Iphenyana LaseGalili—Into Exabisekileyo Yamaxesha Okubhalwa KweBhayibhile

Iphenyana LaseGalili—Into Exabisekileyo Yamaxesha Okubhalwa KweBhayibhile

NGUMBHALI KAVUKANI! KWASIRAYELI

KULWANDLE lwaseGalili kwenzeka ezinye zeziganeko ezibalulekileyo kubulungiseleli bakaYesu. UNyana kaThixo wahamba phezu kwamanzi, wathulisa amaza amakhulu, ngommangaliso wondla abantu abangamawaka waza waphilisa abagulayo kweli chibi okanye kunxweme lwalo.

Ngowe-1986 kwafunyanwa into engalindelwanga ezantsi kulwandle olukufuphi neKapernahum yamandulo. Eli yayiliphenyane elalihamba kumanzi olu lwandle mandulo ngexesha lokushumayela kukaYesu. Lafunyanwa njani? Yaye yintoni esinokuyifunda kulo?

Laveliswa Yimbalela

Ngenxa yokunqongophala kwemvula kangangeminyaka, kwaza kwalandela ihlobo elaliqatsele ngowe-1985, ancipha ngamandla amanzi kuLwandle lwaseGalili yaye namanzi okunkcenkceshela ayetsalwa kweli chibi. Amanzi ehla kangangokuba kwavela umhlaba omkhulu owomileyo. Oonyana ababini, abahlala kwifama ekufuphi bakubona oku njengethuba elihle lokukhangela izinto zamandulo zexabiso. Njengokuba babehamba kulo mmandla, baphawula iingqekembe zobhedu nezikhonkwane eziliqela ezidala. Bandula ke babona into embhoxo izobeke eludakeni—indawo elaligqumeleleke kuyo iphenyane lamandulo. Enyanisweni, babefumene into yexabiso!

Abembi bezinto zakudala babengalindelanga ukuba kuLwandle lwaseGalili babenokufumana iphenyane elineminyaka engama-2 000 likho. Babecinga ukuba imithi ayenziwe ngayo loo maphenyane yabola yaza yavuthuluka kudala. Kodwa, xa behlola ubudala belo phenyane neengqekembe ezafunyanwa apho, bafumanisa ukuba lenziwa ngenkulungwane yokuqala ngaphambi Kwexesha Eliqhelekileyo okanye kwinkulungwane yokuqala kwiXesha Eliqhelekileyo. Okumangalisayo kukuba, umzimba weli phenyane wawusomelele. Yintoni eyaligcina linjalo?

Kubonakala ukuba eli phenyane lahlala kwindawo eyayingazange iphazanyiswe, nto leyo eyabangela ukuba wonke umzantsi walo ugqumeleleke kudaka oluthambileyo. Ekuhambeni kwexesha, olo daka loma. Eli phenyane lakudala lalondolozeka kangangeminyaka enokuba ngama-2 000!

Njengokuba iindaba zokufunyanwa kweli phenyane zazisanda, labizwa ngokuba liPhenyane likaYesu. Phofu ke, akukho mntu owayezama ukuthi uYesu okanye abafundi bakhe babehamba ngeli phenyane. Sekunjalo, ubudala balo nendlela elifana ngayo namaphenyana achazwe kwiincwadi zeVangeli kubangel’ umdla kubabhali-mbali nakubaphengululi beBhayibhile.

Eli phenyane liziimitha ezisi-8,2 ubude neemitha ezisisi-2,3 ububanzi. Kunokuba umakhi walo abethelele amaplanga kuphahla olusele lwakhiwe, loo maplanga wawabethelela ngqo kumphantsi wephenyane waza wabethelela amacala ngoxa esakha umzimba walo. Le yayiyindlela eqhelekileyo yokwakha amaphenyane awayehamba kuLwandle lweMeditera. Noko ke, kusenokwenzeka ukuba eli phenyane laseGalili lalilungiselelwe ukuhamba echibini.

Kubonakala ukuba eli phenyane ekuqaleni lalineseyile enye elinganayo macala onke. Amaphini alo amane okubhexa adiza ukuba kwakufuneka ubuncinane abantu abahlanu ukuliqhuba—amadoda amane okubhexa nomqhubi. Noko ke, eli phenyane lalinokuthwala abantu abalishumi nangaphezulu. Usenokuba nomfanekiso-ngqondweni wephenyane elilingana neli xa ufunda ngabafundi bakaYesu abasixhenxe abambona emva kokuvuswa kwakhe ngoxa babeloba.—Yohane 21:2-8.

Alithandabuzeki elokuba eli phenyane lalinomgangatho ongasemva wokugcina iminatha emikhulu. Ngaphantsi kwaloo mgangatho, kwakukho indawo ezolileyo ababenokuphumla kuyo abalobi abadiniweyo. Kusenokwenzeka ukuba uYesu wayephumle kule ndawo, xa ebudeni boqhwithela, “wayesemva, elele phezu komqamelo.” (Marko 4:38) Kucingelwa ukuba ‘umqamelo’ ekuthethwa ngawo apha isenokuba yayiyingxowa yentlabathi eyayisetyenziselwa ukuzinzisa inqanawa.a

Abalobi NgakuLwandle LwaseGalili

Khawuzibone ukhwele kwiphenyane elinjengeli emva phayaa ngenkulungwane yokuqala. Njengokuba nihamba kuLwandle lwaseGalili, yintoni onokuyibona? Kukho abalobi, abanye bahamba ngamaphenyane amancinane kanti abanye bahamba kumanzi angenzulu kangako, bephose iminatha yabo. Njengamachule okuloba, basebenzisa nje isandla esinye ukuphosa le minatha yabo isisangqa esiziimitha ezintandathu nesibhozo ubukhulu. Loo minatha ivuleka ize ithi naa phezu kwamanzi, ize izike, ngaloo ndlela ibambisa iintlanzi. Umlobi uwurhuqela elunxwemeni umnatha wakhe ukuze abambe iintlanzi okanye uyantywila ukuze awukhuphele ngaphandle umnatha ozele ziintlanzi. EBhayibhileni kuthiwa uSimon noAndreya ‘babeyiphosa’ iminatha yabo, mhlawumbi ngendlela efanayo.—Marko 1:16.

Usenokubona neqela labalobi bencokola kamnandi njengoko belungisa umnatha omkhulu. Lo mnatha usenokuba ziimitha ezingama-300 ubude, yaye umbindi wawo usenokuba ziimitha ezisi-8 ubunzulu, yaye macal’ omabini kukho iintambo zokuwutsala. Emva kokuba abalobi bekhethe indawo abaza kuwuthoba kuwo umnatha, isiqingatha sabalobi siya elunxwemeni ngoxa sitsala enye intambo. Iphenyana lihamba ngqo lingena emanzini, uze uvulwe ngokupheleleyo umnatha, emva koko, iphenyane liyajika, liwutsala kancinane loo mnatha ukuze ukhangeleke usisazinge xa uselunxwemeni. Emva koku bonke abalobi bayehla nelinye icala lentambo. Njengokuba la maqela mabini abalobi eya esondelelana, bayazitsala iintlanzi abazibambisileyo.—Mateyu 13:47, 48.

Mgama kukho umlobi omnye osebenzisa igwegwe kunye nentambo. UYesu waxelela uPetros ukuba aphose igwegwe lakhe kwakolu lwandle. Usenokuyicingela indlela uPetros awamangaliswa ngayo xa wabambisa intlanzi waza wafumana emlonyeni wayo ingqekembe yesiliva—kanye imali eyayanele ukuhlawula irhafu yetempile.—Mateyu 17:27.

Kuthi kwakutshon’ ilanga, kuthi nzwanga echibini. Ngequbuliso, loo nzolo ipheliswa kukungqisha kweenyawo zabalobi nokubetha kwabo amanzi ngamaphini okubhexa ukuze bangxole kakhulu. Bangxolela ntoni? Abalobi babeke iminatha yokuthiyela iintlanzi ukuze xa zothuswe yile ngxolo ziziyele kulo mgibe. Lo mnatha ume nkqo, ungabonakaliyo ebumnyameni, uyilwe ngendlela yokuba intlanzi ikhawuleze ibambeke lula. Le minatha ithotywa ngokuphindaphindiweyo ebudeni bobusuku. Ekuseni iyahlanjwa ize ixhonywe ukuze yome. Mhlawumbi uyazibuza, ‘Ngaba xa kwabanjiswa iintlanzi ngommangaliso ochazwe kuLuka 5:1-7 kwakusetyenziswe le minatha ime nkqo?’

Umsebenzi Wokuhlaziya

Makhe sibuyele kumaxesha anamhlanje. Kuthekani ngelaa phenyane lalifunyenwe echibini? Nangona lalisaphelele, umzimba walo wawunjengekhadibhodi ebethwe ngamanzi. Ukulikhupha nje eludakeni kwakuza kulonakalisa. Kwakuza kwenzeka ishwangusha lokuba emva kokusinda iminyaka emininzi kangaka, lisuke nje eli phenyane lidilike xa likhutshwa emhlabeni! Ekubeni amanzi echibi ayesenokuphinda anyuke, kwakhiwa udonga lokuthintela amanzi kule ndawo. Kwakhiwa iitonela ngaphantsi komphambili weli phenyana ukuze kufakwe ifiberglass yokulixhasa. Njengoko kwakususwa udaka ngobunono, umzimba weli phenyana watyatyekwa ngaphakathi nangaphandle ngesiponji sokulikhusela.

Into elandelayo enzima yayikukulishenxisa eli phenyane lithambileyo lisiwe kwisiza esikwiimitha ezingama-300 ukuze kuqaliswe umsebenzi wokulilungisa. Esi siponji sasomelele, kodwa ukungqutywa nje okuncinane kwakunokuyidiliza yonke loo nto yayingaphakathi. Eli qela laxoza mphini wumbi. Lwaluvula udonga olwalakhiwe ukuze kungene amanzi. Okwesihlandlo sokuqala emva kweenkulungwane ezininzi, eli phenyane, ngoku elaligqunywe ngesiponji, lalidada kuLwandle lwaseGalili.

Kwakhiwa itanki yesamente ukuze eli phenyane lihlale kuyo ngexesha lilungiswa, umsebenzi owathabatha iminyaka eli-14. Kwabakho ingxaki xa le tanki yazaliswa ngamaqanda eengcongconi, nto leyo eyayisenza izinto zibe nzima kwabo bangena kula manzi xa besebenza kweli phenyane. Noko ke, iqela elilungisa eli phenyane lafumana icebo lokwemvelo nelamandulo. Lancedwa kukufaka kula manzi iintlanzi eziliqela ekuthiwa ziiSt. Peter’s, ezawatya zawagqiba la maqanda aza amanzi asala ecocekile.

Kungekudala lalifikile ixesha lokuba eli phenyane lomiswe. Lalisathambile gqitha ukuba liyekwe lizomele ngokwalo. Endaweni yamanzi ayephakathi kumthi elalakhiwe ngawo eli phenyane, kwafuneka kufakwe enye into. Eli qela lasebenzisa ubuchule obuthile bokufaka umthwebeba owenziweyo onyibilikayo emanzini, owabangela ukuba umthi wome ungakhange uguqule indlela oyiyo.

Wakuba ugqityiwe umsebenzi wokulungisa eli phenyane, kwavela umzimba walo owawenziwe ngendlela elula. Lalakhiwe ngeendidi zemithi ezili-12. Yintoni eyabangela oku? Mhlawumbi esinye isizathu kukuba imithi yayinqabile ngelo xesha. Kanti enye into esenokuba yabangela oku kukuba umnini weli phenyane wayengesosityebi. Eli phenyane lalilungiswe kaninzi ngaphambi kokuba liyekwe ukuba lizizikele emanzini.

Kusenokwenzeka ukuba uYesu wayengenanto yakwenza neli phenyane laseGalili. Kodwa, kubantu abaninzi lalixabisekile. Ngokukhangela kulo, abaninzi bafumana ithuba lokuba nomfanekiso-ngqondweni weenkulungwane ezininzi ngaphambili baze babone izinto ezazisenzeka kuLwandle lwaseGalili kwiintsuku ezibalulekileyo zokushumayela kukaYesu emhlabeni.

[Umbhalo osemazantsi]

a Bona inqaku elithi “KuLwandle LwaseGalili,” kwiMboniselo ka-Agasti 15, 2005, kwiphepha 8, epapashwe ngamaNgqina kaYehova.