Amanzi—Isiselo Esixabisekileyo Ebomini

XA WAYETHETHA nomfazi ongumSamariya owayesikha amanzi equleni, uYesu wathetha ngomthombo ompompoza amanzi anika ubomi obungunaphakade. (Yohane 4:14) Nangona wayethetha ngamanzi okomfuziselo, amanzi okoqobo abalulekile ebomini, yi-oksijini kuphela ebaluleke ngaphezu kwamanzi. Umntu unokuphila iiveki eziliqela engafumani kutya kodwa unokuphila malunga neentsuku ezintlanu kuphela ngaphandle kwamanzi!

Malunga nesithathu kwisine sobunzima bomzimba wethu ngamanzi. Ngokomzekelo, ama-75 ukusa kuma-85 ekhulwini obuchopho bethu ngamanzi, yaye kwizihlunu zethu amanzi angama-70 ekhulwini. Phakathi kwezinye izinto, amanzi ayasinceda ukuze setyise ukutya yaye aluncedo ekudluliseleni izondlo zomzimba kwiiseli. Ashenxisa ityhefu nezinye izinto ezingafunwayo ngumzimba, abangela ukuba amalungu omzimba nobholobholo angomi yaye agcina ubushushu bomzimba bukumlinganiselo ofanelekileyo. Kodwa ngaba ubusazi ukuba ukusela amanzi aneleyo kunokuba negalelo ekuhliseni umzimba?

Sela Amanzi Ukuze Uhlise Umzimba

Okokuqala, amanzi akanazo ii-kilojoules, akanamafutha, akana-cholesterol, yaye ane-sodium encinane. Okwesibini, abangela umntu angatyi kakhulu. Okwesithathu, amanzi acola amafutha asemzimbeni. Njani? Kaloku, xa kungekho manzi aneleyo kwizintso, azikwazi kusebenza kakuhle. Isibindi senza umsebenzi wezintso, kodwa oko kubangela ukuba isibindi singakwazi ukucola amafutha kakuhle. Ngaloo ndlela umzimba uyawagcina amafutha, aze umntu atyebe. Ngenxa yoko, njengoko uGqr. Donald Robertson weSouthwest Bariatricnch Nutrition Center yaseScottsdale, eArizona, eUnited States esitsho, “ukusela amanzi ngokwaneleyo kuluncedo xa umntu efuna ukwehla emzimbeni. Xa umntu ofuna ukwehla emzimbeni engaseli manzi ngokwaneleyo, umzimba awukwazi ukuwacola kakuhle amafutha.”

Enyanisweni, xa umntu enamanzi amaninzi emzimbeni udla ngokutyeba. Ngenxa yoko, abantu abaninzi abadla ngokuba namanzi amaninzi emzimbeni baye bacinge ukuba ukuze bacombulule le ngxaki kufuneka bangawaseli kakhulu amanzi. Noko ke, loo mbono ayichananga. Xa umzimba ungawafumani ngokwaneleyo amanzi, uye ugcine amanzi akhoyo ezinyaweni, ezandleni nasemilenzeni. Ngoko iingcali ngokuphathelele izondlo zomzimba zikhuthaza ukuba sinike umzimba oko ukufunayo—amanzi aneleyo. Yaye khumbula ukuba xa usitya ityuwa eninzi, umzimba wakho uya kugcina amanzi angakumbi okungxenga le tyuwa.

Sela Amanzi Ngokwaneleyo

Ngokomlinganiselo, suku ngalunye emzimbeni wakho kuphuma amanzi amalunga neelitha ezimbini kulusu, emiphungeni, emathunjini nakwizintso. Suku ngalunye sikhupha amanzi amalunga nesiqingatha selitha xa siphefumla. Xa singawabuyiseli la manzi, akuyi kubakho manzi emizimbeni yethu. Ezinye zeempawu zomntu ongenamanzi emzimbeni kukuqaqanjelwa yintloko, ukudinwa, ukuqaqanjelwa zizihlunu, umchamo omdaka, ukungakwazi ukunyamezela ubushushu, ukoma komlomo namehlo.

Ngoko ke, sifanele sisele amanzi angakanani? UGqr. Howard Flaks, oyingcali ekuncedeni abantu abatyebe ngokugqithiseleyo, uthi: “Umntu ophile kakuhle ufanele asele iiglasi zamanzi ezisibhozo ukuya kwezilishumi ngosuku, ngeglasi elingana nekota yelitha. Kufuneka usele amanzi angaphezu koko ukuba ungumntu othanda ukuqeqesha umzimba okanye ukuba uhlala kwindawo enemozulu eshushu. Yaye umntu ongaphezulu ngeekhilogram ezilishumi kubunzima obufanelekileyo ufanele asele enye iglasi yamanzi ukongezelela kwezo kulindeleke ukuba azisele.” Noko ke, abanye abantu bathi ufanele usele amanzi kuphela xa unxaniwe, nangona xa sele unxanwe kakhulu kusenokwenzeka ukuba akusenamanzi konke konke emzimbeni.

Ngaba unokusela siselo simbi endaweni yamanzi? Nangona kufanelekile ukusela iziselo ezenziwe ngeziqhamo nemifuno, ezi ziselo zinee-calories. Kwakhona, iziselo ezineswekile nobisi oluninzi zibangela ukuba umzimba ufune amanzi amaninzi, kuba kufuneka amanzi ukuze umzimba ukwazi ukuzetyisa. Utywala neziselo ezine-caffeine njengekofu neti zibangela ukuba umntu achame kakhulu, yaye ngenxa yoko kuye kufuneke umntu asele amanzi angakumbi ukuze kubuyiselwe loo manzi aphumileyo. Ayikho into enokuthabatha indawo yamanzi. Ngoko, kutheni ungaseli iglasi yamanzi kanye ngoku?

[Ibhokisi/Umfanekiso okwiphepha 13]

Amacebiso Okukunceda Usele Amanzi Ngokwaneleyo

● Phatha ibhotile yamanzi.

● Sela iglasi yamanzi rhoqo xa usitya.

● Sela amanzi ngaphambi kokwenza umthambo, xa uwenza, nasemva koko.

● Ngexesha oqhele ukusela ikofu ngalo sela amanzi.

● Ukuze amanzi aphuma empompeni abe nencasa wagalele ilamuni okanye uwahluze.

[Inkcazelo Ngomfanekiso okwiphepha 12]

Photo: www.comstock.com