Indlela IBhayibhile Enokubanceda Ngayo Abantu Abanesifo Seswekile
UKUZEYISA nokuba nesimo sengqondo esifanelekileyo zezona zinto zibalulekileyo ukuze abantu abanesifo seswekile baphile kakuhle. Kodwa ukuze bakwazi ukuhlakulela ezi mpawu, kufuneka bafumane inkxaso ngalo lonk’ ixesha. Ngoko ke, amalungu entsapho nabahlobo kufuneka balumkele ukubatyisa izinto abangafanelanga bazitye, mhlawumbi bathi, ‘Khawuve nje nokuba yintwana, akuzukwenzeka nto.’ UHarry onesifo sentliziyo ne-Type 2 diabetes uthi: “Umfazi wam uyandixhasa. Akazigcini endlwini izinto aziyo ukuba andifanele ndizitye. Kodwa abanye abasiqondi isizathu soko, yaye abayazi indlela ekuba nzima ngayo maxa wambi.”
Ukuba usoloko uphakathi kwabantu abanesifo seswekile, khumbula le migaqo yeBhayibhile mibini ingundoqo, othi: “Ngamnye makafune, kungekhona ingenelo yakhe, kodwa eyomnye umntu,” nothi “uthando . . . alufuni ezalo izilangazelelo.”—1 Korinte 10:24; 13:4, 5.
Wonk’ ubani oxhalabele impilo yakhe—enoba unesifo seswekile okanye akanaso—kufuneka alwele ukuzeyisa kumbandela wokutya. IBhayibhile iyasinceda kule nkalo, kuba ibonisa ngokuphandle ukuba ngamnye kuthi kufuneka azabalazele ukuzeyisa. Ngaba usenzile isigqibo sokuhlakulela olu phawu kubomi bakho? (Galati 5:22, 23) Enye into enokusinceda yimizekelo eseBhayibhileni, njengalowo kampostile uPawulos ongumKristu. Elinye ibhinqa elinesifo seswekile lithi: “Wayeneliva elingapheliyo enyameni, ukanti waqhubeka ekhonza uThixo ngokuthembeka nangokupheleleyo. Ngoko ke, nam ndinako ukwenjenjalo!”
Ewe, uPawulos wayeqonda ukuba wayengenawo amandla okuyiguqula imeko yakhe ngoko wayamkela waza waba nempumelelo kumsebenzi wakhe wobuvangeli basemazweni. (2 Korinte 12:7-9) UDustin oneminyaka eli-18 ubudala, wazalwa eyimfama yaye xa wayeneminyaka eli-12 ubudala waba nesifo seswekile. Ubhala enjenje: “Ndiyazi ukuba kulo mhlaba akakho umntu ophila ngendlela anqwenela ukuphila ngayo. Ndikhangele phambili kwihlabathi elitsha likaThixo apho ndingayi kuba nesifo seswekile. Kum, ukuba nesi sifo yinto nje yethutyana. Singafane sithabathe ixesha elide kunomkhuhlane, kodwa ekugqibeleni siza kuphela.”
Xa wayethetha loo mazwi uDustin wayecinga ngethemba elisekelwe eBhayibhileni lokuba abantu baya kuphila ubomi obufezekileyo kumhlaba oyiparadesi ngaphantsi koBukumkani bukaThixo. (ISityhilelo 21:3, 4) ILizwi likaThixo lithembisa ukuba ngaphantsi kolawulo lukaThixo, ‘akakho ummi oya kuthi: “Ndiyagula.”’ (Isaya 33:24; Mateyu 6:9, 10) Ngaba ungathanda ukufumana inkcazelo engakumbi ngokuphathelele esi sithembiso seBhayibhile? Qhagamshelana namaNgqina kaYehova asekuhlaleni, okanye ubhalele kubapapashi beli phephancwadi kwidilesi efanelekileyo kwezidweliswe kwiphepha 5.
[Umfanekiso okwiphepha 12]
Kubalulekile ukuzeyisa nokuhlala unesimo sengqondo esifanelekileyo