Imbono YeBhayibhile

Ngaba Ngokwenene UYesu Wayengunyana KaThixo?

EQINISEKILE, umpostile uPetros wathi kuYesu: “UnguKristu, uNyana woThixo ophilayo.” (Mateyu 16:16) Le yenye yezicatshulwa zeBhayibhile ezithi uYesu unguNyana kaThixo, ibinzana eliye labangela iingqondo zabantu abaninzi abathand’ icawa zabethabethana.

Kubantu abaninzi abakholelwa ukuba uYesu Kristu nguThixo, kunzima ukuchaza isizathu sokuba kuthiwe unguNyana kaThixo. Kusengqiqweni ukucinga ukuba azinakuba zichane zombini ezo mbono. Abanye bacinga ukuba uYesu ungumntu obalulekileyo embalini, indoda elumkileyo, okanye mhlawumbi kwanomprofeti kaThixo onyanisekileyo, kodwa wayengengomntu ukhethekileyo. Yintoni ngokwenene efundiswa yiBhayibhile ngalo mbandela? Ngaba ibalulekile into yokuba ukholelwa entwenini?

Izibulo LikaThixo

IBhayibhile ibonisa ukuba uThixo wayekhe wayedwa. Ngenxa yokuba enothando wagqiba kwelokuba adale unyana aze yena abe ngutata—kodwa kungekhona utata oyinyama negazi. Kunoko, uYehova wasebenzisa amandla akhe okudala angenakuthelekiswa nanto, ukudala isidalwa somoya esikrelekrele—“isiqalo sendalo kaThixo,” ngoku esinguYesu Kristu. (ISityhilelo 3:14; IMizekeliso 8:22) Ngenxa yokuba uYesu wadalwa nguThixo ngokwakhe xa wayeyedwa, uYesu uyakufanelekela ukubizwa ngokuba ‘ngunyana okuphela kozelweyo’ nokuba ‘lizibulo kwindalo yonke.’—Yohane 1:14; Kolose 1:15.

Ngoko ke, licacile elokuba, njengesiqalo sendalo kaThixo, uYesu akanakuba nguMdali, “uThixo okuphela kwakhe.” (1 Timoti 1:17) Kwelinye icala, uThixo uye wanika uNyana wakhe amalungelo amaninzi. Ngokomzekelo, ngoYesu, uThixo wadala “zonke ezinye izinto,” kuquka neengelosi. Ezi ngelosi kubhekiselwa kuzo “njengoonyana bakaThixo” yaye uYehova nguMniki-bomi.—Kolose 1:16; Yobhi 1:6; 38:7.

Emva kokuba elungise umhlaba ukuze abantu bahlale kuwo, uThixo, ethetha noNyana wakhe olizibulo, wathi: “Masenze umntu ngokomfanekiso wethu.” (Genesis 1:26; IMizekeliso 8:22-31) Ngoko ke, uYehova wadala nonyana wakhe wokuqala ongumntu, uAdam, esebenzisa isidalwa somoya esasiza kuba nguYesu.—Luka 3:38.

UYesu Uba NguNyana kaThixo Ongumntu

Umpostile uYohane usixelela ukuba ngexesha elifanelekileyo, uNyana kaThixo osisidalwa somoya “waba yinyama waza wahlala phakathi kwethu.” (Yohane 1:14) Ukuze uYesu abe ngumntu, uThixo ngokungummangaliso wadlulisela ubomi bakhe kwisibeleko sentombi enyulu engumYuda uMariya. Ngaloo ndlela uYesu wahlala enguNyana kaThixo, nakuba wayengumntu. Ukongezelela, ekubeni inguThixo umniki-bomi, uYesu wazalwa efezekile, engenasono. Ingelosi uGabriyeli yathi kuMariya: “Kwanoko kuzalwayo kuya kubizwa ngokuba kungcwele, uNyana kaThixo.”—Luka 1:35; Hebhere 7:26.

Xa uYesu wayeyinyama, uYise wasiqinisekisa ukuba lo yayingunyana wakhe. Xa uYesu wayebhaptizwa, uYohane uMbhaptizi wabona amazulu evuleka waza weva ilizwi lisithi: “Lo nguNyana wam, oyintanda, endikholisiweyo nguye.” (Mateyu 3:16, 17) Akumangalisi ke ngoko ukuba uYohane waxelela abafundi bakhe: “Ndiwubonile, ndaza ndangqina ukuba lo nguye uNyana kaThixo.”—Yohane 1:34.

Ebudeni bokushumayela kwakhe emhlabeni, uYesu akazange ayivakalise esidlangalaleni into yokuba unguMesiya, uNyana kaThixo. (Marko 8:29, 30) Wayesoloko efuna ukuba abantu bazibonele ngokwabo ngokuphulaphula iimfundiso zakhe, ngokujonga indlela awayephila ngayo, nangokuba ngamangqina emimangaliso awayeyenza, uninzi lwayo awayeyenza ibonwa ngabantu. Ngokomzekelo, waphilisa “bonke abo babephatheke kakubi, bebandezeleke zizifo ezahlukahlukeneyo neentuthumbo.” (Mateyu 4:24, 25; 7:28, 29; 12:15) Iimfama, izithulu, iziqhwala, nabantu abanezifo, bonke beza kuYesu, yaye wabaphilisa. Wavusa kwanabantu abafileyo! (Mateyu 11:4-6) Abafundi bakhe bejongile, uYesu ngokungummangaliso wahamba phezu kwamanzi waza wazolisa isaqhwithi somoya namaza. Ngenxa yoko abafundi bakhe bathi: “Ngokwenene unguNyana kaThixo.”—Mateyu 14:24-33.

Indlela Onokuzuza Ngayo Ngobukho BoNyana KaThixo

Kwakutheni ukuze uThixo athumele uNyana ekuphela kwakhe emhlabeni, owathi ekugqibeleni wafa kabuhlungu? “Ukuze wonk’ ubani obonisa ukholo kuye angatshabalali kodwa abe nobomi obungunaphakade.” (Yohane 3:16) Ewe, ngokufa kwakhe uYesu ‘wanikela ngomphefumlo wakhe ukuba ube yintlawulelo ngenxa yabaninzi.’ (Mateyu 20:28) Enyanisweni, akukho namnye embalini obonise uthando ngoluntu ngaphezu kukaYehova noNyana wakhe olizibulo.—Roma 8:32.

Emva kokufa kwakhe, uYesu “wavakaliswa njengoNyana kaThixo” ngendlela ekhethekileyo nenamandla, “ngokuvuka kwabafileyo” waza waphila njengoNyana kaThixo womoya. (Roma 1:4; 1 Petros 3:18) Emva kokuba elinde ngomonde ecaleni kukaYise phantse iminyaka eli-1 900, uYesu wabekwa etroneni njengoKumkani woBukumkani bukaThixo—urhulumente wasezulwini, kungekudala oza kulawula umhlaba wonke.—INdumiso 2:7, 8; Daniyeli 7:13, 14.

Ngaba uyafuna ukwamkelwa ngulo Nyana kaThixo unamandla? Ukuba kunjalo, sikukhuthaza ukuba uhlolisise iimfundiso zakhe uze uphile ngokuvisisana nazo. UYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) Ewe, kubalulekile oko ubani akukholelwayo ngoNyana kaThixo!—Yohane 3:18; 14:6; 1 Timoti 6:19.

NGABA WAKHA WAZIBUZA?

◼ Kwenzeka njani ukuze uYesu abe nguNyana kaThixo okuphela kozelweyo?—Yohane 1:3, 14; ISityhilelo 3:14.

◼ Kutheni ufanele ukholelwe ukuba uYesu unguNyana kaThixo?—Mateyu 3:16, 17.

◼ Unokuzuza ntoni xa ukholelwa ukuba uYesu unguNyana kaThixo?—Yohane 3:16; Yohane 14:6; 17:3.

[Imifanekiso ekwiphepha 12, 13]

Iimfundiso zikaYesu zobulumko nemimangaliso yakhe enamandla yayibonisa ukuba wayengumntu ongaqhelekanga