Ndandiphelelwe Lithemba Kodwa Ngoku Ndonwabile
KUBALISA UVICENTE GONZÁLEZ
Xa abamelwane beva ukuba ndiye ndazidubula kangangezihlandlo ezine kodwa andafa, bandibiza ngokuba ndinguSuperman. Kodwa ndandingenguye. Makhe ndikuchazele ukuba kwakutheni ukuze ndifune ukuzibulala.
N DAZALWA ngowe-1951 eGuayaquil, e-Ecuador. Abazali bam bakhela abantwana babo abasithoba indlu kwindawo engaselwandle ekuthiwa kuseNkanini. Iintsapho ezingamahlwempu zafudukela kule ndawo ngokungekho mthethweni, yaye zazakhela izindlu zoqalo ezinophahla lwamacangci. Ezi zindlu zazakhiwe kwindawo enemigxobhozo. Sasingenambane yaye sasipheka ngesitovu samalahle. Sasihamba isiqingatha sekhilomitha ukuya kukha amanzi.
Ukuze bancedise kwiindleko zentsapho, abakhuluwa noodadewethu baqalisa ukuphangela besebancinane. Xa ndandineminyaka eli-16 ubudala, ndaphuma phakathi esikolweni, ndafumana umsebenzi wokuba ngumthunywa kumzi-mveliso othile. Mna nabahlobo bam sasinxila size siziphathe kakubi. Xa ndikhathazwa sisazela, ndandisiya kumfundisi ndiye kuvuma izono. Umfundisi engakhange phofu andincede ngokomoya ngaphambi kokuba andikhulule wayedla ngokuthi: “Nyana, uzivume kakuhle izono zakho.” Ngoko ke ndandihamba ndize ndiye kwenza into efanayo. Ekugqibeleni, ndadinwa kukwenza izono nokuzivuma yaye ndayeka ukuya ecaweni. Kanye ngelo xesha, ndaphawula ukuba okusesikweni akukho. Abona bantu baninzi bangamahlwempu yaye batsala nzima ukuze bafumane into esiwa phantsi kwempumlo, ngoxa imbinana ezizityebi iphila tofotofo. Ubomi babungenanjongo. Ndandivakalelwa kukuba ndandingenakamva okanye injongo ebomini.
Ngoko, ngenye imini ndafumanisa ukuba oodadewethu abane babefunda iimpapasho zamaNgqina kaYehova. Nam ndaqalisa ukuzifunda. Inye incwadi ngokukhethekileyo endayithanda gqitha yethi, Inyaniso Ekhokelela Kubomi Obungunaphakade. Ngomlinganiselo othile yandikhanyisela ngemibandela emininzi yeBhayibhile. ‘Le yinyaniso!’ Ndikhumbula ndisitsho. Kodwa kwiminyaka engaphezu kweli-15 eyalandelayo ndafumanisa ukuba ukuphila ngokuvisisana nenyaniso kwakuyeny’ into.
Xa ndandineminyaka engama-22 ubudala, ndandisebenza ebhankini. Ngeny’ imini omnye endisebenza naye wandibonisa indlela efihlakeleyo “yokuboleka” imali ebhankini ndize kamva ndiyihlawule loo “mali ndiyibolekileyo.” Ndaqalisa “ukuzibolekela” imali, yayininzi kangangokuba ndandingasakwazi ukubufihla ububi endandibenza. Ndaphelelwa lithemba xa ndandivakalelwa kukuba ndandingasakwazi ukuyibuyisa loo mali. Ngoko ke ndagqiba ekubeni ndilichaze eli tyala ndilenzileyo ebhankini ndize ndizohlwaye ngokuzibulala.
Emva kokuba ndibhalele ibhanki ileta, ndathenga umpu ndaya kwindawo engenabantu, elwandle ndaza ndazidubula kabini entloko nakabini esifubeni. Nangona ndenzakala kakhulu, zange ndife. Indoda ethile eyayikhwele ibhayisekile yandibona yaza yakhawuleza yenza indlela yokuba ndibalekiselwe esibhedlele. Emva kokuba ndiphilile, ndaya ematyaleni yaye ndagwetywa ndaza ndaya kuthothoza entolongweni. Xa ndakhululwayo, ndandineentloni yaye ndidandathekile kuba ngoku ndandinengxelo yolwaphulo-mthetho. Ngenxa yokuba ndaphila phezu kwawo nje amanxeba amane eembumbulu, abamelwane bandibiza ngokuthi ndinguSuperman.
Ithuba Lokuguquka
Ngelo xesha uPaul Sánchez, umvangeli wasemazweni wamaNgqina kaYehova wandityelela. Into yokuqala endayiphawulayo luncumo lwakhe. UPaul wayebonakala engumntu owonwabileyo nonesimo sengqondo esihle kangangokuba ndasamkela isicelo sakhe sokufunda iBhayibhile kunye naye. Ndandicinga ukuba, ‘mhlawumbi angandinceda nam ndonwabe ndize ndiphile ubomi obunenjongo.’
Ngoncedo lukaPaul, ndafunda ukuba uThixo unenjongo ngoluntu yaye abo bamthandayo nabamthobelayo ngenye imini baya kuphila kumhlaba oyiparadesi. (INdumiso 37:29) Kwakhona ndafunda ukuba ukungabikho kokusesikweni nobuhlwempu asikokuthanda kukaThixo kodwa yimiphumo yokuvukela kwabantu uThixo. (Duteronomi 32:4, 5) Ezi zinto ndazifundayo zazinjengesikhanyiso ebomini bam. Noko ke, ukutshintsha ubuntu bam yayiyeyona nto inzima kunokufunda iBhayibhile.
Ndafumana umsebenzi waseofisini owawunento yokwenza nemali yenkampani. Kwakhona ndaba sesilingweni semali yaye ndaqalisa ukuyiba. Xa ngoku ndandingasakwazi ukubufihla obu busela ndandibenza, ndabalekela kwesinye isixeko e-Ecuador ndahlala apho kangangonyaka. Ndazama ukufuduka nalapho kodwa zange ndikwazi, ngoko ke ndabuyela ekhaya.
Ndaphinda ndadibana noPaul yaye sahlaziya isifundo sethu. Ngesi sihlandlo ndenza isigqibo sokuba ndifuna ukusebenzisa imigaqo yeBhayibhile ebomini bam nokukhonza uYehova. Ndicinga ngolo sukelo, ndamchazela uPaul ngokunganyaniseki kwam yaye wandiluleka ngokungqalileyo. Wandifundela indinyana yeBhayibhile ekumaEfese 4:28, ethi: “Lowo ubayo makangabi seba, kunoko makasebenze nzima.” Ndabona ukuba kwakufanele ndivume ukuba ndibile ndize ndimelane nemiphumo yoko.
Ngoxa ndandicinga ngemeko yam, ndandizisebenzela njengomzobi. Ngenye imini kwafika indoda ethile kwigumbi endisebenzela kulo yaye yabonakala ngathi inomdla kwimizobo. Noko ke, yayingumcuphi yaye yayinoxwebhu olwalusithi ndiyabanjwa. Ngoko ke, kwakhona ndaya enkundleni ndaza ndaya kuvalelwa entolongweni. UPaul wandityelela yaye ndamthembisa ndisithi, “awusoze uzisole ngomgudu owenzileyo wokundinceda ndazi iBhayibhile.” Saqhubeka sifunda ngoxa ndandisentolongweni.
Ndasizalisekisa Isithembiso
Emva kokuba ndikhululiwe, ndazenzela isigqibo sokukhonza uYehova ngentliziyo yam yonke yaye ndasizalisekisa eso sithembiso kwiminyaka emibini eyalandelayo. Ngowe-1988 ndabhaptizwa ndaliNgqina likaYehova. Ndibuyisela ixesha endidlale ngalo, ndaba kwinkonzo yexesha elizeleyo ndisebenza njengovulindlela othe ngxi, ndisenza umgudu okhethekileyo wokufikelela ulutsha oluyimigulukudu.
Eminye imigulukudu yarhoqoza iindonga zeHolo yoBukumkani. Ngenxa yokuba ndandisazi ukuba ngoobani abenze loo nto nalapho bahlala khona, ndabatyelela ndaza ndabachazela ngenjongo yeHolo yoBukumkani ndaza ndabacela ukuba basihlonele isakhiwo sethu. Emva koko zange siphinde sibe nengxaki yokurhoqozwa kweendonga.
Kamva, xa sasilungisa iholo yaye sisusa ipeyinti endala, iNgqina eliselula uFernando lasibonisa indawo ebhalwe “Frog” (La Rana, ngolwimi lwaseSpeyin). Wathi: “Yayindim lowo!” Njengomnye wemigulukudu, uFernando wabhala igama awayebizwa ngalo kwesi sakhiwo. Ngoku wayelisusa eli gama!
Xa ndaqala ukudibana noFernando, wayeyotywe ziziyobisi. Unina wayemse kangangezihlandlo ezibini kwiziko lokunyanga amakhoboka eziyobisi kodwa akuzange kubekho mahluko. Ngoko ke, wayesele eyekile ukumnceda. Wafuduka kuloo ndawo waza wamshiya yedwa nendlu. UFernando wathengisa yonke into exabisekileyo endlwini—kuquka iingcango, iifestile nophahla lwayo—ukuze athenge iziyobisi. Ndagqitha ngakuye ngenye imini esitratweni, ndampha isiselo ndaza ndacela ukufunda naye iBhayibhile. Wavuma yaye okuvuyisayo kukuba wayamkela nenyaniso. Walishiya iqela lemigulukudu, wayeka ukuba likhoboka leziyobisi, waqalisa ukuya ezintlanganisweni yaye akuzange kube kudala, wabhaptizwa.
Xa mna noFernando sishumayela kwindlu ngendlu, abantu babesazi baze basikhwaze bathi “The Frog!” okanye “Superman,” babuze into esiyenzayo. Babemangaliswa kukubona umntu owayekade engumgulukudu nowayelisela ebatyelele, epheth’ iBhayibhile ngesandla.
Ngesinye isihlandlo ndandishumayela kwenye indoda ngoxa uFernando wayethetha nommelwane wale ndoda. Isalatha kuFernando, le ndoda yathi kum: “Uyambona la mfana? Wakha wandibek’ umpu entloko.” Ndayiqinisekisa le ndoda ukuba uFernando akasaphili ubomi obunjalo yaye ngoku uphila ngokuvisisana nemigaqo yeBhayibhile. Emva kokuba uFernando egqibile ukuthetha nommelwane, ndambiza ndaza ndamazisa kule ndoda. Le ndoda yathi: “Mfo wam, ndiyakuncoma ngotshintsho olwenzileyo ebomini bakho.”
Andisakhumbuli ukuba zizihlandlo ezingaphi mna noFernando sinconywa ngabantu. Oko kuye kwavul’ ithuba lokuba sishumayele yaye siye sanezifundo zeBhayibhile ezininzi. Ewe, sobabini noFernando sineqhayiya kuba sisaziwa ngokuba ngamaNgqina kaYehova.
Isiganeko Esiphawulekayo Ebomini Bam
Ngowama-2001, xa ndandigqiba iminyaka engama-50 ubudala, ndothuka kwangaxeshanye ndakuvuyela ukumenywa kwiSikolo Sokuqeqesha Abalungiseleli esasisePeru. Kwesi sikolo, kangangeeveki ezisibhozo kuqeqeshwa amaNgqina afanelekayo eyalelwa ngezinto ezinzulu zokomoya eziwanceda entsimini.
Nkalo nganye ekwakuthethwa ngayo ndandiyivuyela ngokukodwa xa kwakuthethwa ngokuthetha esidlangalaleni, nto leyo endandiyoyika. Uninzi lwabafundi abasebatsha lwanikela iintetho ezimnandi yaye lwaluqinisekile. Kodwa xa mna ndaya eqongeni ndiye kunikela intetho, ndaziva ndimncinane nto leyo endandinengxaki yayo ndisengumntwana. Amadolo ayebethana, izandla zibilile yaye zingahlelanga ndawen’ inye yaye ilizwi lalingcangcazela. Kodwa, ndaxhaswa nguYehova ngomoya wakhe oyingcwele nangabazalwana abanothando. Omnye wabaqeqeshi waba nomdla kum yaye emva kokuba siphumile eklasini wandincedisa ukulungiselela iintetho zam. Okona kubalulekileyo, wandifundisa ukuthembela ngoYehova. Ekupheleni kweso sikolo, okwesihlandlo sokuqala ebomini bam ndandikuvuyela ukuthetha phambi kwabantu abaninzi.
Kwavavanywa ukuthembela kwam ngoYehova kwindibano yamaNgqina kaYehova eGuayaquil. Ndabalisa indlela endaba liNgqina ngayo phambi kwabantu abangama-25 000. Noko ke, njengokuba ndandithetha andizange ndikwazi ukuzibamba, ndalila ngenxa yokuba ndandifumene ilungelo lokukhuthaza abantu abaninzi yaye ilizwi lalingcangcazela. Kamva, omnye owayesendibanweni weza kum waza wathi, “Mzalwan’ uGonzález, njengokuba ububalisa indlela owayifumana ngayo inyaniso, wonk’ umntu ebelila.” Eyona nto ndandiyifuna ngamandla, kukuba ibali lam libe lukhuthazo kwabo benza umzamo wokwahlukana neendlela zabo ezimbi.
Ngoku ndingumdala novulindlela othe ngxi yaye ndiye ndakuvuyela ukunceda abantu abali-16 ukuba bafikelele elwazini oluchanileyo lwenyaniso yeBhayibhile. Ndiyavuya kuba abazali bam noodade wethu abane nabo baye bahlulela ubomi babo kuYehova. Umama ufe ethembekile kuThixo ngowama-2001. Ndimbulela kakhulu uYehova ngokundivumela ukuba ndimazi yaye ndiyazi ukuba eyona ndlela ifanelekileyo endinokumbulela ngayo kukukhuthaza abanye ukuba nabo basondele kuye.—Yakobi 4:8.
[Umfanekiso okwiphepha 12]
UFernando, owayesaziwa ngokuba nguFrog, nowayengumgulukudu endamncedayo
[Umfanekiso okwiphepha 12]
UPaul Sánchez, ongumvangeli wasemazweni, owandiqhubela isifundo seBhayibhile
[Umfanekiso okwiphepha 13]
UVicente González namhlanje