Ukulwa Nokutyeba Ngokugqithiseleyo—Ngaba Asiyonkcitha-xesha?

UVUKANI! wadlan’ iindlebe nabantu abaliqela abaye balwisana neengxaki zokutyeba ngokugqithiseleyo. Ngaba baye bafumana imiphumo encumisayo? Bacebisa ntoni kwamanye amaxhoba ale ntlungu?

◼ Masithethe noMike, oziisentimitha ezili-183 ubude, iikhilogram ezili-130 ubunzima. Ngoxa wayetyebe kakhulu ubunzima bomzimba wakhe babuziikhilogram ezili-157.

UMike uthi: “Kwanaxa ndandisengumntwana ndandityebile. Yingxaki yentsapho yonke—umkhuluwa wam noodadewethu ababini nabo batyebile. Sasinomkhwa wokuyibetha siyiqwele ipleyiti nokuba seyizele iphuphuma. Yintoni eyandenza ndatshintsha indlela enditya ngayo? Ndatshintsha mhla ugqirha wandixelela ukuba ndisesichengeni sokuba nesifo seswekile! Eyona nto yandoyikisa kakhulu kukuba ndiza kuphila ngeinsulin ubomi bam bonke. Enye into ndandinengxaki yecholesterol yaye ngenxa yale ngxaki kwakufuneka ndifumane unyango.

“Umsebenzi wam wempangelo wawungandivumeli ukuba ndihambahambe, ndandisoloko ndihleli phantsi yaye ndisenza loo msebenzi nangoku. Ngoko ukuze ndihlangabezane nale ngxaki, ndizenzele ilungiselelo lokusoloko ndilolonga umzimba, ndisebenzisa umatshini wokulolonga umzimba kangangesiqingatha seyure ubuncinane izihlandlo ezithathu ngeveki. Inyathelo elilandelayo nelibalulekileyo, ndandibhala phantsi into endiyityileyo suku ngalunye. Ukwazi ukuba ingcali ecebisa ngokutya okunezondlo iza kulujonga uluhlu lwezinto endizityileyo veki nganye kwandinceda ndakwazi ukuzeyisa. Into endandiye ndiyicinge kukuba, ‘Ukuba akuyityanga akukho mfuneko yokuba uyibhale!’

“Ngenxa yoko, kwezi nyanga zili-15 zidluleyo umzimba wam uhle ngeekhilogram ezingama-28 nangona kusafuneka ndihle, kuba ndifuna ukuya kufikelela kwiikhilogram ezili-102. Ukuze ndikwazi ukufikelela olu sukelo, ndiyekile ukutya amashwamshwam, iichips nesityu esinamafutha. Kwezi nyanga zidluleyo bendisitya kakhulu iisaladi nemifuno ngendlela endingazanga ndizitye ngayo ebomini bam bonke!

“Enye into eye yandikhuthaza kukuba, njengomqhubi welori ndisoloko ndixilongwa nyaka ngamnye ukuze ndikwazi ukuvuselela iphepha-mvume lokuqhuba. Ndandisele ndisecicini lokuphulukana nalo ngenxa yokuba sesichengeni sokuphathwa sisifo seswekile. Izinto zitshintshile ngoku. Akuseyomfuneko ukuba ndisebenzise amayeza okunyanga icholesterol. Iblood pressure yam ihlile yaye andisawasebenzisi kakhulu amayeza okuyinyanga. Ndinamandla ngakumbi ngoku neengxaki zomqolo azisengako. Ndiyaphuma ngokuthe ngcembe kuluhlu lwabantu abatyebe ngokugqithiseleyo!”

UVukani!: “Ngaba inkosikazi inokuba negalelo ekuncedeni umntu anciphise umzimba?”

UMike: “Xa ufuna ukuhla emzimbeni kufuneka kubekho umntu oza kukukhuthaza. Inkosikazi yam yayidla ngokucinga ukuba iyandithanda xa indondla. Kodwa ngoku iyandinceda ukuze ndingatyi kakhulu. Andinakuyekelel’ umxakatho kuba xa ndinokwenjenjalo ndingaphinda ndityebe ngokukhawuleza.”

◼ Kwakhona cinga ngenye indoda egama linguMike yaseKansas, eUnited States. Ineminyaka engama-43 ubudala yaye iziisentimitha ezili-173 ubude. Sayibuza ngokutyeba kwayo nesizathu sokuba ibe nengxaki yokutyeba.

UMike: “Ubunzima bomzimba wam babuziikhilogram ezili-135. Ndandisoloko ndidiniwe ndingenamandla okwenza nantoni na. Ndandingakwazi nokulala kakuhle kuba ndandivaleka ndingakwazi ukuphefumla. Ngoko ndaya kwagqirha yaye wathi omnye unobangela wokutyeba kwam yiobstructive sleep apnea.a Wafumanisa nokuba ndinehigh blood pressure.”

UVukani!: “Saba yintoni ke isicombululo sezi ngxaki?”

UMike: “Ugqirha wacebisa ukuba ndisebenzise isixhobo esithile esasigcina umbhobho ongenisa umoya uvulekile xa ndilele. Loo nto yenza ukuba ndingavaleki umqala yaye ndiyakwazi ukuphefumla kakuhle. Ngenxa yoko ndakwazi ukusebenza ngakumbi emini yaye ndaqalisa ukuhla emzimbeni. Ndaqalisa nokusebenzisa umatshini wokulolonga umzimba izihlandlo ezithathu ngeveki. Ndaqalisa nokutya ngendlela eyahlukileyo, okutheth’ ukuthi ndandingasatyi kakhulu yaye ndandikuphepha ukuphinda ndizongeze ukutya. Ngoku ndihle ngeekhilogram ezingama-20 kwisithuba esingaphezu nje kancinane konyaka yaye kusafuneka ndihle ngezinye iikhilogram ezingama-20. Kuthabatha ixesha elide kodwa ndiyazi ukuba ndiza kuphumelela.”

UVukani!: “Yintoni enye eyakukhuthazayo ukuba uhlise umzimba?”

UMike: “Akukho mnandi xa usoloko usiva abantu behlekisa ngawe okanye bekugculela ngenxa yenkangeleko yakho. Abantu baye bacinge ukuba ulivila. Abayiqondi into yokuba ukutyeba ngokugqithiseleyo kunokubangelwa zizinto ezininzi. Ndicinga ukuba kwimeko yam nofuzo lunegalelo kuba abaninzi entsatsheni yakowethu batyebile.

“Noko ke, ndiyaqonda ukuba ukuze ndihle emzimbeni kufuneka ndilolonge umzimba yaye ndingatyi nokuba yintoni na.”

◼ Kwakhona uVukani! wadlan’ iindlebe noWayne waseOregon, oneminyaka engama-38 ubudala. Xa wayeneminyaka engama-31 ubudala, ubunzima bomzimba wakhe babuziikhilogram ezili-112.

UWayne: “Ngenxa yomsebenzi endandiwenza ndandisoloko ndihleli ndawonye yaye ngaloo ndlela ndingawulolongi umzimba. Ndathi ndakuya kwagqirha ndothuka kukufumanisa ukuba ndinehigh blood pressure yaye ndisesichengeni sokuphathwa sisifo sentliziyo. Wandithumela kwingcali enceda abantu ngokuphathelele ukutya okunezondlo. Le ngcali yandicebisa ukuba ndisebenzise uhlobo oluthile lokulolonga umzimba ndinciphise nokutya endikutyayo. Ndaqalisa ukuhamba umgama oziikhilomitha ezi-5 yonke imihla ndingaphumli yaye ndandivuka ngenj’ ixukuxa ntsasa nganye ndize ndilolonge umzimba. Kwafuneka ndifunde indlela entsha yokutya nokusela. Ndayeka ukutya ukutya okungenazondlo yaye ndathi ukuhlisa kancinane nasekutyeni isonka neziselo ezihlwahlwazayo ndaza ndatya kakhulu iziqhamo nemifuno. Ngoku ndihlile ukusa kwiikhilogram ezingama-80!”

UVukani!: “Ziziphi iingenelo oye waziphawula?”

UWayne: “Ndiziva ndiphilile yaye ndihlaziyekile. Ngaphambili ndandiyinto nje edangeleyo. Enye ingenelo kukuba ndiye ndawayeka amayeza ehigh blood pressure. Yaye ndivakalelwa kukuba ndingakwazi ukujonga abantu emehlweni ndisazi ukuba andizukukwekwa ngenxa yokutyeba.”

◼ UCharles (asilogama lakhe lokwenene) uziisentimitha ezili-196 ubude. Ubunzima bomzimba wakhe babuziikhilogram ezili-168.

UCharles: “Ndandikhathazwa gqitha yimpilo yaye imeko yam yayisiya isiba mandundu ngokuthe ngcembe. Ndandingakwazi ukunyuka kwizinyuko. Ndandingenamandla okwenza umsebenzi wam. Umsebenzi wam awundivumeli ukuba ndihambahambe yaye inxalenye yawo kukwenza uphando, ndikwasingatha neembopheleleko ezithile. Ndandisazi ukuba kufuneka ndihlise umzimba ingakumbi emva kokuba ndidibene nogqirha. Wandixelela ukuba ndisesichengeni sokuphathwa sistroke. Ndikhe ndababona abantu abanesi sifo. Yaye oko kwandenza ndaqonda ukuba nakanjani ndimele ndithabathe amanyathelo. Ugqirha wam wacebisa ukuba ndisebenzise umatshini wokulolonga umzimba yaye wandicebisa nangendlela endimele nditye ngayo, ngalo lonke elo xesha endibeke esweni. Ngoku sele kudlule isithuba esingangonyaka yaye ndihlile ukusa kwiikhilogram ezili-136 kodwa ndiyazi ukuba kusafuneka ndihle. Iingenelo endisele ndizifumene ukuza kuthi ga ngoku zindenza ndeyiseke ukuba yonke le migudu ndiyenzileyo ayilolize. Ngoku ndiyakwazi ukunyuka kwizinyuko yaye ndinamandla ngakumbi.”

◼ UMarta, oyinzalelwane yase-El Salvador, wakha waya kufikelela kubunzima beekhilogram ezingama-83. Wayetyebe ngokugqithiseleyo kuba wayeziisentimitha ezili-165 ubude.

UMarta: “Ndaya kwagqirha yaye watsho ngokungqongqo ukuba ndiqalise ukuhlisa umzimba. Ndayihlonela imbono yakhe njengomntu oyingcali. Wandithumela kwingcali ecebisa ngokutya okunezondlo. Yandixelela izizathu neenkcukacha ngokuphathelele indlela yokutya eyayincomela ukuba ndiyisebenzise. Yandibonisa indlela endandinokunciphisa ngayo ekutyeni neyokuyeka izinto endandingafanele ndizitye. Ekuqaleni kwakufuneka ndiye kuyo veki nganye; yaye kamva nyanga nganye ukuze ibone ukuba ndiqhuba njani. Ugqirha nengcali ngezondlo bandikhuthaza kwinkqubela endandiyenza. Ekugqibeleni, ndehla ngeekhilogram ezili-12 yaye ngoku ubunzima bomzimba wam ziikhilogram ezingama-68.”

UVukani!: “Kuthekani ngokulolonga umzimba nangokusebenzisa amayeza?”

UMarta: “Ndandingenangxaki yecholesterol, ngoko kwakungekho mfuneko yokuba ndisebenzise amayeza. Ndaqalisa ukulolonga umzimba ngokuba ndihambe ngokukhawuleza yonke imihla.”

UVukani!: “Wawusenza njani xa utyelele abahlobo baze bakunyanzele ukuba utye ukutya okungaphezu koko uqhele ukukutya?”

UMarta: “Ndandidla ngokuthi kubo, ‘Ugqirha wam ufuna nditye ngale ndlela ngenxa yempilo yam,’ ngokuqhelekileyo babengadluli kuloo mazwi.”

Ngoko ukuba utyebile okanye utyebe ngokugqithiseleyo, yintoni onokuyenza ngaloo nto? Inyanisile intetho yakudala ethi, “Xa umntu eyifuna ngokwenene into uyayifumana.” Ngaba unomnqweno wokwenza okuthile ngale ngxaki? Ukuba ungumntwana okanye umntu omdala otyebileyo yintoni onokuyenza? Nciphisa umzimba okanye uya kuphulukana nobomi bakho ngaphambi kwexesha. Zigcine uxakekile ngokwenza imisebenzi ethile uze waneliswe kukuphumeza okuthile—nditsho nezinto ezincinane njengokuhla uze unxibe impahla engaphantsi kwaleyo ubuqhele ukuyinxiba!

[Umbhalo osemazantsi]

[Ibhokisi ekwiphepha 19]

Ngaba iliposuction inokukunceda?

Yintoni iliposuction? Esinye isichazi-magama sithi: “Kukwenza utyando kuze kufunxwe izicwili ezinamanqatha kwilungu elithile lomzimba njengamathanga okanye isisu. Ikwabizwa nangokuba yisuction lipectomy.” (IAmerican Heritage Dictionary) Noko ke, ngaba esi sisicombululo sokutyeba ngokugqithiseleyo?

IMayo Clinic on Healthy Weight ithi iliposuction lutyando lokuphucula inkangeleko. Asiyondlela yokunciphisa umzimba. Ezi seli zinamanqatha zifunxwa ngombhobho omncinane ofakwa phantsi kwesikhumba. Kunokuphunguka iikhilogram eziliqela emva kolu tyando. Noko ke, “utyando alusosicombululo sengxaki yokutyeba ngokugqithiseleyo.” Ngaba akuyongozi ukwenza olu tyando? “Abantu abanezigulo ezithile ngenxa yokutyeba kuquka isifo seswekile nesentliziyo banokuba neengxaki xa besenza olu tyando.”