Ukwenza Ukhetho Oluchaphazela Impilo Yakho
UKUTYA ngendlela efanelekileyo nokuzigcina usempilweni kusoloko kunzima. Ngenxa yeengcinezelo zanamhlanje, kudla ngokuba lula ukutya “ukutya okusele kulungile” kunokupheka yaye kuba lula ukuchitha ixesha phambi komabonwakude okanye kwikhompyutha kunokulichitha usebenza. Noko ke, ukwenza olu khetho kunokubangela iingxaki zempilo ezingakumbi kubantu abakhulileyo nasebantwaneni.
Iphephancwadi iAsiaweek lithi, eAsia “ukwanda kwabantu abathanda ukutya okunamafutha neswekile, nabathanda ukuhlala nje bengenzi nto kubangela ukwanda kwesifo seswekile.” Okubuhlungu kukuba, esi sifo sihlasela nabantu abaselula. Yaye eKhanada iThe Globe and Mail inikela ingxelo yokuba “abaphandi bafumanisa ukuba ngumntwana omnye kwabasixhenxe otya iziqhamo nemifuno eyaneleyo kwabo bangaphantsi kweminyaka elishumi yaye bangaphezulu kancinane kwesiqingatha abadlala ngokwaneleyo de babile.” Le ngxelo ithi ukuphila ngale ndlela kwenza aba bantwana “babe nesifo sentliziyo ngokukhawuleza xa bekwiminyaka yama-30 ubudala.”
Ngokufanayo, iingcali ngokuphathelele ukulala zithi kusenokufuneka abantu abadala balale kangangeeyure ezisibhozo yonk’ imihla yaye bona abaselula kufuneka balale ixesha elingakumbi kunelo. Enyanisweni, kwizifundo zeUniversity of Chicago, abafana abasempilweni ababelala iiyure ezine nje kuphela kangangeentsuku ezintandathu ezilandelelanayo baba nezigulo zempilo ngokuqhelekileyo ezidla ngokuphatha abantu abadala. Nangona abantu abaninzi bencama ubuthongo ngenxa yomsebenzi, isikolo okanye ukuzonwabisa, imiphumo yoko inokubenza bangabi namveliso. UJames Maas ophanda ngemibandela yokulala kwiCornell University yaseNew York uthi: “Ukwenza uphela sonwabe kwahlukile ekwenzeni into ngoxa uthe qwa, nokunikela ingqalelo kwahlukile ekozeleni okanye ulale ngoxa uqhuba kuhola wendlela.”
Kakade ke, zikho nezinye izinto ezichaphazela impilo yethu. Ngokomzekelo, ukujonga izinto ngesimo sengqondo esifanelekileyo kunokusinceda sihlale sisempilweni. Yaye ukuba nenjongo yokwenene ebomini kuya kusishukumisela ukuba senze izigqibo eziya kusinceda sihlale sisempilweni.