Okwenzeka Ehlabathini

◼ Unyaka ophelileyo “ngowona ubushushu kuMntla weIkweyitha” yaye “ngowesibini ngobushushu ehlabathini lonke.” Iminyaka esi-8 kweli-10 ebitshisa [embalini] ibikule minyaka ilishumi idluleyo.”—IINDABA ZEBBC, EBRITANI.

◼ Ngowama-2005 ixesha lokubakho kweenkanyamba kwiAtlantiki lalilelona lineenkanyamba ezininzi yaye “kusenokutshiwo ukuba . . . yayizezona zitshabalalisayo embalini. Iinkanyamba ezisi-7 kwezili-14 zazinomoya owawuhamba ngesantya esiziikhilomitha ezili-177 ngeyure.—U.S. NATIONAL OCEANIC AND ATMOSPHERIC ADMINISTRATION.

◼ “Ngowe-1850, eGlacier National Park eMontana [eUnited States] kwakukho amaqhekeza amakhulu omkhenkce angaphezu kwali-150. Ngoku kukho angama-27.”—THE WALL STREET JOURNAL, eUnited States.

◼ “Licacile elokuba ingxaki ekhoyo kuthethathethwano ngokuphathelele ukufudumala okusemhlabeni wonke kukuba akukho lizwe lifuna ukutshintsha imithetho yalo ukuze licombulule le ngxaki ukuba olo tshintsho luya kuchaphazela imeko yezoqoqosho yelo lizwe.”—UTONY BLAIR, INKULUMBUSO YASEBRITANI.

Ngaba AmaKatolika Aza Kushumayela “Kwindlu Ngendlu”?

UCláudio Hummes, ubhishophu omkhulu waseSão Paulo uthi, inani lamaKatolika aseBrazil liye lehla lisusela kuma-83 ekhulwini laya kutsho kuma-67 ekhulwini kwiminyaka eli-14 edluleyo. Lo bhishophu uthi oku kubangelwe kukuba “icawa ayikwazi, ngenxa yezizathu ezahlukahlukeneyo, ukushumayela ivangeli kumalungu ayo abhaptiziweyo.” Lo kaHummes uthi: “Sifanele siye kufuna abantu abathembekileyo kwindlu ngendlu, ezikolweni, nakumaziko kodwa kungekhona ezicaweni kuphela.” IFolha Online ithi lo msebenzi ufanele wenziwe ngamarhamente aqeqeshwe njengabavangeli. Ukushokoxeka kwabefundisi yenye yeengxaki ezinkulu zeCawa yamaKatolika eBrazil nakuMbindi noMzantsi Merika uphela.

Ukwamkelwa Kwawo Ngokusemthethweni EJamani

NgoFebruwari 10, 2006 iNkundla Yesizwe Yolawulo eLeipzig eJamani yapapasha isigqibo esasithi uRhulumente waseBerlin umele awugqale Umbutho Wonqulo WamaNgqina kaYehova oseJamani njengombutho wasekuhlaleni osemthethweni. Esi yayisisigqibo kwidabi elingokwasemthethweni ebelisiliwa kangangeminyaka eli-15 yaye ebudeni baloo minyaka eli tyala laxoxwa ziinkundla eziliqela eJamani, kuquka iNkundla Yesizwe Yomgaqo-siseko. Njengombutho wasekuhlaleni, Umbutho Wonqulo WamaNgqina kaYehova eJamani ufanele ungayihlawuli irhafu uze uxhamle namanye amalungelo afunyanwa ziicawa eziphambili kwelo lizwe.

Abantwana BamaTshayina Bakhotyokiswa Yimidlalo Ye-Internet

ISouth China Morning Post yaseHong Kong ithi: “Ukuba likhoboka lemidlalo ye-Internet kuxhaphakile kubantwana bamaTshayina. Kwakhona nabantwana beminye imimandla yeMpuma, njengoMzantsi Korea, iHong Kong neJapan bayayithanda le midlalo. Eli phephandaba lithi: “Olu thando lungaka lwe-Internet nemidlalo ye-elektroniki lungumphumo wendlela abazali ababakhuthaza ngayo abantwana babo ukuba nezinto zobugcisa baze bafumane amanqaku aphezulu ukuze bakwazi ukwamkelwa eyunivesithi.” Kuqikelelwa ukuba bazizigidi ezithandathu abantwana bamaTshayina abafuna ukuncedwa ukuba bayeke ukuba ngamakhoboka ale midlalo.