Imbono YeBhayibhile
Kutheni Umele Uwugqale Njengongcwele Umtshato?
INKOLISO yabantu namhlanje ithi iyakholelwa kubungcwele bomtshato. Kodwa, kutheni imininzi kangaka nje imitshato eqhawulwayo? Kwabanye, umtshato sisithembiso nje esenziwa ngabantu abathandanayo nesivumelwano esisemthethweni. Kodwa izithembiso zinokwaphulwa. Kubantu abawugqala ngolu hlobo umtshato kuba lula ukuwuqhawula xa izinto zingahambi kakuhle.
UThixo ulijonga njani ilungiselelo lomtshato? Impendulo ifumaneka kwiLizwi lakhe iBhayibhile, kumaHebhere 13:4 ithi: “Umtshato mawubekeke phakathi kwenu nonke.” Igama lesiGrike eliguqulelwe ngokuthi “mawubekeke” liqulethe ingcamango yento exabisekileyo nehlonelwa gqitha. Xa into siyixabisa, siyiphatha ngononophelo siyilondoloze ukuze ingalahleki, nditsho nangempazamo. Kumele kube njalo nangelungiselelo lomtshato. AmaKristu amele agqale umtshato njengobekekileyo—njengento exabisekileyo efuna ukukhuselwa.
Kucacile ukuba, uYehova uThixo wayila umtshato njengelungiselelo elingcwele phakathi kwendoda nomfazi. Kodwa sinokubonisa njani ukuba siwugqala njengaye umtshato?
Uthando Nentlonelo
Ukuze ilungiselelo lomtshato libekeke, kufuneka amaqabane atshatileyo ahlonelane. (Roma 12:10) Ebhalela amaKristu enkulungwane yokuqala umpostile uPawulos wathi: “Ngamnye wenu makamthande umfazi wakhe njengoko ezithanda; ke yena umfazi, makabe nentlonelo enzulu ngendoda yakhe.”—Efese 5:33.
Yinyaniso ukuba, maxa wambi iqabane lomtshato lisenokwenza okuthile okungabonisi uthando okanye intlonelo. Ukanti, amaKristu afanele abonise uthando nentlonelo. UPawulos wabhala: “Qhubekani ninyamezelana yaye nixolelana ngesisa ukuba nabani na unesizathu sokukhalazela omnye. Kanye njengoko uYehova wanixolela ngesisa, yenzani njalo nani.”—Kolose 3:13.
Ixesha Nengqalelo
Izibini ezitshatileyo eziwugqala njengongcwele umtshato wazo zichitha ixesha zinyamekela iintswelo zokwenyama neemvakalelo zomnye nomnye. Oku kuquka iintlobano zesini. IBhayibhile ithi: “Indoda mayimnike okumfaneleyo umfazi wayo; kodwa nomfazi makenze ngokunjalo endodeni yakhe.”—1 Korinte 7:3.
Noko ke, kukho izibini ezitshatileyo eziye zabona kuyimfuneko ukuba umyeni afuduke okwethutyana ukuze zizuze umvuzo othe chatha. Zingalindelanga, maxa wambi oko kwahlukana kuye kutsale ixesha elide. Izihlandlo ezininzi, oku kwahlukana kuzisa iingxaki emtshatweni, maxa wambi kukhokelele kukrexezo nakuqhawulo-mtshato. (1 Korinte 7:2, 5) Ngenxa yoko, izibini ezininzi ezitshatileyo ezingamaKristu ziye zakhetha ukuncama izinto eziphathekayo kunokuba zibeke umtshato wazo eziwugqala njengongcwele emngciphekweni.
Xa Kuvela Iingxaki
Xa kuvela iingxaki, amaKristu awuhlonelayo umtshato wawo akangxameli ukwahlukana okanye ukuqhawula umtshato. (Malaki 2:16; 1 Korinte 7:10, 11) UYesu wathi: “Wonk’ ubani oqhawula umtshato nomfazi wakhe, ngaphandle kwangenxa yohenyuzo, umenza isisulu sokrexezo, yaye nabani na otshata umfazi oqhawule umtshato uyakrexeza.” (Mateyu 5:32) Xa isibini sikhetha ukuqhawula umtshato okanye ukwahlukana ngoxa singenazo izizathu zeZibhalo asiwuhloneli umtshato.
Indlela esiwugqala ngayo umtshato iboniswa nasisiluleko esisinikelayo kwabo baneengxaki zomtshato ezinzulu. Ngaba sikhawuleza sicebise ukuba bahlukane? Enyanisweni, kusenokubakho izihlandlo apho kukho izizathu zokwahlukana, njengaxa kukho impatho-mbi egqithiseleyo okanye ukungondliwa ngabom.a Kwakhona, njengoko kuboniswe ngasentla, iBhayibhile ivumela uqhawulo-mtshato kuphela xa kukho iqabane elihenyuzileyo. Nalapho, amaKristu akamele athi ngokungafanelekanga aphembelele isigqibo sabanye kwezo meko. Ngapha koko, ngumntu onengxaki yomtshato—kungekhona lowo unikela icebiso—oya kujamelana nemiphumo yeso sigqibo.—Galati 6:5, 7.
Musa Ukuwuthabatha Lula Umtshato
Kwezinye iindawo iye yaxhaphaka into yokuba abantu batshate ukuze bafumane amaphepha-mvume asemthethweni okuhlala kwelinye ilizwe. Ngokuqhelekileyo umntu wenza isivumelwano nommi welo lizwe, amhlawule ukuze amtshate. Ngokufuthi, nakuba zitshatile ezi zibini zidla ngokungahlali kunye, mhlawumbi kungabikho kwabuhlobo obo. Ngokukhawuleza akuba efumanekile loo maphepha-mvume ebefunwa uyaqhawulwa loo mtshato. Zigqala umtshato wazo njengesivumelwano sezoshishino.
IBhayibhile ayivumelani noko kungakhathali. Kungakhathaliseki ukuba yintoni ebaqhubayo, abantu abatshatayo bangena kwilungiselelo elingcwele uThixo aligqala njengeqhina lobomi bonke. Abantu abenza ezo zivumelwano bamanyana njengendoda nomfazi, yaye abanakwahlukana baze batshate omnye umntu ngaphandle kwezizathu zeBhayibhile.—Mateyu 19:5, 6, 9.
Njengokuba kunjalo ngezinto ezixabisekileyo, umtshato ophumelelayo ufuna umzamo nomonde. Abantu abangabuqondiyo ubungcwele bawo bakhawuleza baxhome. Okanye basenokukhetha ukuhlala kuloo mtshato bengonwabanga. Kwelinye icala, abakuqondayo ukuba ngcwele komtshato bayazi ukuba uThixo ulindele bahlale kunye. (Genesis 2:24) Bayaqonda nokuba xa besebenzisana emtshatweni, babeka yena njengoMyili welungiselelo lomtshato. (1 Korinte 10:31) Ukuba nale mbono kubenza bazimisele ukunyamezela besebenza nzima ukuze umtshato wabo uphumelele.
[Umbhalo osemazantsi]