Abantu Abaselula Bayabuza . . .

Yintoni Ephosakeleyo Ngokuzinkcinkca Ngotywala?

“Nangona sasisela kangangexesha elide, mna nomhlobo wam sahamba kwelo theko ngentsimbi yokuqala ekuseni siziphathele ibhotile yethu ye-‘whiskey.’ Sasigoduka—sihamba sisela. Emva koko ndikhumbula kuphuma ilanga, yaye ndaphawula ukuba besilahleka. Enyanisweni, sasihambe kuhola wendlela. Andazi ukuba sasinda njani ukuze singatshayiswa ziimoto.”—UClay.a

UKUZINKCINKCA NGOTYWALA. Abanye bathi kukusela ude unxile. Ingxelo yeU.S. National Institute on Alcohol Abuse and Alcoholism yazama ukuwucacisa ngokubanzi lo mkhwa. Yathi ukuzinkcinkca ngotywala “kunokuthiwa kukusela kwamadoda iiglasi zotywala ezintlanu nangaphezulu ngexesha elinye okanye ukusela kwamabhinqa iiglasi zotywala ezine nangaphezulu ngexesha elinye.”

Abezempilo baseUnited States bathi ukuzinkcinkca ngotywala “yeyona ngxaki iphambili” kwelo. Uphando olwenziwa kubafundi bamabanga aphakathi eNgilani, eSkotlani naseWales lwadiza ukuba “ikota yabantwana abaneminyaka eli-13 nabane-14 leminyaka ubudala lwakha ‘lwasela’ ubuncinane iiglasi zotywala ezintlanu ngexesha elinye.” Malunga nesiqingatha sabaneminyaka eli-15 neli-16 ubudala kwabo kwenziwa kubo uphando nabo bakha bakwenza oku.

Kuphando olwenziwa eUnited States, abafundi basekholeji ababini kwabahlanu bakha bazinkcinkca ngotywala ubuncinane kanye kwiiveki ezimbini ngaphambi kolo phando. Ngokutsho kweSebe Lezempilo eUnited States, “ulutsha oluneminyaka eli-12 ukusa kwengama-20 ubudala olumalunga nezigidi ezili-10,4 kuthiwa luyasela. Kolo lutsha, oluzizigidi ezisisi-5,1 luzinkcinkca ngotywala yaye oluzizigidi ezisisi-2,3 lukwenza oko ubuncinane izihlandlo ezihlanu ngenyanga.” Uphando olwenziwa eOstreliya lwadiza ukuba amantombazana azinkcinkca ngotywala ngaphezu kwamakhwenkwe—esela iiglasi ezili-13 ukusa kwezingama-30 ngexesha elinye!

Ngamaxesh’ amaninzi oku kusela kangaka kubangelwa yingcinezelo yoontanga. UCarol Falkowski ongumphandi uthi: “Kukho imidlalo emitsha neyothusayo yokusela: ukuselwa kotywala njengeqela ngenjongo yokunxila. Ngokomzekelo, kweminye kufuneka umntu athi laqa igrangqa xa kusenzeka into ethile kumabonwakude okanye ebudeni bencoko.”

Iingozi Zokuzinkcinkca Ngotywala

Nangona abanye abantu besenokukugqala ukuzinkcinkca ngotywala njengomdlalo nje, ngumdlalo oyingozi! Ukusela utywala ngokugqithisileyo kwenza ingqondo ingafumani oksijini yaneleyo; oku kunokwenza amalungu athile omzimba angasebenzi. Iimpawu zoku zisenokuquka ukuhlanza, ukungabikho zingqondweni neengxaki zokuphefumla. Kwezinye iimeko umntu unokude afe. Emva kwenyanga egqibile kwibanga leshumi, uKim oneminyaka eli-17 ubudala waya “kuzinkcinkca ngotywala.” UKim wasela iiglasi ezili-17 ngaphambi kokuba angabikho zingqondweni. Kweza udadewabo omdala waza wagoduka naye uKim. Ngentsasa elandelayo, unina kaKim wamfumana efile.

Nangona ukusela ngokugqithiseleyo kungafane kumbulale umntu, kuyingozi empilweni. “Utywala bunokuba yingozi kumalungu omzimba,” utsho uJerome Levin osisazi ngokusebenza kwengqondo. “Imithambo-luvo, isibindi nentliziyo zezona zinto zithanda ukonakaliswa butywala.” Inqaku lephephancwadi iDiscover lathi: “Uphando lwakutshanje lubonisa ukuba abantu abaselula abaselayo bazinqikel’ ilitye elineembovane. Ekubeni iingqondo zabo zisakhula de baye kufika kumashumi amabini eminyaka ubudala, abakwishumi elivisayo abasela ngokugqithiseleyo bazibeka esichengeni sokudodobalisa iingqondo zabo.” Kudla ngokuthiwa ukuzinkcinkca ngotywala kubangela amaqhakuva, imibimbi, ukutyeba ngokugqithiseleyo, ukonakala kwamalungu angaphakathi, nokuba likhoboka lotywala neziyobisi.

Zikho nezinye iingozi zokuzinkcinkca ngotywala. Xa unxilile, usenokuphathwa kakubi. Ngokulula nje, usenokubethwa okanye udlwengulwe. Kwangaxeshanye, usenokuba yingozi kwabanye abantu, wenze izinto obungayi kuzicinga nokuzicinga xa ungaselanga. Ngenxa yeso sizathu ke iBhayibhile ilumkisa ngelithi ukuba usele ngokugqithiseleyo “amehlo akho aya kubona izinto ezingaqhelekanga, yaye intliziyo yakho iya kuthetha izinto ezigwenxa.” (IMizekeliso 23:33) Imiphumo ebuhlungu isenokuquka ukonakaliswa kobuhlobo, ukungaqhubi kakuhle esikolweni nasemsebenzini, ukwaphula umthetho nobuhlwempu.b—IMizekeliso 23:21.

Ukunyanzelwa Ukuba Usele

Phezu kwazo nje iingozi ezinjengezi, abantu bakhuthazwa ukuba basele yaye utywala bufumaneka lula kumazwe amaninzi. Eneneni, ukusela utywala kwenziwa kubonakale njengento entle kwizibhengezo zikamabonwakude nakumaphephancwadi. Noko ke, abantu abaselula badla ngokuzinkcinkca ngotywala ngenxa yengcinezelo yoontanga.

Kuhlolisiso olwenziwa eOstreliya oluphathelele ukuselwa kotywala, abaselula abangama-36 ekhulwini ababuzwayo bathi ngokuyintloko basela ngenxa yokufuna “ukwamkeleka kwiimbutho.” Kwingxokozelo “yasentselweni,” umntu ngokuqhelekileyo oneentloni usenokuba yintlekisa yelo theko njengoko oontanga bakhe bemkhuthaza ukuba asele iglasi emva kwenye. UKatie oselula wagoduswa engekho zingqondweni emva kokuba enze loo nto. “Umhlobo wakhe” owayemseza, wayesithi: “Khawusele kaloku Katie, sifun’ usibonise ukuba umdala wena ngoku. Ufanele ufunde ukuyithi laqa nje.”

Umnqweno wokuzonwabisa nokwamkelwa ngabanye unamandla kangokuba phezu kwabo nje ubungqina obubambekayo bokuba ukuzintyintya ngotywala kuyingozi, kuqhubeka kuyinto ethandwayo.

Yintoni Oza Kukhetha Ukuyenza?

Umbuzo ngulo: Yintoni wena oza kukhetha ukuyenza xa kufikelelwa kumbandela wokusela? Ngaba uya kulandela oontanga bakho? Khumbula oko kuthethwa yiBhayibhile kumaRoma 6:16: “Anazi na ukuba lowo nizinikela kuye njengamakhoboka ukuze nimthobele, ningamakhoboka akhe ngenxa yokuba nimthobela?” Ukuba uvumela oontanga bakho balawule yonke into ofuna ukuyenza, uba likhoboka labo. IBhayibhile ikhuthaza ukuba uzenzele ezakho izigqibo. (IMizekeliso 1:4) Iqulethe icebiso elinokukunceda ukuphephe ukwenza iimpazamo ezinzulu. Qwalasela oko ikuthethayo ngotywala.

Enyanisweni, iBhayibhile ayikwaleli ukusela utywala, ingayichasanga nento yokuba abantu abaselula bazonwabise. Noko ke, iyasilumkisa ngokusela kakhulu. IMizekeliso 20:1 ithi: “Ingumgculeli iwayini, singumxokozelisi isiselo esinxilisayo, yaye wonk’ ubani ohamba ebhaduliswa yiyo akalumkanga.” Ewe, utywala bunokumenza ubani axokozele! Liyinyaniso elokuba busenokukonwabisa okomzuzwana, kodwa ukuba usela ngokugqithiseleyo, ‘buluma njengenyoka,’ bukushiye uneziva emzimbeni nangokweemvakalelo.—IMizekeliso 23:32.

Enye into esifanele siyikhumbule kukuba kumazwe amaninzi abantwana abavumelekanga ukuba basele utywala. AmaKristu ayayithobela loo mithetho. (Tito 3:1) Ibekelwe ukukukhusela.

Ekugqibeleni, nokona kubalulekileyo, ufanele ucinge ngeengxaki zokomoya ezinokubangelwa kukusela ngokugqithiseleyo. UYehova uThixo ufuna umkhonze “ngengqondo yakho iphela”—kungekhona ngengqondo eyonakaliswe kukusela ngokugqithiseleyo! (Mateyu 22:37) ILizwi likaThixo alichasanga nje kuphela “ukuzinkcinkca ngewayini” kodwa likwachase nokuba ‘sezindywaleni.’ (1 Petros 4:3) Ngoko ke ukuzinkcinkca ngotywala kuchasene nokuthanda koMdali wethu. Ukusela ngokugqithiseleyo kusenokumthintela ubani angabi nolwalamano olusenyongweni noThixo.

Yintoni ofanele uyenze ukuba ubanjiswe kukuzinkcinkca ngotywala? Ngokukhawuleza fumana uncedo ngokuthetha nomzali okanye umKristu oqolileyo.c Thandaza kuYehova uThixo uze ucele uncedo. Kakade ke, ‘uluncedo olufumaneka ngokukhawuleza ekubandezelekeni.’ (INdumiso 46:1) Ekubeni ukuzinkcinkca ngotywala nokusela kwabantu abaselula kudla ngokubangelwa yingcinezelo yoontanga, kusenokufuneka wenze iinguqulelo ezinkulu kwindlela okhetha ngayo abahlobo nendlela yokuzonwabisa. Ukwenza iinguqulelo ezinjalo akusayi kuba lula, kodwa ngoncedo lukaYehova usenokuphumelela.

[Imibhalo esemazantsi]

[Ibhokisi/Umfanekiso okwiphepha 31]

Ukuzinkcinkca Ngotywala—Ingxelo Ekhwankqisayo

Amanani alandelayo atyhila imiphumo emibi ebangelwa kukuzinkcinkca ngotywala kwabafundi bakwanokholeji eUnited States:

Abafayo: Nyaka ngamnye abafundi basekholeji abali-1 400 abaneminyaka eli-18 ukusa kwengama-24 ubudala bayafa ngenxa yeengozi ezihambisana notywala, kuquka iingozi zemoto

Abenzakalayo: Abafundi abangama-500 000 abaneminyaka eli-18 ukusa kwengama-24 ubudala bayenzakala ngoxa besele utywala

Abahlaselwayo: Abafundi abangaphezu kwama-600 000 abaneminyaka eli-18 ubudala ukusa kwengama-24 ubudala bahlaselwa ngomnye umfundi obesela

Abaxhatshazwa Ngokwesini: Abafundi abangaphezu kwama-70 000 abaneminyaka eli-18 ukusa kwengama-24 ubudala baxhatshazwa ngokwesini okanye badlwengulwe ngumntu ababa namadinga naye ngenxa yotywala

[Inkcazelo]

Umthombo wale ngxelo: I-U.S. National Institute on Alcohol Abuse and Alcoholism

[Umfanekiso okwiphepha 29]

Oontanga bakho basenokukukhuthaza ukuba uzinkcinkce ngotywala