Imibuzo Yabantu Abaselula . . .
Kutheni Ndimele Ndifunde?
“Andinawo umonde wokufunda. Kubhetele ndibukele umabonwakude.”—UMargarita, oneminyaka eli-13 ubudala, waseRashiya.
“Ukuba bendinokukhetha phakathi kokufunda incwadi nokudla ibhola yomnyazi, bendiya kukhetha ukudlala.”—Oscar, 19, waseUnited States.
NJENGOKUBA sele usifundile esi sivakalisi unokuyibona indlela obubaluleke ngayo ubuchule bokukwazi ukufunda. Noko ke, usenokukujonga ukufunda incwadi okanye iphephancwadi njengokusela iyeza: Uyalazi ukuba liluncedo, kodwa ukhetha ukungaliseli.
UVukani! uye wadlan’ indlebe nabantu abaselula bamazwe ali-11 ukuze bachaze oko kwenza kube nzima ukuthanda ukufunda noko baye bakuzuza ekufundeni. Okulandelayo koko baye bakuchaza.
Kutheni ukufumanisa kunzima ukufunda?
“Andifane ndilifumane ixesha lokufunda.”—USemsihan, oneminyaka eli-19, waseJamani.
“Ukufunda ngumsebenzi omkhulu. Ndicinga ukuba ndinayo indawana yokonqena.”—UEzekiel, oneminyaka eli-19, wakwiPhilippines.
“Andikuthandi ukunyanzelwa ukuba ndifunde izinto endingenamdla kuzo.”—UChristian, oneminyaka eli-15, waseNgilani.
“Ukuba yincwadi enamaphepha ambalwa, mhlawumbi ndingayifunda. Kodwa ukuba ngumqulu, ndiyawonqena.”—UEriko, oneminyaka eli-18, waseJapan
“Ndiphazamiseka lula zezinye izinto. Andikwazi ukunikel’ ingqalelo kwinto enye.”—UFrancisco, oneminyaka eli-13, waseMzantsi Afrika.
Ulutsha lwamaKristu lukhuthazwa ukuba lufunde iBhayibhile. (INdumiso 1:1-3) Ngaba oku kunzima kuwe? Ukuba kunjalo, kutheni?
“IBhayibhile yincwadi enkulu! Andiqondi ukuba ndakuze ndiyifunde ndiyigqibe ebomini bam bonke!”—UAnna, oneminyaka eli-13, waseRashiya.
“Ezinye iindawo eBhayibhileni zinzima kwaye azibangeli mdla kangako.”—UJezreel, oneminyaka eli-11, waseIndiya.
“Ndikufumanisa kunzima ukufunda iBhayibhile rhoqo ngenxa yokuba ucwangciso lwam alulungelelananga.”—UElsa, oneminyaka eli-19, waseNgilani.
“Kunzima ukufunda iBhayibhile, imisebenzi yasekhaya kunye nomsebenzi wesikolo zitya ixesha lamelininzi.”—UZurisadai, oneminyaka eli-14, waseMexico.
“Ukufunda iBhayibhile kunzima kuba andikwazi ukunciphisa ixesha endilichithela kwizinto endizithandayo.”—USho, oneminyaka eli-14, waseJapan.
Licacile elokuba ukufunda kusenokuba yingxaki. Kodwa ngaba kuwufanele umgudu? Bazuze ntoni abanye ngokufunda?
“Ukufunda iBhayibhile kuye kwalwandisa ulwazi lwam, kwaye oku kuye kwandenza ndazithemba xa ndithetha nabanye abantu.”—UMonisha, oneminyaka eli-14, waseIndiya.
“Ukufunda kundenza ndikhululeke kuze kundenze ndingacingi ngeengxaki endinazo”—UAlison, oneminyaka eli-17, waseOstreliya.
“Ukufunda kundenza ndibe ngathi ndityelele kwiindawo ekungenakwenzeka ukuba ndiye kuzo.”—UDuan, oneminyaka eli-19, waseMzantsi Afrika.
“Ukufunda kundenza ndikwazi ukwenza uphando ngokwam, kunokuba ndixhomekeke koko ndikuxelelwa ngabanye abantu.”—UAbihú, oneminyaka eli-16, waseMexico.
Yintoni eye yakunceda wakuthanda ukufunda?
“Ukususela ngexesha ndandiselula kakhulu, abazali bam bandikhuthaza ukuba ndifunde ngokuvakalayo.”—UTanya, oneminyaka eli-18, waseIndiya.
“Abazali bam bandikhuthaza ukuba ndibe nomfanekiso ngqondweni woko ndikufundayo njengoko ndifunda, ukuze kube ngathi ndiyakubona oko kwenzekayo.”—UDaniel, oneminyaka eli-18,waseNgilani.
“Utata wandicebisa ukuba ndiqale ngokufunda iincwadi zeBhayibhile endicinga ukuba zibangel’ umdla, ezifana neeNdumiso kunye neMizekeliso. Ngoku ndiyakuvuyela ukufunda iBhayibhile, akuseyiyo indinisa.”—UCharene, oneminyaka eli-16, waseMzantsi Afrika.
“Xa ndandineminyaka emine ubudala, abazali bam bandipha idesika kunye nethala leencwadi elinazo zonke iincwadi ababendigcinele zona ukususela ngexesha ndizalwa.”—UAri, oneminyaka eli-14 waseJapan.
Kutheni Ucinga Ukuba Kubalulekile Ukufunda IBhayibhile?
“Abantu bakholelwa izinto ezininzi ngeBhayibhile ezingeyonyaniso. Kubhetele ukuzikhangelela ezi zinto ngokwakho.” (IZenzo 17:11)—UMatthew, oneminyaka eli-15, waseUnited States.
“IBhayibhile ifuna umntu acinge ngoko akufundayo. Kodwa ukuyifunda kuye kwandinceda ukuba ndithethe ngokuzithemba nangokucacileyo xa ndithetha nabanye ngezinto endizikholelwayo.” (1 Timoti 4:13)—UJane, oneminyaka eli-19, waseNgilani.
“Xa ndifunda iBhayibhile kuba ngathi uYehova uthetha nam. Ngamanye amaxesha, oku kundenza ndichukumiseke.” (Hebhere 4:12)—UObediah, oneminyaka eli-15 waseIndiya.
“Ndisandul’ ukukuthanda ukufunda iBhayibhile ngenxa yokuba indixelela indlela uYehova acinga ngayo ngam kwaye indinika amacebiso amahle.” (Isaya 48:17, 18)—UViktoriya, oneminyaka eli-14, waseRashiya.
Ulifumana njani ixesha lokufunda iBhayibhile neencwadi ezisekelwe eBhayibhileni?
“Ndinocwangciso. Into yokuqala endiyenzayo xa ndivuka kukufunda isahluko seBhayibhile ntsasa nganye.”—ULais, oneminyaka eli-17, waseBrazil.
“Ndifunda iBhayibhile kunye nezinye iincwadi ezisekelwe eBhayibhileni xa ndikuloliwe ndisiya okanye ndivela esikolweni. Kule minyaka mine idluleyo, ndiye ndakwazi ukubambelela kolu cwangciso.”—UTaichi, oneminyaka eli-19, waseJapan.
“Ndifunda iBhayibhile rhoqo ngaphambi kokuba ndilale ebusuku.”—UMaria, oneminyaka eli-15, waseRashiya.
“Ndifunda amaphepha amane ‘kaVukani!’ okanye ‘eMboniselo’ suku ngalunye. Ndiyakwazi ukufunda ndize ndiligqibe iphephancwadi ngaphambi kokufika kwelinye.”—UEriko, oneminyaka eli-18, waseJapan.
“Ndifunda iBhayibhile rhoqo ngaphambi kokuba ndiye esikolweni.”—UJames, oneminyaka eli-17, waseNgilani.
Njengokuba amagqabaza angasentla ebonisa, ukufunda kwenza ubani azithembe yaye kwenza ulwazi lwakho luphangalale. Ukufunda iBhayibhile noncwadi olusekelwe eBhayibhileni—njengeli phephancwadi—kunokukwenza ‘usondele kuThixo.’ (Yakobi 4:8) Ngoko ke, nokuba ukufumanisa ukufunda kunzima, musa ukunikezela!
OMELE UCINGE NGAKO
◼ Kutheni kubalulekile kuwe ukufunda iLizwi likaThixo?
◼ ‘Unokulithenga njani ixesha’ lokufunda iBhayibhile neencwadi ezisekelwe eBhayibhileni?—Efese 5:15, 16.
[Ibhokisi ekwiphepha 16]
NXULUMANISA OKO UKUFUNDILEYO
Cinga ngoko ukufundayo uze ukunxulumanise nokwaziyo nokukungqongileyo. Zibuze le mibuzo ilandelayo:
◼ Inkcazelo NesiBhalo Ngaba oko kuchazwe apha kuyafana noko kuthethwa zezinye iincwadi, amaphephancwadi okanye amabali endiye ndawafunda? Ngaba aba bantu bayafana nabantu endifunde ngabo?
◼ Inkcazelo Nendlela Onokuyisebenzisa Ngayo Ngaba le nkcazelo inento yokwenza neemeko endikuzo, isithethe sam kunye nengxaki endikuyo? Ngaba ndingayisebenzisa le nkcazelo ukunceda abanye abantu okanye ndenze ubomi bam bube bhetele?
◼ Inkcazelo Kunye Noko Kukungqongileyo Indifundisa ntoni le nkcazelo ngendalo, ngemeko-bume, ngezithethe ezahlukahlukeneyo okanye ngeengxaki zebutho labantu? Indifundisa ntoni le nkcazelo ngoMdali?