Abantu Abaselula Bayabuza . . .

Kutheni UThixo Evumela Sibandezeleke?

“UThixo uhleli ezulwini kamnandi, ngoxa thina aph’ emhlabeni sibandezeleka.”—UMary.a

ABANTU abaselula namhlanje bazalelwa kwihlabathi elinenkohlakalo. Iinyikima ezimanyumnyezi nezinye iintlekele zemvelo ezisuba imiphefumlo yamawaka yinto eqhelekileyo. Ezindabeni kusoloko kuthethwa ngeemfazwe nokuhlasela kwabanqolobi. Abantu esibathandayo bagqitywa kukugula, izifo, ulwaphulo-mthetho neengozi. NoMary okhankanywe ngasentla wehlelwa zizinto ezibuhlungu. La mazwi abuhlungu wawathetha emva kokufelwa nguyise.

Yinto yokwemvelo ukuba xa sisehlelwa zizinto ezibuhlungu sikhathazeke, sizive silahlekelwe de maxa wambi sibe nomsindo. Usenokuzibuza, ‘Zibangelwa yintoni ezi zinto?’ ‘Kutheni zisehlela mna nje?’ okanye ‘Kutheni zisehla ngoku?’ Imibuzo efana nale ifuna iimpendulo ezanelisayo. Kodwa ukuze sifumane iimpendulo ezichanileyo, sifanele sizifumane kumthombo ofanelekileyo. Kodwa njengoko uTurrell oselula watshoyo, maxa wambi abantu “baba buhlungu gqitha kangangokuba bangakwazi ukuzikisa ukucinga.” Ngoko ufanele uzame ukuthoba izibilini ukuze ukwazi ukubona izinto ngeliso eliphangaleleyo.

Ukujamelana Neemeko Ezinzima

Kusenokuba buhlungu ukucinga ngokufa nokubandezeleka kodwa ezi zizinto ezisehlelayo. UYobhi wayibeka ngendlela ecacileyo le meko xa wathi: “Umntu, ozelwe ngumfazi, unobomi obufutshane obuzele kukuphazamiseka.”—Yobhi 14:1.

IBhayibhile ithembisa ihlabathi elitsha eliya kuba ‘nobulungisa.’ (2 Petros 3:13; ISityhilelo 21:3, 4) Noko ke, ngaphambi kokuba abantu baphile phantsi kwezo meko zintle, bafanele batyhubele kwiimeko ezimbi ezingazange zabonwa ngaphambili. IBhayibhile ithi: “Kwazi oku, ukuba ngemihla yokugqibela kuya kufika amaxesha amanqam ekunzima ukujamelana nawo.”—2 Timoti 3:1.

Liya kuthabatha ixesha elide kangakanani ixesha lamanqam? Abafundi bakaYesu bakha bawubuza umbuzo ofana nalo. Kodwa uYesu akazange abaxelele usuku okanye ilixa elingqalileyo eliya kupheliswa ngayo eli hlabathi lintyumpantyumpeka ebunzimeni. Kunoko, uYesu wathi: “Lowo unyamezele kwada kwasekupheleni uya kusindiswa.” (Mateyu 24:3, 13) Amazwi kaYesu akhuthaza ukuba sijong’ izinto ngeliso eliphangaleleyo. Ngaphambi kokuba sifike isiphelo, sifanele sikulungele ukunyamezela izinto ezininzi ezimbi.

Ngaba UThixo Ubekek’ Ityala?

Ngoko, ngaba kusengqiqweni ukubek’ ityala uThixo ngenxa yokuvumela kwakhe ukubandezeleka? Akunakumbek’ ityala xa ucinga ukuba uThixo uthembisa ukuphelisa konke ukubandezeleka. Kungekho ngqiqweni nokuvakalelwa ukuba nguThixo obangela izinto ezimbi. Izinto ezimbi ezininzi sukuba iyingozi nje. Ngokomzekelo, yiba nomfanekiso-ngqondweni womthi owiswa ngumoya uze wenzakalise umntu. Abantu basenokuthi oku kubangelwe nguThixo. Kodwa asingoThixo owise loo mthi. IBhayibhile iyasinceda siqonde ukuba izinto ezinjalo zibangelwa “lixesha nasisihlo esingenakubonwa kwangaphambili.”—INtshumayeli 9:11.

Kwakhona ukubandezeleka kunokubangelwa kukungakwazi kwethu ukwenza izigqibo ezichanileyo. Masithi iqela lolutsha lizintyintya ngotywala lize emva koko lihambe ngenqwelo-mafutha. Lehlelwa yingozi emanyumnyezi. Lityala likabani? Ngaba lityala likaThixo? Akunjalo, livuna imiphumo yesigqibo salo.—Galati 6:7.

‘Kodwa ngaba uThixo akanamandla okuphelisa konke ukubandezeleka ngoku?’ usenokuzibuza. Amanye amadoda anokholo ekuthethwa ngawo eBhayibhileni akha azibuza oko. Umprofeti uHabhakuki wabuza uThixo: “Kutheni na ukhangela abo benza ngobuqhophololo, uqhubeka uthe cwaka xa ongendawo eginya olilungisa ngaphezu kwakhe?” Noko ke, uHabhakuki akazange ngokungxama afikelele kwisigqibo esingachananga. Wathi: ‘Ndiza kuhlala ndilindile, ukuze ndibone oko aya kukuthetha kum.’ Kamva, uThixo wamqinisekisa ukuba ‘ngexesha elimisiweyo’ uza kukuphelisa ukubandezeleka. (Habhakuki 1:13; 2:1-3) Ngoko nathi sifanele sibe nomonde, silindele ukuba uThixo aphelise konke ukubandezeleka ngexesha lakhe alimisileyo.

Kuphephe ukwenza isigqibo esingachananga sokuba ngandlel’ ithile uThixo ufuna sibandezeleke okanye uyasivavanya. Liyinyaniso elokuba iimvamvanyo zinokusenza sibe neempawu ezintle yaye iBhayibhile ithi iimvamvanyo uThixo avumela ukuba sityhubele kuzo zinokuluqinisa ukholo lwethu. (Hebhere 5:8; 1 Petros 1:7) Ngokwenene, abantu abaninzi abatyhubela kwiimvavanyo okanye ebunzimeni baba nomonde novelwano. Kodwa asifanele sigqibe ngelithi nguThixo obangela babandezeleke. Ukucinga ngolo hlobo kubonisa ukuba uThixo asimgqali njengomntu onothando nonobulumko. IBhayibhile ithi: “Makungabikho nabani na, xa esesilingweni othi: ‘Ndilingwa nguThixo.’ Kuba uThixo akanakulingwa ngezinto ezimbi yaye naye akalingi namnye.” Ngokwahlukileyo koko ‘sonke isipho esilungileyo naso sonke isipho esigqibeleleyo’ sivela kuThixo!—Yakobi 1:13, 17.

Isizathu Sokuba UThixo Avumele Ubungendawo

Buvela phi ubungendawo? Khumbula ukuba uThixo unabachasi—ngokuyintloko ‘lowo ubizwa ngokuba nguMtyholi, noSathana, lowo ulahlekisa umhlaba omiweyo uphela.’ (ISityhilelo 12:9) UThixo wabeka abazali bethu bokuqala, uAdam noEva kwihlabathi elingenazo iinkathazo. Kodwa uSathana wenza uEva wakholelwa ukuba wayenokuphumelela ngaphandle kolawulo lukaThixo. (Genesis 3:1-5) Okubuhlungu kukuba, uEva wabukholelwa ubuxoki bukaSathana waza akamthobela uThixo. UAdam wathelela kule mvukelo. Waba yintoni umphumo? IBhayibhile ithi: “Ukufa kwasasazeka kubo bonke abantu.”—Roma 5:12.

Kunokuba akhawuleze alungise izinto ngokutshabalalisa uSathana nabalandeli bakhe, uThixo wabona kufanelekile ukuba alinde kudlule ithuba elithile. Kwakuza kunceda ngantoni oko? Phakathi kwezinye izinto, kwakuza kubangela uSathana angqinwe elixoki! Ekuhambeni kwethuba kwakuza kubonisa ukuba ukuzikhwebula kuThixo kuzisa imiphumo ebuhlungu. Ngaba akukhange kube njalo? “Ihlabathi liphela lisemandleni ongendawo.” (1 Yohane 5:19) Ngokubhekele phayaa, ‘umntu ulawule umntu yaba kukwenzakala kwakhe.’ (INtshumayeli 8:9) Iicawa zabantu zifundisa iingcamango ezikhabanayo. Imilinganiselo yokuziphatha iwohloke ngeyona ndlela. Akukho ndlela yokulawula oorhulumente abangakhange bayizame. Batyobele izivumelwano zoxolo, bamisela imithetho kodwa abantu abaqhelekileyo basengamahlwempu nanamhlanje. Kungasathethwa ke ngokubandezeleka okubangelwa ziimfazwe.

Ngokucacileyo, kufuneka uThixo angenelele aze aphelise bonke ububi! Kodwa oku kuza kwenzeka kuphela ngexesha likaThixo elifanelekileyo. De kube lelo xesha, sinelungelo elingathethekiyo lokuxhasa urhulumente kaThixo ngokuthi sithobele imithetho nemiyalelo yakhe efumaneka eBhayibhileni. Xa sisehlelwa zizinto ezimbi, sinokuthuthuzelwa lithemba eliqinisekileyo lehlabathi elingenazo iinkathazo.

Akuwedwa

Sekunjalo, xa sijamelene nokubandezeleka sinokuzibuza ‘Kutheni oku kusehlela mna?’ Noko ke, umpostile uPawulos usikhumbuza ukuba ayisithi sodwa ababandezelekayo. UPawulos uthi “yonke indalo iyagcuma kwaye isentlungwini de kube ngoku.” (Roma 8:22) Ukwazi oku kunokukunceda ukwazi ukumelana nokubandezeleka. Ngokomzekelo, uhlaselo lwabanqolobi lukaSeptemba 11, 2001, olwenzeka eNew York City naseWashington, D.C. lwamkhathaza kakhulu uNicole. Uthi: “Ndandothukile yaye ndisoyika.” Kodwa satshintsha isimo sakhe sengqondo emva kokufunda indlela amanye amaKristu akwazi ngayo ukumelana nale ntlekele.b “Ndaphawula ukuba andindedwa. Ngoko yathomalala intlungu yam.”

Kwezinye iimeko, bubulumko ukufuna umntu onokuthetha naye—umzali, umhlobo oqolileyo okanye umdala ongumKristu. Ngokuphalaza imbilini yakho kumntu omthembileyo, uya kutsho ufumane “ilizwi elilungileyo” lokhuthazo. (IMizekeliso 12:25) Omnye umKristu oselula waseBrazil uthi: “Utata wafa kwiminyaka esithoba eyadlulayo kwaye ndiyazi ukuba uYehova uza kumvusa ngeny’ imini. Kodwa eny’ into eyandincedayo kukubhala phantsi indlela endivakalelwa ngayo. Kwakhona, ndandidla ngokuzityand’ igila kubahlobo bam abangamaKristu.” Ngaba unawo ‘amaqabane okwenyaniso’ onokuphalaza imbilini kuwo? (IMizekeliso 17:17) Ngoko wavumele akuncede ngothando! Ungoyiki ukukhala okanye ukuchaza indlela ovakalelwa ngayo. Kaloku, nakuYesu zakha “zathi waxa iinyembezi” emva kokufelwa ngumhlobo wakhe!—Yohane 11:35.

IBhayibhile iyasiqinisekisa ukuba ngeny’ imini, ‘siya kukhululwa ekukhotyokisweni kukonakala’ size sinandiphe ‘inkululeko ezukileyo yabantwana bakaThixo.’ (Roma 8:21) De elo xesha lifike, abantu abalungileyo abaninzi basenokubandezeleka. Ukwazi isizathu sokuba babandezeleke—nokwazi ukuba kungekudala ukubandezeleka kuza kuphela kufanele kusithuthuzele.

[Imibhalo esemazantsi]

[Umfanekiso okwiphepha 14]

Kusenokukunceda ukuvakalisa intlungu yakho