Ukutsaleleka KuMdali Ngenxa Yobuhle Benyaniso

KUBALISA UTSUYOSHI FUJII

KWIMINYAKA ethile edluleyo, ndafumana ilungelo elinqabileyo. Njengesekela likaSenei Ikenobo, inqununu yesikolo saseIkenobo ekwakufundiswa kuso indlela yokulungisa iintyatyambo, ndandilungisa iintyatyambo kwigumbi elihle gqitha kwiBhotwe laseTokyo, eJapan. Sasisebenza sibekwe esweni ngeyona ndlela. Kulo meko inzima sasisebenza kuyo, ndandixhalabele ukuba ndingachithi nethontsi eli lamanzi phantsi. Leyo yayiyenye yezinto eyayigxininiswa kumsebenzi wam wokulungisa iintyatyambo. Mandikhe ndikuchazele indlela endaqalisa ngayo ukuba ngumlungisi weentyatyambo.

Ndazalwa ngowe-1948 kwisiXeko saseNishiwaki, esikumntla-ntshona weKobe, eJapan. Ukususela ebuntwaneni bendidla ngokuchukumiseka ngokwenene bubuhle beentyatyambo ezitshintshatshintsha ngokwamaxesha onyaka. Noko ke, ndakhuliswa ngumakhulu owayengumBhuda onenzondelelo, oko kwabangela ukuba ndingacingi nokucinga ngoMdali.

Umama wayefundisa kwaye usafundisa i-ikebana, okanye ukulungisa iintyatyambo, kwidolophu yasekhaya. EJapan, ikebana, okanye ikado (ukulungisa iintyatyambo), zizifundo ezixatyiswe gqitha. Nangona uMama engazange andifundise ngokungqalileyo obu buchule, waba nempembelelo kakhulu kum. Xa kwafika ixesha lokuba ndenze isigqibo ngento endandiza kuyenza kwixesha elizayo, ndafuna ukufundela i-ikebana. Utitshala wam nomama bandikhuthaza ukuba ndiye kufunda eyunivesithi, kodwa ndakhetha ukufunda kwiKholeji yaseIkenobo. I-Ikenobo le yeyona nkqubo indala yeIkebana eJapan. Ndakuba ndamkelwe, ndazimisela gqitha ekufundeni ngobuchule bokulungisa iintyatyambo.

Ukuqalisa Ukufunda I-Ikebana

NgesiJapan igama elithi ikebana lithetha intyatyambo ephilayo. Makhe ndikuchazele. Iintyatyambo ezifakwe e-emeleni kwivenkile ethengisa iintyatyambo zisenokukhangeleka zintle, kodwa zinjani xa uzithelekisa nezityalo ezincinane ezikhula endle okanye imithi ekhula ezintabeni? Ngokwemvelo, ezi zityalo zikwenza ubuxabise ubomi namaxesha onyaka. Yaye oko kusenokukwenza uchukumiseke. I-ikebana yindlela yokubonakalisa ubuhle bendalo ngokudibanisa iintyatyambo nezityalo ngeyona ndlela oyithanda gqitha.

Ngokomzekelo, masithi, ufuna ukubonisa ukwindla. Unokwenza oko usebenzisa iintyatyambo zelo xesha lonyaka, njengegentian nepatrinia, namagqabi asekwindla. Ngaba ufuna ukubonisa impepho epholileyo? Iziqu ezimbalwa zentyatyambo ekuthiwa yi-eulalia ezibukekela, zibenza ababukeli bayive impepho yasekwindla. Ndaba nomdla gqitha kwi-ikebana, ndandikuvuyela ukuxuba iintyatyambo nezityalo kwingqayi yeentyatyambo.

“Intsapho” Enkulu

Imbali yeikebana njengobuchule bokuhombisa isusela kwiminyaka engama-500 eyadlulayo. Inkoliso yezikolo zeikebana zilawulwa ziinqununu. Ubani uba yinqununu esikhundleni sikayise. Njengendlalifa, uba negunya kubalandeli abaninzi “abayintsapho” enkulu. Ngokomthetho ufanele afundise isizukulwana esilandelayo iindlela ezintsha azifunde kwixesha aphila kulo.

Emva kokuba ndiphumelele kwiKholeji i-Ikenobo ndaza ndagqiba ukufunda ubugcisa bekado kangangeminyaka emibini, ngoJanuwari 1971 ndaqalisa ukusebenza kwi-Ikenobo Foundation. Ndaceba ndaza ndenza “Imiboniso yeIkebana eyayilungiselelwe yi-Ikenobo Foundation” kulo lonke elaseJapan. Kwakhona ndihamba nenqununu salijikeleza lonke elo lizwe ndilisekela lakhe yaye sihamba sibonisa ubuchule bakhe.

Ndisakhumbula okokuqala ndimi eqongeni eFukuoka Sports Center ngoxa inqununu yayibonisa indlela ezilungiswa ngayo iintyatyambo. Kwakundoyikisa gqitha ukujongana namawaka abantu. Ndagoba iziqu zeentyatyambo ndasika namasebe, nto leyo endandingafanele ndiyenze. Kodwa inqununu yaqhula ngako oku njengoko yayichazela abaphulaphuli ngoko yayikwenza. Oku kwandinceda ndayeka ukoyika.

Xa kukho uzwelonke kunye nabantu abadumileyo abasuka phesheya, ndandihamba nenqununu ukuya kulungisa iintyatyambo ukwenzela eso sihlandlo. Njengokuba besenditshilo ekuqaleni, elinye ilungelo endandinalo kukulungisa iintyatyambo kwigumbi elihle gqitha leBhotwe.

Kamva, xa i-Ikenobo Central Training School yamiselwayo ngenjongo yokuphinda kufundiswe abaqeqeshi kweli lizwe liphela, ndanikwa umsebenzi wokufundisa, ndisenza uludwe lwezifundo, yaye ndisongamela umsebenzi wokuveliswa kweencwadi zokufunda neefilimu eziza kusetyenziswa xa kuqeqeshwa abangama-200 000 kumasebe angama-300 kulo lonke elaseJapan. Ndandihamba kulo lonke eli lizwe ndisongamela ezo zifundo. Ikenobo inawo namasebe aphesheya, yaye ndandisiya eTaiwan kangangezihlandlo eziliqela ngonyaka. Ngaloo ndlela inqununu yaba nentembelo kum yaye ndandikwisikhundla esibalulekileyo.

Ndandiwuthanda umsebenzi wam, kodwa ndandinganelisekanga yindlela yam yokuphila. Nangona umsebenzi wam unento yokwenza nezinto ezintle, bekukho izinto ebezindinxunguphalisa. Ikhwele nomona phakathi kwabo baqeqeshwayo lakhokelela kwintlebendwane, yaye abaqeqeshi babedla ngokuza kum befuna icebiso. Kodwa ngenxa yokuba lo yayingumbutho ekwakusetyenziswa kuwo amasiko amadala yaye ehlonelwa gqitha umntu onegunya, izinto ezininzi ndandingenakuzinceda. Ekubeni uninzi lwaluyithanda ngokwenene i-ikebana yaye luzixabise gqitha izifundo zalo, ndandizama ngokunyanisekileyo ukwenza konke okusemandleni am ukuze bafunde bonwabile.

Ukudibana Okokuqala Nobuhle Benyaniso

Ndandilucaphukela unqulo kuba ndandicinga ukuba luza kundimfamekisa. Ngapha koko, ndandibona uhanahaniso oluninzi phakathi kwabo bathetha ngoxolo nolonwabo. Kwelinye icala, inkosikazi yam, uKeiko, yayiyifuna inyaniso ukususela ebuntwaneni. Yabonisa umdla kwiinkonzo ezahlukahlukeneyo yaza yaphulaphula iimfundiso zazo, kodwa akukho nenye eyanelisa indlala yakhe yokomoya.

Ngoko ke, xa elinye lamaNgqina kaYehova latyelela ekhayeni lethu, uKeiko wavuma ukuqhutyelwa isifundo seBhayibhile. Wayendibalisela yonke into ayifundileyo nayo nantoni na emchukumisileyo. Oko uKeiko wayendixelela kona kwakuvakala, kodwa ndandingazimiselanga njengaye.

Sekunjalo, uKeiko waqhubeka endibalisela ngenzondelelo izinto azifunde eBhayibhileni. Wayesoloko efaka amaphephancwadi asekelwe eBhayibhileni ebhegini yam xa ndihamba. Kodwa ndandingawafundi. Ndandikhusela oko ndiye ndakusebenzela kangangeminyaka. Sasisandul’ ukuthenga indlu yethu, yaye ngandlel’ ithile ndandicinga ukuba, ukuba ndamkela iimfundiso zeBhayibhile, ndandifanele ndiyithengise loo ndlu. Ebudeni belo thuba, uKeiko wenza inkqubela ngokukhawuleza kwaye wayephila ngendlela awayekholelwa ngayo. Ndaziva ndilikheswa yaye ndinesithukuthezi. Nangona ndandisazi ukuba oko wayendixelela kona kwakulungile, ndaqalisa ukumchasa.

Ndandichasa, Kodwa Ndinomdla Enyanisweni

Bendidla ngokubuya ekhaya ezinzulwini zobusuku ndivela emsebenzini, kodwa ngeentsuku uKeiko awayesiya ngazo ezintlanganisweni zamaNgqina kaYehova, ngabom ndandibuya ebusuku nangakumbi. Naxa ndifike ngentsimbi yesibini okanye eyesithathu ekuseni, ndandifika uKeiko elindele ukundibalisela okwenzekileyo ngolo suku, wayendixhalabele. Kodwa ndandingakwazi ukuyinyamezela into yokuba intsapho yam ishiye indlu kangangeyure ezimbalwa iye kwiintlanganiso zamaKristu. Ndachasa ngakumbi, yaye ndaqalisa ukuthetha ngokuqhawula umtshato. Sekunjalo, uKeiko wahlala eqinile.

Kwakunzima ukusiqonda isizathu sokuba uKeiko aziphathe ngale ndlela. Phezu kwalo nje ulwalamano lwethu olwalunamagingxigingxi kwaye ekhathazwa sisifuba, kodwa wayeyivuyela yonke into awayeyenza. Yayiyintliziyo entle nokuthantamisa awayenako uKeiko okwanditsalela kuye kwasekuqaleni. Yaye xa waqalisa ukufunda iBhayibhile ndakhathazeka kuba ndandicinga ukuba wayekhohliswa.

Sekunjalo, uKeiko wayekusebenzisa oko wayekufunda yaye wayezama ukuba ngumfazi nomama olungileyo. Nangona ndandichasa, xa wayendicenga ukuba ndiye kwiintlanganiso zamaKristu nasezindibanweni, ndandisiya ngamaxesha athile, mhlawumbi ngenxa yokuba ndandineqhayiya ngoKeiko.

Kwangaxeshanye, ndandimkhweletela uYehova. Xa ndabona uKeiko ezama ukutshintsha, ndandimangalisiwe yindlela iimfundiso zeBhayibhile ezinempembelelo ngayo ebantwini. Ndandicinga ukuba ‘kutheni umfazi wam ekulungele ukujamelana nobunzima obungaka ngenxa kaYehova?’

Kungabanga thuba lide, abazalwana abathile abangamaKristu abasuka kwibandla likaKeiko bafuna ukundityelela ekhaya. Ndandingafuni ukudibana nabo. Kodwa, ndandifun’ ukwazi isizathu sokuba uKeiko abe seluxolweni kangaka. Ekugqibeleni, ukufuna kwam ukwazi kwakhokelela ekubeni ndivume ukuqhutyelwa isifundo seBhayibhile. Njengokuba ndandisiya ndiqhelana nabo babendityelela, ndaphawula into endayithandayo kubo. Ngokusuka kwisifundo seveki ngeveki, ngokuthe ngcembe iinyaniso zeBhayibhile zehlela entliziyweni, yaye izinto ndazijonga ngendlela ephangaleleyo.

Ubuhle Bendalo Nobenyaniso

Xa ndandizama ukubonisa ubuhle namandla endalo kwi-ikebana, ndandikhathazeka kuba ndingakwazi ukubuchaza ubuhle bayo. Ngoko, xa ndeva ukuba nguYehova owadala imimangaliso yendalo, konke oku kwakuvakala kusengqiqweni kum. Umntu angakhuphisana njani nobuchule boMdali bokudala? UYehova liGcisa Elongamileyo! Noko ke, ngokuzama ukulinganisa yena, ndaqalisa ukulungisa iintyatyambo ngendlela ebhetele ngakumbi. Enyanisweni, emva kokuba ndiqalise ukufunda iBhayibhile, abantu baqalisa ukundixelela ukuba indlela endiwenza ngayo umsebenzi wam ibonisa ukuthozama.

Iinyaniso zeBhayibhile zandinceda ndaqonda izinto ezininzi ebendiqala ukuziva. Xa ndeva ukuba njengomlawuli wehlabathi, uSathana uMtyholi ungunobangela wokubandezeleka koluntu namhlanje, kwaye nentliziyo yethu inenkohliso ngenxa yesono esasizuz’ ilifa kuAdam, ekugqibeleni ndayiqonda kakuhle intsingiselo yoko kwenzekayo. (Yeremiya 17:9; 1 Yohane 5:19) Ndafunda ukuba uYehova unguThixo oseluxolweni, onothando lokwenene, osesikweni, amandla, nobulumko (Duteronomi 32:4; Roma 11:33; 1 Yohane 4:8; ISityhilelo 11:17); ukuba uThixo wathumela uYesu ukuba asifele ngenxa yothando analo (Yohane 3:16; 2 Korinte 5:14); nokuba kuza ilixa xa ukubandezeleka okanye ukufa kuseza kungabikho (ISityhilelo 21:4). Ubuhle bezi nyaniso bandichulumancisa. Ukongezelela koko, amaNgqina kaYehova alandela imfundiso kaYesu ‘yokuthanda abamelwane bawo njengokuba ezithanda.’ Oko kwandiqinisekisa ukuba olu yayilunqulo lokwenyaniso.—Mateyu 22:39.

Ukoyisa Umqobo

Njengoko inyaniso yayisendela entliziyweni yam, ndajamelana nocelomngeni. Xa inqununu yayingakwazi ukuya emingcwabeni, ndandidla ngokuyimela kwimisitho yonqulo lwamaBhuda. Oku kwakuluvavanyo kum xa ndandicinga ngokuzahlulela kuYehova. Ndazenzela isigqibo sokuba ndingabandakanyeki kwizithethe zamaBhuda. (1 Korinte 10:21) Ngentlonelo, ndayichazela inqununu ukuba kungekudala ndifuna ukubhaptizwa yaye ndigqibe kwelokuba ndingabi nanxaxheba kulo naluphi na olunye unqulo, enoba oko kunokuthanani nomsebenzi wam. Yandixelela ukuba ayikuchasanga ukuba ngumKristu kwam nokuba ndinokuzenza izinto zonqulo ngendlela endifuna ngayo. Indlela eyaphendula ngayo ndandingayilindelanga kuba ndandicinga ukuba iza kundikhalimela kwaye ndiza kuphelelwa nangumsebenzi.

Emva kokuba loo mqobo ndawoyisa, ndabhaptizwa ndifuzisela uzahlulelo lwam kuYehova kwindibano yamaKristu ngoJuni 1983, emva konyaka ndifundisisa iBhayibhile. Ekuphumeni kwam kwiqula ekwakubhaptizelwa kulo, ndamkelwa nguKeiko ngolungakanani lona uncumo yaye eneenyembezi emehlweni akhe. Ndineenyembezi emehlweni am, ndambulela uYehova ngovuyo esasinalo noKeiko.

Isigqibo Sokuyeka Ukuphangela

Inqununu yasamkela isigqibo endisenzileyo sokuba ngumKristu ozahluleleyo. Ndandizama ukuzenza ngokuzimisela iimbopheleleko endandinazo emsebenzini kunangaphambili. Sekunjalo, ndandizama ukuyigcina kwindawo efanelekileyo impangelo kwakunye nobomi bam njengomKristu. Kangangeminyaka esixhenxe ndandisandisa isabelo sam entsimini, kangangeenyanga eziliqela nyaka ngamnye.

Phofu ke, kwafuneka ndicingisise nzulu ngempilo yokomoya yonyana wam okuphela kwakhe nangempilo enkenenkene kaKeiko. Ndacinga ukuba ndifanele ndichithe ixesha elingakumbi kunye nentsapho yam. Kwakhona ndandifuna ukubeka izilangazelelo zoBukumkani kuqala ebomini bam. Ngenxa yoko ndandikufuna neminqweno endandinayo ndathandaza kuYehova ndimchazela ngokuyeka kwam ukuphangela. Inqununu yaqonda ukuba ndenze isigqibo, yaye ekugqibeleni ndakwazi ukuthabatha umhlala-phantsi ngoJulayi 1990 ndineminyaka engama-42 ubudala.

Ukunceda Abanye Babone Ubuhle Benyaniso

Kungabanga thuba lide emva kokuba ndithabathe umhlala-phantsi, ndaqalisa inkonzo yexesha elizeleyo ndinceda abanye ukuba bafumane inyaniso. Ngoku, ndichitha usuku olunye ngeveki ndifundisa abantu indlela yokulungisa iintyatyambo, kungekhona ngendlela yeIkenobo. Ndingumdala ebandleni, yaye uKeiko unguvulindlela, nesifuba asisamphathi njengangaphambili. Unyana wethu ngoku utshatile, usisicaka solungiselelo kwibandla elikufuphi. Elinjani ilungelo ukuxabiseka ukuba sonke njengentsapho sikwazi ukukhonza uYehova!

KuBukumkani obulawulwa nguYesu Kristu, ndijonge phambili ekulungiseni kakuhle iintyatyambo endizikhulise egadini yam. Ndikunye nentsapho yam ethandekayo, ndinomnqweno onyanisekileyo wokudumisa igama elikhulu likaYehova, uMdali wazo zonke izinto ezintle.

[Umfanekiso okwiphepha 31]

Ndikunye nomfazi wam, unyana wethu, nentsapho yakhe

[Imifanekiso ekwiphepha 31]

Nge-“ikebana,” unokubonisa ubuhle bendalo