Ukusela Ngokugqithiseleyo—Ishwangusha Abajamelene Nalo Abantu
UKUSELA utywala kunokuba luncedo okanye kube yingozi. IBhayibhile ithi ukusela utywala ngomlinganiselo kwenza intliziyo ibe nemihlali. (INdumiso 104:15) Kodwa ke, iBhayibhile ikwalumkisa ngelithi ukubusela ngokugqithiseleyo kunokuba yingozi kakhulu, kanye njengobuhlungu benyoka. (IMizekeliso 23:31, 32) Makhe sihlolisise umonakalo obangelwa kukusela utywala ngokugqithiseleyo.
“Umqhubi onxilileyo wagila ibhinqa elineminyaka engama-25 ubudala likunye nonyana walo oneminyaka emibini ngoMgqibelo. . . . Eli bhinqa liselula, nelalineenyanga ezintandathu likhulelwe, lafa ngeCawa. Unyana walo, owenzakala entloko, ukwimeko embi,” lanikela loo ngxelo iphephandaba iLe Monde. Okulusizi kukuba, zixhaphakile iziganeko ezinjengezi. Kusenokwenzeka ukuba ukho umntu omaziyo okhe wasengozini ngenxa yokusela utywala ngokugqithiseleyo. Minyaka le bangamawakawaka abantu abafayo okanye benzakale kwiingozi zendlela ngenxa yotywala.
Amanani Abantu Abafayo
Ehlabathini lonke, umonakalo owenziwa kukuselwa kotywala ngokugqithiseleyo ebantwini awuthetheki. EFransi abantu abafa kwiingozi ezibangelwa kukuselwa kotywala ngokugqithiseleyo bamalunga nama-50 000, yaye ngumhlaza nesifo sentliziyo kuphela ezibulala abantu abangaphezulu nyaka ngamnye. Elo nani “lilingana nelabantu abafa ekuntlithekeni koobhazabhaza beenqwelo-moya ababini okanye abathathu veki nganye,” ngokutsho kwengxelo eyakhutshwa liSebe Lezempilo eFransi.
Abona bantu babulawa kakhulu butywala ngabantu abaselula. Ingxelo yeWorld Health Organization eyapapashwa ngowama-2001 yathi, utywala buyeyona nto ibulala amadoda aseYurophu aphakathi kweminyaka eli-15 nengama-29 ubudala. Kuqikelelwa ukuba kwamanye amazwe aseMpuma Yurophu, kungekudala utywala buza kubulala umfana omnye kwabathathu.
Inkohlakalo Nokudlwengula
Utywala bunegalelo kwizenzo zenkohlakalo. Ukusela kwenza umntu angakwazi ukuzibamba yaye angabi nazintloni yaye kugqwetha indlela azijonga ngayo izinto ezenziwa ngabanye abantu, nto leyo emenza abe ndlongondlongo.
Utywala bungunobangela ophambili weengxabano zasekhaya nokudlwengula. Uhlolisiso olwenziwa kumabanjwa aseFransi lwabonisa ukuba utywala bungunobangela wokudlwengulwa nokuxhatshazwa ngokwesini kwabantu ababini kwabathathu. Uhlolisiso lubonisa ukuba ePoland, ama-75 ekhulwini abafazi abatshate namadoda angamakhoboka otywala ayabethwa, litsho njalo iphephancwadi iPolityka. Abanye abaphengululi baqikelela ukuba, “ukusela utywala kwandisa ngokuphindaphindiweyo amathuba okubulala kubo bonke abantu yaye kwanabantu abangaseliyo abahlala nabantu abaselayo basengozini yokubulawa.”—American Medical Association, Council on Scientific Affairs.
Ilahleko Obuyibangelayo
Xa kubalwa iindleko zempilo, ezeinshorenshi, ukungabikho kwengeniso ngenxa yeengozi, ukugula nokufa phambi kwexesha, kufunyaniswe ukuba ilahleko ingaphaya kwengqondo. Kuthiwa ukuselwa kotywala ngokugqithiseleyo kudla abantu baseIreland abazizigidi ezine ubuncinane amawaka amathandathu ezigidi zeerandi ngonyaka. Omnye umthombo owacatshulwa yiThe Irish Times wathi le mali “inokwakha isibhedlele esitsha, ibala lemidlalo ize ithengele uMphathiswa ngamnye walapho inqwelo-moya nyaka ngamnye.” Ngowe-1998 kwiMainichi Daily News kwathiwa ezoqoqosho eJapan zilahlekelwa “yimali engaphezu kwee-R354 zamawaka ezigidi ngonyaka” ngenxa yobunxila. Ingxelo eya kwi U.S. Congress yathi: “Kuqikelelwa ukuba ilahleko yezoqoqosho ngenxa yotywala zii$184,6 amawaka ezigidi [ii-R1,1 zezigidi zezigidi] ngowe-1998 kuphela, okanye ii$638 [ii-R3 993] kwindoda, ibhinqa nomntwana ngamnye ohlala eUnited States ngaloo nyaka.” Yaye kuthekani ngentlungu ebangelwa kukuqhekeka kweentsapho, ukufelwa nokuphazamiseka kwemfundo nomsebenzi?
Imiphumo yokuselwa kotywala ngokugqithiseleyo ebantwini kulula ukuyibona. Ngaba indlela osela ngayo iyingozi kwimpilo yakho neyabanye? Lo mbuzo uza kuphendulwa kwinqaku elilandelayo.