UMyezo Wezilwanyana WaseNairobi—Apho Izilwanyana Zizula-zula Ngokukhululekileyo

UMyezo Wezilwanyana WaseNairobi—Apho Izilwanyana Zizula-zula Ngokukhululekileyo

NGUMBHALI KAVUKANI! EKENYA

LICALA emva kwentsimbi yesithandathu kusasa. Ngasempuma elundini phayaa, ilanga lithi thaa ngathi bubuqaqawuli besacholo esimfusa. Ukuthi gqi kwalo kuthetha ukuqalisa kwemini entsha, yaye imitha yalo ihlaba kwiifestile zezakhiwo zeeofisi ezingoorhec’ izulu, kutsho kuvele umbala ongayiwayo obugolide. Kumgama nje ongephi ukusuka kwezi ofisi, kwenzeka nto ithile ebangela umdla.

Kukho ingonyama ezimele kwingca ende, ezama ukuchwechwela i-impala ebizonwabele isitya ingca. Isiva ukuba ukufa kufikile, le nyamakazi yenza owenkawu njengoko ithiwe mbende yile ngonyama. Emva koko iba ngunomji ezi zilwanyana zileqana. Ukuba le ngonyama iyalufumana olu sizana lwesilwanyana, iya kuluthi qwaka-qwaka iphel’ intw’ ibithethwa.

Umbono omhle ngolo hlobo wokuleqana kwezilwanyana, yinto yomhla nezolo kuMyezo Wezilwanyana WaseNairobi, okufuphi nemida yesixeko esilikomkhulu saseKenya, iNairobi. Izilwanyana zalapho zihlala kufuphi nabantu. Kaloku, ngowe-1962 kwakukho ingonyama eyayizula-zula ngaphandle kwenye yeehotele zodidi, ekusenokwenzeka ukuba yayibanga loo mhlaba mkhulu eyayifudula izula-zula kuwo. Kwenzeka njani ukuze abantu bahlale kunye nezilwanyana zasendle kwesi sixeko?

Isiqalo Esinzima

Ukusekwa kwalo myezo kwakungeyondlwan’ iyanetha. Kwafuneka koyiswe imiqobo emininzi ngaphambi kokuba izilwanyana zikwazi ukuxhamla inyhweba yokuba nekhaya elikhuselekileyo. De kwaba sekuqaleni kwenkulungwane yama-20, izilwanyana zazifudula zizula-zula ngokukhululekileyo kuloo mmandlakazi useMpuma Afrika. Abantu balapho bebesoloko behlala kunye nezilwanyana zasendle, bedlisa imihlambi yabo kufuphi nazo. Abanye abantu babegqala izilwanyana ezithile njengento abanokubhenela kuyo ngomhla kaxakeka!

Kwathi kusenjalo, kwelo lizwe kwagaleleka abazingeli bexhobe ngoombayimbayi, uninzi lwabo lufuna ukuzenzela igama njengabazingeli. Phakathi kwabo kwakukho noMongameli waseUnited States, uTheodore Roosevelt, owafika eKenya ngowe-1909 eqokelela izinto zendalo eziza kugcinwa kwiimyuziyam. Ehamba nama-600 abathwali-mithwalo neencutshe zabazingeli, wabulala izilwanyana ezingaphezu kwama-500 waza wathumela iimfele zazo kwilizwe lakhe. Kwangelo xesha kwakukho nomnye umzingeli owaziwayo uEdward, iNkosana yaseWales. Elo phulo labo lokuzingela lakhuthaza nabanye abantu ukuba babe ngabazingeli. Kakade ke, kwakulula ukudubula izilwanyana ngembumbulu kunokusebenzisa isaphetha notolo.

Ukugqitywa kokwakhiwa kweLunatic Line, igama esasibizwa ngalo isiporo sikaloliwe esiphakathi kweKenya neUganda, abantu baqala ukuza kuhlala kummandla ongqonge iNairobi, nto leyo eyenza kwanzima ngakumbi ukuba izilwanyana zizula-zule ngokukhululekileyo. Emva kokufika kwabantu kulo mmandla, kwabonakala ngathi izilwanyana ziza kuphela apho.

Kwandula ke, kwiminyaka yee-1930, abantu bavakalisa izimvo zabo ngempatho-mbi yezilwanyana. Phakathi kwabo bantu kwakukho uArchie Ritchie, owayengumgcini wezilwanyana ngelo xesha, noMervyn Cowie, owayegcina iingxelo zemali. Kwiintlanganiso nakumaphephandaba, babongoza abaphathi belo thanga ukuba benze umyezo ezaziza kubiyelwa kuwo izilwanyana nowawuza kunciphisa—okanye uthintele—ukubulawa kwazo. Urhulumente wayemadolw’ anzima ukukwamkela oko. Wayengazimiselanga ukunikisa ngaloo mhlaba ukuba ube yindawo yokugcina izilwanyana ekubeni loo ndawo yayikhangeleka ngathi iza kuba sesona sixeko sikhulu kwiMpuma Afrika.

Loo mizamo yokulondoloza indalo yaphinda yasingelwa phantsi ebudeni bemfazwe yehlabathi yesibini xa imikhosi yayiziqeqesha yaza yonakalisa loo mmandla ungumyezo wezilwanyana ngoku. Nezilwanyana zaba ngamaxhoba emfazwe. Ngenxa yokuba kwakusoloko kukho amajoni apho izilwanyana zayeka ukoyika abantu, yaye oko kwabangela ukuba zifune ukubatya. Ukuze kuthintelwe oko, ezinye izilwanyana, kuquka imazi yengonyama eyayidumile ekwakusithiwa nguLulu nomhlambi eyayihamba nawo owawuthandwa, zabulawa.

Noko ke, ngenxa yokuthamba kweentliziyo zabasemagunyeni, yoyiswa imiqobo emininzi, baza abalondolozi bendalo bafeza iinjongo zabo. Emva kwexesha elide kusenziwa loo msebenzi, ekugqibeleni ngoDisemba 16, 1946, uMyezo Wezilwanyana WaseNairobi—umyezo wokuqala onjalo eMpuma Afrika—wagqitywa, yaye wavulwa yirhuluneli yelo thanga laseKenya, uSir Philip Mitchell.

Umyezo Wokonwabisa Iindwendwe

Xa uthelekiswa neminye imiyezo yezilwanyana eseMpuma Afrika, uMyezo Wezilwanyana WaseNairobi mncinane. Kuqikelelwa ukuba ubukhulu balo myezo bulingana nezikwekhilomitha ezili-117, yaye isango lawo likumgama ongaphantsi kweekhilomitha ezili-10 ukusuka kumbindi wesixeko iNairobi. Noko ke, bobo bubuncinane bawo obuwenze waduma. Zimbalwa ehlabathini iindawo ezintle njengeli khusi lezilwanyana, apho iindwendwe zikwaziyo ukubukela kakuhle isixeko esikhula ngokukhawuleza iNairobi nezilwanyana zasendle ezikulo myezo waseAfrika.

Ubuncinane balo myezo bunceda indwendwe zikwazi ukubona inkoliso yezilwanyana ezikhulu, ngaphandle kweendlovu, zihlanganisene ndawonye kunaxa zithe saa kwimiyezo neendawo zokugcina izilwanyana ezinkulu. Kulo myezo kukho iintlobo zezilwanyana ezanyisayo ezili-100 neentlobo zeentaka ezingaphezu kwama-400. Lo myezo usecaleni kwendlela ezingena ngayo iinqwelo-moya xa ziza kuhlala kwisikhululo saseNairobi.

Umntu otyelele eNairobi uyakwazi ukuphuma kubutofotofo behotele yale mihla esixekweni, adlule ngenqwelo-mafutha kwizakhiwo ezingayiwayo zeeofisi, aze kwimizuzu nje engephi abe sele efikile kuloo mathafa, amatyholo namahlathi. Apho, unokukwazi ukubukela iingonyama nezinye izilwanyana zileqana. Ukubona ezi zilwanyana zisukela amaxhoba emva kwezo zakhiwo zide zesixeko ngumbono ongenakukhawuleza ulibaleke.

Lo myezo uzaliswe zizilwanyana zasendle, ezifana neenyathi, amahlosi, iingwenkala, iindlulamthi, iinkawu, amakhulu eenyamakazi nomkhombe omnyama onqabileyo nosengozini yokuphela. Inkoliso yazo ihlala apha ngokusisigxina. Ngexesha lembalela uFebruwari, uMatshi, uAgasti noSeptemba, unokubona imihlambi emikhulu yezilwanyana ezifudukayo, njengemihlambi yeenqu, ithe thande ecaleni kwamaqula amanzi akulo myezo.

Kwamanye amaqula, njengakumaqula eemvubu, kukho ezi ngxilimbela zimile okomphanda yaye zihlala emanzini imini yonke, ziphume ebusuku xa zisiya kutya. Abantu banokuzishiya iinqwelo-mafutha zabo baze bahambe kwiindledlana ezikufuphi nala maqula. Noko ke, nali ilizwi lesilumkiso: Ezi ndlela zinokuba yingozi, ekubeni kwamanye aloo maqula kuhlala iingwenya, ekusenokwenzeka ukuba ziphumle ecaleni kwala maqula, yaye zisenokungabonwa ziindwendwe ezingacingelanga nto! Ukuze zingakutyi, kuya kuba bubulumko ukuba uhambe nabagcini bomyezo abaqeqeshiweyo.

Kulo myezo kukho iintlobo ngeentlobo zeentaka. Eli likhaya elisisigxina leenciniba, eyona ntaka inkulu ehlabathini, engaphezu kweemitha ezimbini ukuphakama. Xa uphos’ iliso esibhakabhakeni ubona amaxhalanga, iintaka ezingathandwayo ngabantu, endanda phezu kwedolophu ezingela izinto ezifileyo. Nakuba imbi nje le ntaka, iluncedo kulo myezo kuba itya zonke izidumbu ezinokusasaza iintsholongwane eziyingozi kwezinye izilwanyana.

Maxa wambi, usenokubona ingxangxosi. Emva kweendlebe, le ntaka ineentsiba ezinde ezifana nezo zokubhala zazisetyenziswa ngoonobhala mandulo. Ekubeni isoloko igxabhagxabhisa, iba ngathi inamadinga amaninzi ekufuneka iwaphumeze. Ezinye iintaka ezikhoyo kulo myezo ngoothekwane, amahem, izinqola-mthi nookhwalimanzi.

Ungafane ube mncinane nje lo myezo, kodwa unezityalo nezilwanyana ezahlukahlukeneyo. Kumhlaba omalunga nesi-6 ekhulwini kwintshona yalo myezo, kuthe thande ihlathi, apho kuna imvula eziimilimitha ezingama-700 ukusa kwezili-1 100 ngonyaka. Apha umntu unokubona ukushinyana nje kwemithi phakathi kwayo ekukho i-Cape chestnut ne-croton ethi ndijonge. Kwicala elisezantsi nelikwimpuma yalo myezo kukho amathafa, iintlambo nemimango, apho imvula ina ngomlinganiselo weemilimitha ezingama-500 ukusa kwezingama-700. Kukho ingca ekuthiwa yi-red oat, i-desert dates, umthi i-arrow-poison, neentlobo ezahlukahlukeneyo zomnga eziwutsho ube yintlango yokwenene loo mmandla.

Enye into entle kule ndawo ngamatye enze umchankcatho ophakame kangangeemitha ezimalunga ne-100. La mathambeka anokunxaphisa nabo bathanda ukunyuka intaba—abo bakulungeleyo ukuzama ukunyuka kuwo!

Isisongelo Salo Myezo

Iingxaki ezininzi ezenza kube nzima ukugcina izilwanyana kulo myezo zibangelwa ngabantu. Ngenxa ‘yophuhliso’ olwenziwa ngabantu kwelo, uMyezo Wezilwanyana WaseNairobi usenokuthi shwaka kungekudala. Isixeko saseNairobi, esabangela ukuba ihlabathi lihlokome xa sasiqala ukwakhiwa siyanda yaye oko kubangela ukuba ibe ncinane indawo yokuhlala izilwanyana. Njengoko besanda abantu abahlala esixekweni, iya inqaba ngakumbi indawo yokuhlala yaye iya isiba ncinane nendawo yokuhlala izilwanyana kungekho nanto zinokuyenza ngaloo nto. Nemichiza elahlwa yimizi-mveliso ekufuphi isisisongelo kuzo zonke izinto eziphila kulo myezo.

Enye into ebalulekileyo kulo myezo kukuba izilwanyana zibe neendlela zokuhamba xa zifuduka. Inxalenye enkulu yalo myezo ibiyelwe ukuze izilwanyana zingangeni esixekweni. Njengoko zisiya zisiba ninzi iindawo ezilinywayo nemfuyo isanda, kuba nzima ukuba ezi zilwanyana zikwazi ukufuduka zihambe kwisiqwenga esingabiyelwanga esikumazantsi alo myezo. Ukuvalwa ngokupheleleyo kweso siqwenga kunokuba yingozi. Izilwanyana eziphumileyo zisiya kufuna ukutya kwamanye amadlelo zisenokungakwazi ukuphinda zibuyele kuloo myezo! Ukuze kuqinisekiswe ukuba eso siqwenga sihlala sikho, iKenya Wildlife Service, eyona ntlangano iphambili ekulondolozweni kwezilwanyana zasendle kwelo, yathenga umhlaba okufuphi nalo myezo. Phezu kwazo nje ezi ngxaki, uMyezo Wezilwanyana WaseNairobi usaqhubeka unomtsalane kumawaka eendwendwe ezityelela apho minyaka le zize kubona ubuhle bawo.

[Umfanekiso okwiphepha 16]

Indlulamthi

[Umfanekiso okwiphepha 17]

Ihlosi