Ukungalali Ngokwaneleyo—Ngaba Le Ngxaki Iyanda?
ABANTU abazizigidi namhlanje ‘banetyala’ elikhulu. Eli tyala linokonakalisa iinqwelo-mafutha zabo, libaphulukanise nomsebenzi wabo lide libeke nemitshato yabo engozini. Linokuchaphazela impilo yabo nobomi babo ngokunzulu. Linokubangela ukuba inkqubo yomzimba yokuzikhusela ingasebenzi kakuhle, aze umntu asulelwe lula zizifo. Likwangunobangela wezifo ezahlukahlukeneyo njengesifo seswekile, isifo sentliziyo, ukutyeba ngokugqithiseleyo nezinye izifo. Ukanti, abantu abaninzi abaneli tyala abaliqondi kakuhle.
Unobangela wezi ngxaki kukungalali ngokwaneleyo kanti kufuneka umntu alale ngokwaneleyo ukuze abe sempilweni. Oku kunokubangelwa kukuba umntu, ngenxa yendlela aphila ngayo alale ixesha elifutshane okanye angakwazi ukulala ngenxa yesigulo esithile anaso.
Iingcali zonyango zithelekelela ukuba emhlabeni wonke, umlinganiselo wexesha umntu alilalayo busuku ngabunye ungaphantsi ngeyure enye. Ngoxa oku kusenokubonakala kungenamsebenzi, ukungalali ngokwaneleyo busuku ngabunye kwabantu abangamawaka amathandathu ezigidi abasehlabathini lonke, kuye kwabangela ukuba kwenziwe uphando olungakumbi ngezifo ezahlukahlukeneyo ezibangelwa kukungalali nengozi eziyibangelayo kubomi bomntu.
Abezonyango babefudula becinga ukuba wonke umntu ongakwaziyo ukulala ngokwaneleyo unengxaki nje yokuphuthelwa. Noko ke, iqela labaphandi elasekwa yi-U.S. Congress lachaza uluhlu lwezinto ezili-17 ezahlukahlukeneyo ezibangela abantu bangalali ngokwaneleyo. Eneneni, ingxaki yokungalali ngokwaneleyo ibangelwa zizinto ezininzi kangangokuba igqalwa njengomqondiso ochaza undonakele, kanye njengokuba ifiva ingumqondiso wokuba kukho isifo esithile emzimbeni.
Kwanokungalali ngokwaneleyo ngamax’ athile kunokuba yingozi. Ngokomzekelo, khawucinge ngoTom. Nangona wayengumqhubi welori onamava, waya kuntlitha eso sithuthi sinamavili ali-18 wayehamba ngaso kudonga olusecaleni kwendlela, wachitha iilitha ezingama-400 ze-sulfuric acid kuhola wendlela. UTom uthi: “Ndandilele.” Uphando ngokuphathelele iingozi ezenzeka koohola beendlela ababini baseUnited States, lwabonisa ukuba ngama-50 ekhulwini abantu abafa kwezo ngozi zibangelwa ngabaqhubi abozelayo.
Kwakhona, cinga ngendlela anokuba sesichengeni ngayo umntu osebenza nomntu owozelayo. UAnn Williamson ongumphandi waseOstreliya uthi: “Emva kweeyure ezili-17 ukusa kwezili-19 bengalali [abo babenenxaxheba], kwezinye iimvavanyo babefana nje nomntu [onomlinganiselo wotywala] oyi-0.05% egazini lakhe okanye babenokude bamdlule.” Ngamany’ amazwi, babefana nomqhubi osele utywala wada wagqithisa kumlinganiselo ovumelekileyo kwamanye amazwe! Ngenxa yamakhulu amawaka eengozi zezithuthi okanye iingozi ezenzeka emsebenzini nyaka ngamnye ehlabathini lonke, ilahleko ebakho kwimveliso nakwintsapho ayithetheki.a
Ziziphi ezinye izinto ezinokubangela umntu angalali ngokwaneleyo? Enye yazo kukusebenza imini nobusuku, yonke imihla ungaphumli. I-USA Today ithi le “yingxaki enkulu ebangele utshintsho olukhulu kwindlela esiphila ngayo,” yongezelela ngelithi “ininzi ingeniso eyenziwa kwiivenkile namaziko avula ubusuku nemini kodwa abantu abafumani thuba lakulala.” Kumazwe amaninzi abantu babukela iinkqubo zikamabonwakude baze baxakeke yi-Internet ngexesha ebebefanele ukuba balele ngalo. Enye into eqoba abantu kukudandatheka okudla ngokubangelwa ngamaxhala neengxaki zobomi. Okokugqibela, kukho izifo ezahlukahlukeneyo ezinokubangela abantu bangalali ngokwaneleyo.
Oogqirha abaninzi bathi kunzima gqitha ukuba abantu bayiqonde into yokuba ukungalali ngokwaneleyo yingxaki enzulu. Omnye ugqirha wathi, kwabanye abantu nokudinwa okungapheliyo luphawu lokuba “bangabantu bodidi oluphezulu.” Yaye ngenxa yokuba imeko yabo idla ngokungakhawulezi ibonakale, abantu abanengxaki yokungalali ngokwaneleyo basenokungabuqondi ubunzulu bengxaki yabo. Abanye baqiqa ngelithi, ‘Ndiyaluphala’ okanye basenokuthi, ‘Ndiyoyisakala ngenxa yeengxaki zobomi ngoko ndisoloko ndiqobekile’ okanye bathi ‘Ndisoloko ndidiniwe kuba andifumani thuba lakuphumla ngokwaneleyo.’
Kunzima kakhulu ke ukunyanga le ngxaki yabantu abangalali ngokwaneleyo. Kodwa xa abantu benokuqonda ukuba kuthetha ukuthini ukulala ngokwaneleyo bakwazi nokubona iimpawu zokungalali ngokwaneleyo, banokuncedakala ukuze benze iinguqulelo ezifunekayo. Ukuqonda iimpawu zokungalali ngokwaneleyo kunokusindisa ubomi.
[Umbhalo osemazantsi]
a Kuthiwa ukudinwa kuye kwanegalelo kuninzi lwezona ngozi zimanyumnyezi eziye zenzeka kule nkulungwane yama-20. Bona uVukani! wesiNgesi kaFebruwari 8, 2001, iphepha 6.
[Umfanekiso okwiphepha 22]
Kwanokungalali ngokwaneleyo ngamathub’ athile kunokubangela iingozi ezimbi