Imbono YeBhayibhile
Ngaba Unokubanceda Abantu Abafileyo?
“Kudala iCawa . . . ithandazela [abantu abafileyo] . . . ukuze abahlambulukileyo bambone ngokoqobo uThixo.”—“Incwadi yeCawa yamaKatolika.”
NGOKUQHELEKILEYO abantu beentlanga zonke baxhalabile ngemeko yabafi. Mhlawumbi wakhe waziva ubuhlungu ngenxa yokufelwa lilungu lentsapho okanye umhlobo. Mhlawumbi uyazibuza enoba abantu abafileyo bayaphila ndawen’ ithile, enoba bayabandezeleka okanye baseluxolweni yaye kukho into onokuyenza ukubanceda kusini na.
Abantu abaninzi becawa bakholelwa ukuba banokubanceda abantu abafileyo. Ngokomzekelo, amaHindu azisa imizimba yamalungu eentsapho zawo ukuba itshiswe ngaselunxwemeni loMlambo iGanges yaye emva koko uthuthu lusasazwa apho, emlanjeni. Akholelwa ukuba oku kusisiqinisekiso solonwabo olungunaphakade kumphefumlo womfi. EMpuma, amaBhuda atshisa iimoto, izindlu, iimpahla nemali eyenziwe ngephepha, ekholelwa ukuba abantu abafileyo baya kukwazi ukuzisebenzisa ezo zinto kwindawo entsha abaza kube bephila kuyo. EAfrika, kugalelwa utywala engcwabeni, ngembono yokuba umntu ofileyo uza kubusela.
AmaKatolika afundisa ukuba, ukuba umntu ufa engakhange aguquke “kwisono esinzulu,” uThixo akakholiswa nguye. Le ndawo “ibizwa ngokuba ‘sisihogo.’”Kwelinye icala, afundisa ukuba, ukuba uThixo ebekholiswa ngumntu othile, loo mntu unethemba “eliqaqambileyo, ulonwabo oluqinisekileyo” noThixo emazulwini, kodwa kungekhona ngaphambi kokuba ahlanjululwe ngokugqibeleleyo. Xa ehlanjululwa, kusenokufuneka achithe ixesha kwintlambululo-miphefumlo enyamezele “ukuhlanjululwa ngomlilo” njengesohlwayo seziphoso ezinokuxolelwa. Ngoxa ekwintlambululo-miphefumlo, umntu unokuncedwa yimibhedesho—imithandazo eyenzelwa abafileyo yicawa yamaKatolika—kwaneMithendeleko yabafileyo. Ngokuqhelekileyo iinkonzo ezinjalo zihlawulwa ngabahlobo nezalamane zomfi.
Kuyinto yemvelo ukufuna ukwenza nantoni na ukuze uncede intsapho okanye abahlobo bakho xa bejamelene nembandezelo. Ukuba ubunako ukubanceda, ngaba uThixo ebengenakuyichaza ngokucacileyo indlela oko okunokwenziwa ngayo? Makhe sihlolisise oko iBhayibhile ikufundisayo ngemeko yabafi.
Imeko Yabafi
Zonke ezi mfundiso zikhankanywe ngasentla zisekelwe kwinkolelo yomphefumlo ongafiyo, okutheth’ ukuthi, inxalenye ethile emntwini iqhubeka iphila emva kokuba umzimba wakhe ufile. Ngaba iBhayibhile ifundisa oko? IBhayibhile ithi: “Kuba abaphilayo bayazi ukuba baya kufa; kodwa abafileyo, abazi nto konke konke, abasenamvuzo, ngenxa yokuba balityelwe, abasakhunjulwa nganto. Uthando lwabo, intiyo yabo nekhwele labo sele latshabalala, yaye abasenasabelo konke konke kuyo nantoni na eyenzekayo phantsi kwelanga. Konke esikufumanayo ukuba sikwenze isandla sakho kwenze ngamandla akho onke, kuba akukho msebenzi nakuyila nakwazi nakulumka eShiyol, kwindawo oya kuyo.” (INtshumayeli 9:5, 6, 10) Igama elithi Shiyol ligama lesiHebhere elibhekisela kwingcwaba.
Umdumisi waphefumlelwa ukuba abhale athi: “Uyaphuma umoya wakhe, abuyele yena emhlabeni wakhe; ngaloo mini ziyatshabalala iingcamango zakhe.”—INdumiso 146:4.
Amazwi aseBhayibhileni anokuthenjwa yaye asengqiqweni. Ucinga ntoni wena? Ngaba ubawo onothando angenza abantwana bakhe babandezeleke ngenxa yotyekelo lwesono abasizuza njengelifa? (Genesis 8:21) Akunjalo. Ngoko ke kutheni ucinga ukuba uBawo wethu osezulwini unokwenza into efanayo? Xa abantu abathile kuSirayeli wamandulo baye bamkela isithethe sabahedeni betshisa abantwana babo emlilweni ngaloo ndlela bebingelela koothixo bobuxoki, uYehova wasigatya eso sithethe esichaza ‘njengento angabayalelanga yona nengathanga qatha entliziyweni yakhe.’—Yeremiya 7:31.
Umvuzo wesono kukufa, kungekhona ukuthuthunjiswa emva kokufa. IZibhalo zithi: “Umvuzo isono esiwuhlawulayo kukufa yaye lowo uye wafa ugwetyelwe kwisono sakhe.”—Roma 5:12; 6:7, 23.
Abantu abafileyo ababandezeleki. Kunoko ngathi balele obentlombe, abazi nto konke konke. Ngoko ke, nantoni na abantu abayenzayo beyenzela abantu abafileyo iyangqubana neemfundiso zeBhayibhile.
Liyintoni Ithemba Ngabantu Abafileyo?
Oku akuthethi kuthi izalamane okanye izihlobo zakho ezifileyo ziya kuhlala zingazi nto ngonaphakade. Ngokwahlukileyo koko zinethemba eliqaqambileyo.
Ngaphambi kokuba avuse umhlobo wakhe amthandayo, uYesu wathi wayeza ‘kumvusa ebuthongweni.’ (Yohane 11:11) Ngesinye isihlandlo wathi ‘bonke abo bakumangcwaba enkumbulo baya kuliva ilizwi lakhe baze baphume.’ (Yohane 5:28, 29) Izono zangaphambili zabantu abavusiweyo ziya kuba zigwetyiwe yaye akuyi kuba yimfuneko ukuba babandezeleke ngoko bakwenzayo ngoxa babesaphila. Baya kuba nelungelo lokuphila ubomi befezekile. Eli lithemba elivuyisa ngokwenene!
Ukuba eli themba libangel’ umdla kuwe, musa ukuthandabuza ukuqinisekisa ngobunyaniso balo. AmaNgqina kaYehova angakuvuyela ukukunceda.
NGABA WAKHA WAZIBUZA?
◼ Ngaba ikho into eyaziwa ngabantu abafileyo?—INdumiso 146:4; INtshumayeli 9:5, 6, 10.
◼ Ngaba uThixo angavumela abantu abafileyo babandezeleke ngokutsha esihogweni?—Yeremiya 7:31.
◼ Ngaba likho ithemba ngabantu abafileyo?—Yohane 5:28, 29.