IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g04 2/8 iphe. 3-4
  • UThixo Unegama!

No video available for this selection.

Sorry, there was an error loading the video.

  • UThixo Unegama!
  • Vukani!—2004
  • Amanqaku Afanayo
  • Igama LikaThixo
    Vukani!—2017
  • Ngaba UThixo Unalo Igama?
    Imibuzo YeBhayibhile Iyaphendulwa
  • Isizathu Sokuba Simele Silazi IGama LikaThixo
    Igama LikaThixo Eliya Kuhlala Ngonaphakade
  • Ngubani Igama LikaThixo?
    IMboniselo Evakalisa UBukumkani BukaYehova (Kawonke-wonke)—2019
Khangela Okunye
Vukani!—2004
g04 2/8 iphe. 3-4

UThixo Unegama!

Ngubani igama likaThixo? Bonke abantu banamagama. Abantu abaninzi bade bathiye nezilwanyana zabo zasekhaya. Ngaba bekungayi kuba sengqiqweni ukuba uThixo abe negama? Ngokungathandabuzekiyo, ukuba negama nokulisebenzisa yinto ebalulekileyo kulwalamano lwabantu. Ngaba akufanele kube njalo nangolwalamano lwethu noThixo? Okumangalisayo kukuba, izigidi zabantu ezithi zikholelwa kuThixo ekuthethwa ngaye eBhayibhileni azilisebenzisi igama lakhe. Kodwa igama likaThixo belisaziwa kangangeenkulungwane. Kolu ngcelele lwamanqaku, uza kufunda ngamaxesha elalisetyenziswa kakhulu ngawo igama likaThixo. Okubaluleke ngakumbi, uza kufunda oko iBhayibhile ikutshoyo ngokubaluleka kokwazi igama likaThixo.

NGENKULUNGWANE ye-17, amazwe aseYurophu amaninzi ayesenza iingqekembe ezinegama likaThixo. Ingqekembe yaseJamani eyenziwa ngowe-1634 yayinegama elithi Yehova elalibhalwe ngokucacileyo. Ezi ngqekembe zazisaziwa ngokubanzi ngokuba ziingqekembe zikaYehova yaye zabakho kangangamashumi eminyaka.

Igama elithi Yehovaa yindlela ebeliguqulelwa ngayo igama likaThixo kangangeenkulungwane. NgesiHebhere, ulwimi olufundwa ukusuka ngasekunene ukusa ngasekhohlo, eli gama liba ngoonobumba abane, יהוה. Aba nobumba bane besiHebhere—abaguqulelwa ngokuthi YHWH—babizwa ngokuba yiTetragrammaton. Kangangamashumi eminyaka, igama likaThixo lalibhalwa ngolu hlobo kwiingqekembe zaseYurophu.

Igama likaThixo lifumaneka nakwizakhiwo, amatye ezikhumbuzo, kwizinto ezenziwe ngamagcisa nakumaculo ecawa amaninzi. Ngokutsho kwentyilalwazi yaseJamani iBrockhaus, kwakuyinto eqhelekileyo ukuba iinkosana ezingamaProtestanti zinxibe ikhonkco elineTetragrammaton elenziwe ngathi lilanga. Olu phawu, olwalukho kwindwe nakwiingqekembe lwalukwabizwa ngokuba yiJehovah-Sun. Ngokucacileyo, abantu baseYurophu ababetyekele kakhulu elunqulweni ababephila ngenkulungwane ye-17 neye-18 babesazi ukuba uThixo uSomandla unegama. Okubaluleke nangakumbi kukuba, babengoyiki ukulisebenzisa.

Igama likaThixo lalisaziwa nakuMathanga aseMerika. Ngokomzekelo, khawucinge ngejoni leAmerican Revolution uEthan Allen. Ingxelo awayibhala ngowe-1775 ibonisa ukuba wayedla ngokuthi iintshaba zifanele zinikezele “egameni likaYehova Omkhulu.” Kamva, ngoxa kwakulawula uAbraham Lincoln, abacebisi abaninzi babedla ngokukhankanya uYehova xa bebhalela lo kaLincoln. Kukho namanye amaxwebhu aseMerika amandulo aqulethe igama likaThixo afumaneka kumathala eencwadi amaninzi. Le yimizekelo nje embalwa yendlela elalibaluleke ngayo igama likaThixo kwiinkulungwane ezidluleyo.

Kuthekani namhlanje? Ngaba liye lalityalwa igama likaThixo? Nakanye. Igama likaThixo livela kwiindinyana ezininzi zeeBhayibhile ezahlukahlukeneyo. Xa unokuya kwithala leencwadi okanye uzenzele uphando kwizichazi-magama usenokubona ukuba igama elithi Yehova yindlela eyamkelekileyo yokuguqulela iTetragrammaton. Ngokomzekelo, iEncyclopedia International itsho ngokucacileyo ukuba igama elithi Yehova “yindlela eyamkelekileyo yokuguqulela igama likaThixo elingcwele lesiHebhere.” Uhlelo lwakutshanje lweThe New Encyclopædia Britannica luthi uYehova “ligama uThixo awayebizwa ngalo ngamaKristu angamaYuda.”

‘Kodwa’ usenokuzibuza, ‘ngaba nanamhlanje abantu bafanele bazixhalabise ngegama likaThixo?’ Igama likaThixo, nokuba libhalwe ngayiphi indlela, likho kwiindawo zikawonke-wonke ezininzi. Ngokomzekelo, igama elithi Yehova likho kwisakhiwo esithile eNew York City. Kwakwesi sixeko, eli gama libhalwe ngesiHebhere kumhombiso owenziwe ngamatye amancinane kwisikhululo sikaloliwe esiphithizelayo esihamba ngaphantsi komhlaba. Noko ke, liyinyaniso elokuba kumawaka abantu abahamba kwezi ndawo, bambalwa abacinga ukuba libalulekile eli gama.

Ngaba igama likaThixo libalulekile kwindawo ohlala kuyo? Okanye ngaba xa bethetha ngoMdali abantu abaninzi bathi “Thixo” ngokungathi elo ligama lakhe? Xa uhlolisisa usenokuphawula ukuba abantu abaninzi abanamdla wokwazi enoba uThixo unalo kusini na igama. Kuthekani ngawe? Ngaba ukufumanisa kulula ukusebenzisa igama likaThixo elithi Yehova?

[Umbhalo osemazantsi]

a Kolu ngcelele lwamanqaku, kuboniswa iindlela ezingama-39 elibhalwa ngazo igama likaYehova kwiilwimi ezingaphezu kwama-95.

[Ibhokisi/Umfanekiso okwiphepha 4]

Ukumkani Owazisa Abanye Igama LikaYehova

Ngowe-1852 iqela labavangeli basemazweni landuluka eHawaii lisinge kwiziqithi zaseMicronesia. Laliphethe ileta evela kuKumkani Kamehameha III, owayelawula iziQithi zaseHawaii ngelo xesha. Le leta, eyayibhalwe ngolwimi lwaseHawaii neyayisiya kubalawuli beziQithi zePacific abohlukahlukeneyo yayinenxalenye ethi: “Kwiziqithi zenu kuza kufika abathunywa boYena Thixo Uphakamileyo uYehova, yaye baza kunifundisa iLizwi Lakhe ukuze nisindiswe ngonaphakade. . . . Ndicinga ukuba aba bathunywa balungileyo nifanele nibaphathe ngentlonelo nize nibe nobuhlobo kubo yaye ndiyanibongoza ukuba niyiphulaphule imiyalelo yabo. . . . Ndicebisa ukuba nilahle izithixo zenu, nize namkele iNkosi uYehova njengoThixo wenu, nimnqule nize nimthande kwaye Yena, uya kunisikelela aze anisindise.”

[Umfanekiso]

UKumkani Kamehameha III

[Inkcazelo]

Hawaii State Archives

[Umfanekiso okwiphepha 3]

ITetragrammaton, “oonobumba abane” abamela igama likaThixo lesiHebhere

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share