoti 1:11) ILizwi lakhe lithi ‘kukho ixesha lokuhleka nexesha lokudloba.’ (INtshumayeli 3:1, 4) IBhayibhile ithi uKumkani uDavide wadlalela abanye umculo. (1 Samuweli 16:16-18, 23) UYesu waya kumsitho womtshato yaye wafak’ isandla ekonwabiseni abantu apho xa watshintsha amanzi aba yiwayini.—Yohane 2:1-10.
Noko ke, iBhayibhile inikela esi silumkiso singqalileyo: “Ohamba nezilumko uya kuba sisilumko naye, kodwa osebenzisana neziyatha uya kuhlelwa bububi.” (IMizekeliso 13:20) ‘Ukuqhula okungamanyala’ nokuziphatha okubi kumenza buhlungu uThixo yaye kunokubonakalisa ubuhlobo bethu naye. (Efese 5:3-5) Xa utywala bungalawulwa kwiindibano zokuzonwabisa, loo nto inokuphumela kwiingxaki ezinkulu. (IMizekeliso 23:29-35; Isaya 5:11, 12) Kwakhona uYehova uThixo uluthiyile ugonyamelo.—INdumiso 11:5; IMizekeliso 3:31.
Ezi ndinyana zeBhayibhile zisinceda sikujonge ukuzonwabisa ngendlela akujonga ngayo uThixo. Xa esenza izigqibo, amaKristu asebenzisa imigaqo yeBhayibhile. Kakade ke, mntu ngamnye uya kuvuna oko akulimileyo.—Galati 6:7-10.
Ngokufanayo, amaKristu akhuthazwa ukuba enze izigqibo zobulumko ezivumelana nemigaqo yeBhayibhile xa kusiziwa kumbandela wesinxibo, umtshato, indlela yokukhulisa abantwana nakwimicimbi yoshishino. Oku kuquka ukusebenzisa le migaqo nakwimibandela engachazwanga ngokuthe ngqo eZibhalweni, kodwa emncedayo umntu enze isigqibo esivumelana nesazela sakhe. (Roma 2:14, 15) Xa esenza izigqibo kwimibandela yobuqu, amaKristu afanele asebenzise lo mgaqo: “Enoba niyatya okanye niyasela okanye nenza nantoni na eyenye, zonke izinto zenzeleni uzuko lukaThixo.”—1 Korinte 10:31.
Xa sisenza izigqibo kwimibandela yobuqu, siya kuba senza kakuhle ukuba sisebenzisa umgaqo othi sifanele ‘singagxuphuleki kwimicimbi yabanye.’ (1 Tesalonika 4:11) Kudla ngokufuneka ukuba amaKristu akhethe phakathi kwezinto ezininzi ezingangqubaniyo nokuthanda kukaThixo. Ngoko ukhetho lomnye umKristu lusenokwahluka kolwamanye. Ibingayi kumkholisa uThixo into yokubona abakhonzi bakhe behlabana amadlala. (Yakobi 4:11, 12) IBhayibhile inikela eli cebiso lobulumko: ‘Makungabikho namnye kuni obandezeleka ngenxa yokuba ngugqada-mbekweni kwimicimbi yabanye abantu.’—1 Petros 4:15.
Ukwenza Isigqibo Sokukhonza UThixo
IBhayibhile ibalaselisa iingenelo zokuthobela uThixo. Sekunjalo, uThixo akabanyanzeli abantu ukuba bamkhonze. Kunoko umema izidalwa zakhe ezingabantu ukuba zimkhonze. Ngokomzekelo, iBhayibhile ithi: “Ngenani, masinqule size siqubude; masiguqe phambi koYehova uMenzi wethu.”—INdumiso 95:6.
Eso simemo sadluliselwa kuSirayeli wamandulo. Kwiminyaka engaphezu kwama-3 500 eyadlulayo, uhlanga lakwaSirayeli lwama phambi kweNtaba yeSinayi, yaye uThixo wafundisa ezo zigidi zabantu unqulo lokwenyaniso njengoko luchazwe kuMthetho kaMoses. Ngoku zazifanele zenze ukhetho: Ngaba zaziza kunqula uThixo okanye zazingayi kumnqula? Zenza siphi isigqibo? Ngazwinye zathi: “Sikulungele ukukwenza nokukuthobela konke akuthethileyo uYehova.” (Eksodus 24:7) Zenza isigqibo sokukhonza uYehova.
Kwinkulungwane yokuqala, uYesu waqalisa umsebenzi wokushumayela iindaba ezilungileyo zoBukumkani bukaThixo. (Mateyu 4:17; 24:14) Akazange anyanzele namnye ukuba amthelele kulo msebenzi. Kunoko, ngobubele wamema abanye, wathi: ‘Yibani ngabalandeli bam.’ (Marko 2:14; 10:21) Abaninzi basamkela eso simemo baza bamthelela kumsebenzi wokushumayela. (Luka 10:1-9) Emva kwethuba elithile, abanye bakhetha ukumshiya uYesu. UYudas wakhetha ukumngcatsha. (Yohane 6:66; IZenzo 1:25) Bengakhange banyanzelwe kodwa ngokuzithandela, abantu abaninzi baba ngabafundi ngaphantsi kolwalathiso lwabapostile. “Babenotyekelo olufanelekileyo” baza ‘baba ngamakholwa.’ (IZenzo 13:48; 17:34) Nanamhlanje, ngokuzithandela amaKristu okwenyaniso akhetha ukuthobela iLizwi likaThixo neemfundiso zikaYesu.
Kucacile ukuba, uThixo ufuna sisebenzise inkululeko yethu yokuzikhethela. Yaye esebenzisa iBhayibhile, usinika ulwalathiso oluya kusinceda senze izigqibo zobulumko. (INdumiso 25:12) Xa esenza izigqibo kwimibandela yobuqu, mKristu ngamnye ufanele ahlolisise imigaqo yobuThixo. Kungaloo ndlela kuphela esiya kuthi ngayo sinikele ‘inkonzo engcwele kuThixo ngokwamandla ethu engqiqo.’—Roma 12:1.