Imbono YeBhayibhile

Ngaba UThixo Uyavumelana Nokutshata Kwabesini Esifanayo?

KUMSITHO oqhutyelwa ecaweni, amadoda amabini abambene ngezandla phambi kobhishophu waseTshetshi. Enza “isifungo . . . phambi koThixo necawa.” Enxibe umwunduzo wakhe ombejembeje, ubhishophu usikelela ukuzimanya kwaba phambi kwabantu bonke. Emva koko esi sibini siyawolana size sincamisane yaye abantu batsho ngentswahla bevuyisana naso. Ngokutsho kwalo bhishophu, amafanasini atshatileyo “angcwele yaye afanele asikelelwe, . . . yaye kufanelekile ukuba kuthiwe: abekekile.”

Noko ke, ezinye iinkokeli zonqulo ziyithiye egazini imitshato yabantu besini esifanayo. UCynthia Brust, isithethi seBhunga leCawa yaseTshetshi, eMerika, iqela elisabambelele kwimithetho yamandulo yale cawa wathi: “Sikhathazeke gqitha sisigqibo salo [bhishophu]. Ukutshata kwabantu besini esifanayo nokuba neentlobano kwabo ngokwesini akuvumelani nemfundiso ecacileyo yeBhayibhile,” waza wongezelela esithi, “yindoda nebhinqa abafanele babe neentlobano zesini yaye nabo, bafanele babe batshatile.”

Kukho impikiswano eshushu ngalo mbandela kungekuphela nje kunqulo. Ehlabathini lonke, kukho ukungavisisani kwezobupolitika, njengokuba kukho iingxaki ezinkulu eziphathelele imibandela yasekuhlaleni, yezobupolitika, neyezoqoqosho enokuthanani nenkamnkam, imibutho yempilo neyerhafu.

Ngamaxesha amaninzi kubakho iimbambano ezingamalungelo nokwamkeleka ngokomthetho nto leyo ebangela abantu bangaboni ngaso-nye. AmaKristu okwenyaniso ayakulumkela ukuthabath’ icala yaye ayaziphepha iingxoxo zezobupolitika. (Yohane 17:16)a Sekunjalo, abathile abayihlonelayo iBhayibhile badidekile kukutshatiswa kwabantu besini esifanayo nabubufanasini. Wena uwujonga njani umtshato wabantu besini esifanayo? Uthini umthetho kaThixo ngomtshato? Indlela owujonga ngayo iluchaphazela njani ulwalamano lwakho noThixo?

NguMdali Wethu Obek’ Imithetho

Kudala ngaphambi kokuba oorhulumente babek’ imithetho ngomtshato, uMdali wethu wayesele eyibekile. Incwadi yokuqala yeBhayibhile ithi: “Indoda iya kumshiya uyise nonina, inamathele emfazini wayo baze babe nyama-nye.” (Genesis 2:24) Igama lesiHebhere eliguqulelwe ngokuthi “ umfazi,” ngokutsho kweVine’s Expository Dictionary of Biblical Words, “libhekisela kumntu olibhinqa.” UYesu waqinisekisa ukuba abantu abamanyaniswa ngomtshato “yindoda nebhinqa.”—Mateyu 19:4.

Ngenxa yoko, uThixo wamisela umtshato ukuba ube lumanyano oluhlala luhleli nolothando phakathi kwendoda nebhinqa. Amadoda namabhinqa adalelwa ukuphelelisana ukuze akwazi ukwanelisana ngokweemvakalelo, ngokomoya nangokwesini.

Ingxelo eyaziwayo yeBhayibhile yeSodom neGomora ityhila indlela uThixo avakalelwa ngayo ngobufanasini. UThixo wathi: “Isikhalo sokumangalelwa kweSodom neGomora sikhulu, ewe, nesono sazo sinzima kakhulu.” (Genesis 18:20) Ubunzulu besono sabo babonakala xa iindwendwe ezimbini zatyelela indoda elilungisa uLote. “Amadoda aseSodom, ayingqonga indlu, kususela enkwenkweni kwesa kwindoda endala, bonke abantu belihlokondiba elinye. Yaye bamemeza kuLote besithi kuye: ‘Aphi laa madoda angene kwakho ngobu busuku? Wakhuphele kuthi ukuze sibe neentlobano zokwazana nawo.’” (Genesis 19:4, 5) IBhayibhile ithi: “Abantu baseSodom babengabenzi bobubi yaye babengaboni abakhulu kuYehova.”—Genesis 13:13.

Amadoda “atshisekelana ngamandla, amadoda ekhanuka amadoda.” (Roma 1:27) “Alandela inyama ngokuchasene nemvelo.” (Yude 7) Kumazwe ekulwelwa kuwo amalungelo amafanasini, bambi basenokungavumi ukuba kusetyenziswe ibinzana elithi ‘ichasene nemvelo’ xa kuchazwa indlela yokuziphatha yamafanasini. AsingoThixo na, ofanele asichazele ngezinto zemvelo? Kaloku nguye owayalela abantu bakhe bamandulo esithi: “Uze ungayilali indoda njengokuba kulalwa umfazi. Yinto ecekisekayo leyo.”—Levitikus 18:22.

Imbopheleleko Onayo KuThixo

IBhayibhile icacile: UThixo akavumelani okanye akungxengxezele ukuba lifanasini. Ubachasile nabantu ‘abavumelana nabo.’ (Roma 1:32) Yaye “umtshato” awenzi ubufanasini bube nesidima. Umyalelo kaThixo wokuba “umtshato mawubekeke phakathi kwenu nonke” awuquki umtshato wamafanasini, awucekisayo.—Hebhere 13:4.

Sekunjalo, ngoncedo lukaThixo, nabani na unokufunda ‘ukukhwebuka kuhenyuzo,’ nto leyo equka ubufanasini, ukuze “akwazi ukusizuza esakhe isitya ngobungcwalisa nembeko.” (1 Tesalonika 4:3, 4) Kuyavunywa ukuba oku akusoloko kulula. UNathanb, owayelifanasini ngaphambili, wathi: “Ndandicinga ukuba andisoze ndikwazi ukuyeka.” Kodwa wakwazi ukuyeka ngoncedo ‘lomoya kaThixo wethu.’ (1 Korinte 6:11) Njengokuba uNathan wafumanisayo, akukho ngxaki angenakuyisingatha uYehova, onokusinika amandla noncedo olufunekayo ukuze sikwazi ukuphila ngemithetho Yakhe nokuze sizuze intsikelelo Yakhe.—INdumiso 46:1.

[Imibhalo esemazantsi]

[Inkcazelo Ngomfanekiso okwiphepha 16]

Photo by Chris Hondros/Getty Images