Basinda Kwizikhukula!

Ngumbhali kaVukani! eSwitzerland

NGO-OKTOBHA 2000, kwafunyanwa iingxelo zezikhukula ezivela kwiindawo ezahlukahlukeneyo. Izandyondyo zeemvula ezazikhukulisa kwanto ephambi kwazo, kuquka imithi, zana kwimimandla eneentaba!

Ezi mvula zana nakwiphondo laseValais, kumazantsi eSwitzerland. Lo mmandla wahlulwa kubini yiRhône, umlambo obangelwa kukunyibilika kwamaqhekeza omkhenkce amakhulu aseRhône, usuka kwiCentral Alps uye kuma ngeLake Geneva—umgama oziikhilomitha ezili-170. Amanzi avela kwiintaba ezikumacala omabini alo mlambo ehla ngemilanjana emininzi eyahlukahlukeneyo ngobukhulu aye kufika kulo mlambo. Ngokuqhelekileyo, amanzi ahamba nje kakuhle kule milanjana. Kodwa iba yintlekele yodwa xa wonke loo mmandla ugutyungelwe ngamanzi.

Le yinto eyenzeka eGondo kumda weItali. Le dolophana isezintabeni inabemi abali-150 yagutyungelwa ludaka olunamatye olwatshabalalisa inxalenye enkulu yale dolophu. Kungekudala, izandyondyo zeemvula zahlasela nakweminye imimandla yeValais. Iindlela neziporo zikaloliwe zavaleka, yaye izindlu zagutyungelwa ludaka olunamatye. Kwezinye iindawo udaka lwafumba kangangeemitha ezi-4 ukuphakama. Elinye ibhinqa labukela njengoko udaka olwalukhukulisa amatye amakhulu nemithi oluphakame kangangeemitha ezingama-30 lwalusiza kwidolophana elihlala kuyo!

UMarkus noTabitha, isibini esitshatileyo sasihlala eMörel ngexesha lale ntlekele. UMarkus uthi: “Savuswa sisithonga esikhulu emva kweye-6:00 kusasa. Ndaphuma nethotshi ndaya kujonga ukuba kwenzeka ntoni, yaye ndamangaliswa gqitha yinto endayibonayo. Izindlu neebhulorho zazonakaliswe ngamatye amakhulu yaye kwakukho inqwelo-mafutha eyayintlitheke kwindlu yommelwane wethu. Kude kufuphi, omnye ummelwane wethu wayevaleleke endlwini nenkosikazi yakhe. Ndabanceda baphuma ngefestile. Ekubuyeleni kwam endlwini, kwakusele nje ithuba elincinane lokuba mna noTabitha siqokelele ubumpahlana bethu.”

UMarkus noTabitha ngamaNgqina kaYehova yaye bafumana ikhusi kwamanye amakholwa ahlala kummandla ongazange uchatshazelwe yile ntlekele. UMarkus uthi: “Nangona sasindayo, kwadlula iintsuku ngaphambi kokuba uTabitha asilibale esi siganeko.” Yintoni eyamncedayo wakwazi ukujamelana ngokuphumelelayo nale ntlungu? “Lunxulumano nenkxaso yabazalwana noodade wethu,” utsho uTabitha, aze alek’ umsundulo ngelithi: “Nomdla owaboniswa ngabantu abaninzi esihlala nabo.”

UMarkus noTabitha bakhumbula amazwi eMizekeliso 18:24 athi kukho “umhlobo onamathela ngokusondele ngakumbi kunomntakwenu.” Hayi indlela abaxabiseke ngayo abahlobo abanjalo ngamaxesha eentlekele!

[Imaphu ekwiphepha 18]

(Ukuba ufuna inkcazelo ehlahlelwe kakuhle, yiya kwimpapasho)

Ummandla owachaphazelekayo

IGondo

[Umfanekiso okwiphepha 18]

UMarkus noTabitha

[Inkcazelo Ngomfanekiso okwiphepha 18]

Mise à disposition par www.crealp.ch