Ngaba Indlala Iya Kuze Iphele?
CINGA INDLELA anokuba uvakalelwa ngayo xa ubawo ebona abantwana bakhe bethwaxwa linxele likaKhetsekile. Oku kushiya intliziyo yakhe ilihlwili. Ukuba le yindlela umntu ongumzali avakalelwa ngayo, khawucinge nje indlela amele ukuba uvakalelwa ngayo uBawo wethu onothando wasezulwini. Uyazi kakuhle indlela ezixhwaleke ngayo izigidi zabantu ezikule meko.
Nakuba uluntu luye lwazama ukuphelisa indlala ehlabathini, ekuqaleni kwenkulungwane yama-21 indlala iye yaxhomis’ amehlo. Noko ke, uBawo wethu osezulwini uYehova, uyakwazi kwaye uza kuyisusa neengcambu indlala. Sikwazi njani oku?
IBhayibhile isixelela ukuba xa uThixo wadala uAdam noEva waza wababeka kumyezo wase-Eden, wabanika yonke into eyayinokubenza bazive bekhuselekile, benelisekile yaye bondlekile. UThixo wathi kubo: “Yabonani, ndibunikele kuni bonke utyani obuvelisa imbewu obuphezu komhlaba uphela nayo yonke imithi eneziqhamo zemithi evelisa imbewu.” Injongo kaYehova yayikukuba ‘bazalise umhlaba’ nokuze uluntu lonke lube nokutya okwaneleyo.—Genesis 1:28, 29.
Ekubeni aba bantu bokuqala bavukela uMdali baza baphulukana neentsikelelo, uThixo akayitshintshanga injongo yakhe ngabantu. IBhayibhile ithi uYehova “unika abalambileyo isonka,” kwaye iqulethe neziprofeto ezininzi ezichaza indlela aya kuziphelisa ngayo zonke iingxaki ezibangela indlala.—INdumiso 146:7.
Xa abafundi bakaYesu babefuna umqondiso okanye ubungqina obuphawula ukumiselwa koBukumkani bakhe buze bungenelele kwimeko zehlabathi, uYesu wachaza iziganeko ezaziya kwandulela olo tshintsho. Phakathi kwazo wabala “ukunqongophala kokutya.” Ukuqwalasela ngenyameko la mazwi kaYesu kusinika isiqinisekiso sokuba ukubandezeleka koluntu kungekudala kuza kuphela.a—Mateyu, isahluko 24.
Ngokuphathelele iParadesi uThixo aza kuyizisa, INdumiso 72:16 iprofeta isithi: “Kuya kubakho ukudla okuziinkozo okuninzi emhlabeni; encotsheni yeentaba kuya kubakho ukuphuphuma.” KuSirayeli wamandulo ukutya okuziinkozo kwakukhula ezintlanjeni. Kodwa iintsikelelo ezichazwe kwesi siprofeto, zichaza ukuba imbewu etyalwe kwindawo eyinkqantosi okanye engenamveliso iya kuchuma. Uthi omnye umphengululi weBhayibhile: “Ngexesha likaMesiya, kuza kuba ngathi amasimi engqolowa athi ndijonge, nkqu nenkcochoyi yeentaba, ngokungathi kulinywe ukuya kutsho kuzo, ukuze kwilizwe lonke kuvunwe isivuno esiyintabalala.”
Onjani umahluko iBhayibhile esizobela wona, ngokwahlukileyo nemeko yabaninzi namhlanje! Ewe, kwixesha elizayo uThixo uthembisa ukuba, “umhlaba uya kunika imveliso yawo; uThixo, uThixo wethu, uya kusisikelela.”—INdumiso 67:6.
Ukuba ungathanda ukwazi indlela wena nabo ubathandayo eningazifumana ngayo ezi ntsikelelo kunye nezinye ezichazwe kwiziprofeto zeBhayibhile, ungaphozisi maseko ukubuza amaNgqina kaYehova kwindawo ohlala kuyo okanye ubhalele idilesi efanelekileyo kwiphepha 5 leli phephancwadi.
[Umbhalo osemazantsi]
a Ukuze ubone indlela iziprofeto zikaYesu ezizaliseke ngayo, funda isahluko 11 sencwadi ethi Ulwazi Olukhokelela Kubomi Obungunaphakade, epapashwe ngamaNgqina kaYehova.
[Umfanekiso okwiphepha 26]