Ukuyeka Ukusela Ngokugqithiseleyo

“Utata wayesela gqitha, nam ke ndaba yindla-manzi. Xa ndandineminyaka eli-12 ubudala, ndandisele ndiqalisile ukusela. Emva kokuba nditshatile, ndandinxila yonk’ imihla. Ndandithand’ ukubetha; yaye intsapho yam yayikhuselwa ngamapolisa. Impilo yam yayisiya isiba nkenkenkene. Utywala bandibangela ndopha emathunjini, nto leyo eyaphantsa yandibulala. Ndaqalwa sisifo sokuqina kwesibindi kwakunye nesifo sokopha. Ndaba lilungu leqela labantu abafuna ukuyeka ukusela, kodwa ayizange incede naleyo. Ndandingathi ndiyimpukane ebambiseke kwindlu yesigcawu endingenakuze ndiphuncule kuyo.”—UVÍCTOR,a WASEARGENTINA.

NGOKUPHINDAPHINDIWEYO abantu ababanjiswe butywala babalisa amabali afana neli. Kanye njengoVíctor, bavakalelwa kukuba basemgibeni abangenakuphuncula kuwo. Ngaba iingxaki ezibangelwa butywala zinokoyiswa okanye ziphetshwe? Ukuba kunjalo, inokwenzeka njani loo nto?

Ukuqonda Ingxaki

Okokuqala, ibalulekile into yokuba lo mntu usela utywala nabo bazizalamane zakhe baqonde ukuba kukho ingxaki. Ukuba likhoboka lotywala kuyinxalenye nje encinane yale ngxaki. Yakheka ngokuhamba kwexesha isusela ekubeni umntu aqale ngokusela ngomlinganiselo. Okothusayo kukuba, iingozi ezininzi, inkohlakalo neengxaki zokuziphatha ezibangelwa butywala azibaselwa ngabantu abangamakhoboka otywala. Khawuve oko kuthethwa yiWorld Health Organization (WHO): “Eyona ndlela ibhetele yokunciphisa zonke iingxaki ezibangelwa butywala kukuzama ukunqanda abo basela ngomlinganiselo kunabo basela ngokugqithiseleyo.” (Akekeliswe sithi.) Ngaba usela ude ugqithise kumlinganiselo obekwe ngabezempilo? Ngaba uyasela nangexesha ekufuneka uhlale uthe qwa ngalo? Ngaba indlela osela ngayo ibangela iingxaki entsatsheni yakho okanye emsebenzini? Ukuqonda ukuba indlela osela ngayo isenokuba yingozi uze uzame ukuyinciphisa ngokwenene “kuyeyona ndlela ibhetele” yokuphepha iingxaki ezinzulu kwixesha elizayo. Xa umntu sele elikhoboka lotywala kuba nzima ukuyeka.

Ngokuqhelekileyo abantu abasela ngokugqithiseleyo abayivumi loo nto. Bathi: “Ndisela njengomntu wonke” okanye “Ndingayeka nanini na ndithanda.” UKonstantin waseRashiya uthi: “Nakuba utywala baphantsa bandibulala, andizange ndiyivume into yokuba ndilikhoboka labo, ngoko andizange ndenze mgudu wakuyeka.” UMarek wasePoland uthi: “Ndazama ukuyeka utywala kangangezihlandlo eziliqela, kodwa ndandingazigqali njengekhoboka labo. Ingxaki ezazibangelwa butywala ndandizithatha lula.”

Umntu unokuncedwa njani ukuba aqonde ingxaki yokusela anayo aze enze umgudu wokulwa nayo? Okokuqala, umele aqonde ukuba ingxaki yakhe ibangelwa kukusela utywala ngokugqithiseleyo yaye eyona nto iya kuphucula ubomi bakhe kukwahlukana nabo. Ngokutsho kweLa Revue du Praticien—Médecine Générale, umele ayeke ukuthi “Ndisela ngenxa yokuba ndishiywe ngumfazi ndaza ndaphelelwa ngumsebenzi,” athi “ndishiywe ngumfazi ndaza ndaphelelwa ngumsebenzi ngenxa yokusela.”

Ukuba ufuna ukunceda umntu olikhoboka lotywala acinge ngolu hlobo, unokusebenzisa la macebiso: Mphulaphule ngenyameko, mbuze ngokucacileyo ngendlela eza kumenza akhuphe imbilini yakhe ngokukhululekileyo, ngovelwano menze azi ukuba uyayiqonda ingxaki akuyo, mncome nangowona mgudu ungephi awenzayo, musa ukumgalela amanzi okanye uthethe ngendlela eza kumenza afihle indlela avakalelwa ngayo aze angaphindi afune uncedo. Enye into enokunceda, kukumcela ukuba abhale kumaxwebhu amabini awahlukeneyo aphendule umbuzo othi Yintoni eza kwenzeka ukuba ndiyaqhubeka ndisela? nothi Kuya kwenzeka ntoni xa ndiyeka?

Ukufuna Uncedo

Xa umntu eqalisa ukusela ngokugqithiseleyo akangoncanyelweni. Abanye beziyekela ngokwabo. Noko ke, abantu abangamakhoboka otywala badla ngokufuna uncedo lweengcali ukuze bahlukane nalo mkhwa.b Kwabanye abantu kudla ngokuba yingenelo ukufumana amayeza asesibhedlele asetyenziswa ekhaya, kodwa xa beguliswa kakhulu kukuyeka ukusela kusenokufuneka balaliswe esibhedlele. Emva kokuphela kweengxaki ezibangelwa kukuyeka—unokunikwa amayeza, aphelise ukububawela aze aqhubeke engaseli.

Iinkqubo zokukhutshwa kotywala emzimbeni azinampumelelo iqinisekisiweyo. Amayeza ayinto nje yokwexeshana, kodwa akayinyangi ingxaki. UAlain, waseFransi, wakhutshwa utywala izihlandlo eziliqela. Uthi: “Ndathi ukuphuma kwam esibhedlele, ndaphinda ndaqalisa ukusela ngenxa yokuba ndandisanxulumana nabahlobo abaselayo. Kaloku, kwakungekho mntu undikhuthazayo ukuba ndiyeke.”

Ukuxakeka Yenye Into

Abanye abakwazi kuyeka, ngenxa yokuba ukungabikho kotywala kubashiya nesithukuthezi, njengokuhanjelwa ngumhlobo osenyongweni. UVasiliy waseRashiya uthi: “Yayingekho enye into endandiyicinga ngaphandle kokusela. Kwakuba ngathi ndidlale ngosuku xa ndingaselanga.” Kumntu olikhoboka lotywala, ayikho enye into ebaluleke ngaphezu kokufumana utywala. UJerzy wasePoland uthi: “Ndandisele ndiphilela ukusela nokufumana imali yokusela.” Kuyabonakala ukuba, umntu olikhoboka lotywala ufanele afumane enye injongo entsha ebomini, ukuze ayeke.

Incwadi eyapapashwa yiWHO nenamacebiso kwabo bazama ukutshintsha indlela abasela ngayo iphuhlisa ukubaluleka kokwenza imisebenzi enenjongo ukuze baphephe ukubuyela umva. Elinye icebiso elinikelayo kukwenza imisebenzi yonqulo.

Ukwenza imisebenzi yokomoya kunokunceda umntu aphuncule etywaleni. Ngokomzekelo, emva kokubanjwa kwakhe okwesithathu ngenxa yento awayenza enxilile, uAlain waqalisa ukufunda iBhayibhile namaNgqina kaYehova. Wathi: “Ukufunda iBhayibhile kwandenza ndaphila ubomi obunenjongo ndaza ndakwazi ukuyeka. Ndandingafuni nje ukuyeka ukusela, kodwa ndandifuna ukukholisa uYehova.”

Ukuhlangabezana Nokubuyela Umva

Abantu abaluleka abantu abasela utywala ngokugqithiseleyo bathetha ngokubaluleka kwenkxaso nokhuthazo kwikhoboka lotywala elichachayo. Abaninzi baye bashiywa ziintsapho nezihlobo ngenxa yemeko yabo engaginyisi mathe. Ukungahoywa kwabo kunokukhokelela kuxinezeleko nokuzibulala. Le ncwadi kuthethwe ngayo ngasentla icebisa ngelithi kwabo banceda abantu abanengxaki yokusela: “Musa ukumgxibha umntu omncedayo enoba iyakucaphukisa indlela azenza ngayo izinto. Khumbula ukuba akulula ukutshintsha indlela obuphila ngayo ngaphambili. Khumbula ukuba zibakho iiveki ezibhetele nezinzima. Kuya kuba luncedo gqitha ukumkhuthaza kwakho, ukumxhasa kwakunye nokumcebisa.”

UHilario owayesela kangangeminyaka enokuba ngama-30 uthi: “Ndancedwa luthando nokunyanyekelwa ngabahlobo bam abakwibandla lamaNgqina kaYehova. Kudala ndibuyela umva, kodwa bebesoloko bendixhasa baze bandinike isiluleko esifanelekileyo seBhayibhile.”

Ukuba wenza umgudu wokwahlukana notywala, khumbula ukuba usenokuman’ ubuyela umva, yaye umele ujonge oko kubuyel’ umva njengenxalenye yendlela esa empumelelweni. Musa ukunikezela! Zama ukufumanisa oko kuye kwakubuyisela umva, uze usebenzise oko ukufumanisileyo ukuze uphephe nantoni na enokukubuyisela umva. Hlola iimeko ezisenokukwenza ubawele ukusela. Ngaba sisithukuthezi, ukudandatheka, ubulolo, iingxabano okanye kukuya kumatheko okanye iindawo ekuselwa kuzo? Ziphephe izinto ezinjalo! UJerzy, owathabatha iminyaka emibini ngaphambi kokuba abuyeke ngokupheleleyo utywala uthi: “Ndafunda ukuziqonda iimvakalelo ezikhokelela ekubeni ndisele. Ngoku ndiphepha nantoni na enokundisa apho. Andiyi kwiindawo ezinabantu abasela utywala. Andityi nantoni na enotywala yaye andisebenzisi naziphi na izithambiso okanye amayeza anotywala. Andizijongi naziphi na izibhengezo zotywala.” Abaninzi baye bafumanisa ukuba ukuthandaza kuThixo becela “amandla angaphaya koko kuqhelekileyo” kuye kwabanceda boyisa ukubawela kwabo ukusela.—2 Korinte 4:7; Filipi 4:6, 7.

Ukuqhawula Amakhamandela!

Ngoxa kunokuba ngumgudu, ukuqhawula emakhamandeleni otywala kunokwenzeka. Bonke abantu ekuthethwe ngabo kweli nqaku baye baphumelela. Basempilweni yaye iintsapho zabo zonwabile yaye baqhuba kakuhle nasemsebenzini. UAlain uthi: “Ngoku ndinenkululeko yokungaseli.” UKonstantin uthi: “Ukwazi uYehova kuye kwayikhusela intsapho yam. Ngoku ndiphila ubomi obunenjongo. Andisaxhomekekanga etywaleni ukuze ndonwabe.” UVíctor uthi: “Ndikhululekile. Ndiziva ndinesidima.”

Umntu angatshintsha enoba usengozini ngenxa yokusela utywala ngokugqithiseleyo, uneengxaki ngenxa yotywala okanye ulikhoboka labo. Ukuba akonwabanga ngenxa yokusela, musa ukucinga kabini ngaphambi kokutshintsha. Oko kuya kunceda wena nabo bakuthandayo.

[Imibhalo esemazantsi]

[Umfanekiso okwiphepha 10]

Inyathelo lokuqala lelokuvuma ingxaki

[Umfanekiso okwiphepha 11]

Inkoliso ifanele incedwe ziingcali ukuze ikhululeke

[Umfanekiso okwiphepha 12]

Eny’ into enokukunceda ngumthandazo

[Umfanekiso okwiphepha 12]

Unokuwafumana amandla okwahlukana notywala!