Imbono YeBhayibhile
Ngaba UbuKristu Buye Basilela?
MALUNGA nesithathu sabantu abasemhlabeni sizibanga singamaKristu. Noko ke, ihlabathi libonakala lahlulelene ngezopolitiko yaye linogonyamelo kakhulu kunanini na ngaphambili. Ngaba oku kutheth’ ukuba ubuKristu obafundiswa nguYesu buye basilela ngandlel’ ithile? Okanye ngaba busilela ngenxa yokuba abantu bengazisebenzisi kakuhle iimfundiso zikaKristu?
Eli nqaku liza kuhlolisisa oko ngokwenene kwafundiswa nguKristu nomzekelo awawumisela abalandeli bakhe. Kwakhona, liza kuqwalasela indlela abafana ngayo abo bathi bangamaKristu, nto leyo engqubana nentsingiselo yokwenene yobuKristu.
UbuKristu Obugqwethekileyo
Kumakhulu amane eminyaka emva kokufa kukaKristu, uBukhosi baseRoma bamkela ubuKristu obugqwethekileyo. Engabamkeli abanye abantu, amalungu eqela labo bathi bangamaKristu ngokukhawuleza azifumanisa ethe zwabha kwezopolitiko nezithethe zebutho lamaRoma. Iinkokeli zeCawa, njengoAugustine, zalamkela olu tshintsho kangangokuba zafundisa ukuba uBukumkani bukaThixo obabulindelwe babusele bufikile. Ezo nkokeli zafundisa ukuba impembelelo yazo kwezopolitiko nonqulo yindlela yokuba kwenziwe ukuthanda kukaThixo emhlabeni. Ngaloo ndlela babethelela ukuba abantu babemele bangenelele kwimicimbi yasekuhlaleni.
Ngenxa yoko, abantu abaninzi baye bacinga ukuba amaKristu afanele abandakanyeke kwezobupolitika. Abantu abaninzi bakholelwa ukuba maxa wambi umKristu, ufanele abeke izinto zasekuhlaleni kwindawo yokuqala kuneenkolelo zakhe. Ngokomzekelo, abantu abaninzi batsho nje ngomlomo ukuba banothando yaye baseluxolweni njengokuba uKristu wafundisa ukuba bafanele babe njalo, ngoxa kwangaxeshanye bexhasa iimfazwe. Ngesizathu esifanayo, iicawa zisenokukhuthaza abalandeli bazo ukuba bathandazele uBukumkani bukaThixo kodwa kwangaxeshanye baxhase abalawuli abacinezelayo.
UYesu akazange amisele loo nomgogwana wobuKristu. Kunoko, lo nomgogwana wamiselwa ngabantu yaye ulandelwa ngabantu abaninzi abathi bangamaKristu namhlanje. Olu hlobo lobuKristu luye lwasilela ngenxa yokuba zonke iicawa zeNgqobhoko namhlanje ziye zayibetha ngoyaba imigaqo eseBhayibhileni.
Yintoni Ngokwenene Eyayifundiswa NguYesu?
Abanye baya kothuka ukufumanisa ukuba uYesu wathi abalandeli bakhe abafanele babe ‘yinxalenye yehlabathi, kanye njengoko naye [wayengeyiyo] inxalenye yehlabathi.’ (Yohane 17:15, 16) Kwakutheni ukuze uKristu akhuthaze abafundi bakhe ukuba bangabi yiyo inxalenye yehlabathi? Umpostile uYohane, umfundi uYesu awayethanda kunene, uyaphendula. Uthi: “Ihlabathi liphela lisemandleni ongendawo.”—1 Yohane 5:19.
Ngoko ke, iimfundiso zikaKristu azithi abantu bafanele bathembele kwimibutho yabantu, kodwa zithi bathembele kuBukumkani bukaThixo obusezulwini obuza kuzisa okusesikweni nobulungisa aph’ emhlabeni. (Mateyu 6:10) UYesu akazange abandakanyeke nakancinane kwimicimbi yasekuhlaleni yexesha lakhe. Wasikhaba ngawo omane isikhundla sezobupolitika. (Yohane 6:15) Kwakhona waluphepha ugonyamelo njengendlela yokulungisa iingxaki. (Mateyu 26:50-53; Yohane 18:36) UYesu wayengenawo umgaqo-siseko okanye imithetho elawula abemi. Akazange abandakanyeke kwimicimbi yezopolitiko yexesha lakhe. Ngokomzekelo, akazange aququzelele amalungelo amakhoboka, okanye abandakanyeke kusukuzwano lwamaYuda nxamnye namaRoma.
Noko ke, oku akuthethi kuthi uYesu wayengazikhathalelanga iingxaki zabantu. UYesu wafundisa kakhulu ngembopheleleko esinayo ngomnye umntu. Wakhuthaza ukuba sinyaniseke ekuhlawuleni irhafu waza wabethelela ukuba kufuneka sithobele amagunya. (Mateyu 22:17-21) Wafundisa nendlela yokubonisa umdla ngentlalo-ntle yabo basweleyo. Kwakhona wafundisa ukuba sibahlonele abanye yaye wabonisa nokuba sifanele sibe novelwano, sixolele size sibe nenceba kwabanye. (Mateyu, isahluko 5-7) Eyona nto eyafundiswa nguKristu kukuba sibe nothando ngoThixo nangommelwane.—Marko 12:30, 31.
UbuKristu Bokwenyaniso Namhlanje
Noko ke, umlandeli wokwenene kaKristu ufanele aziphathe njani? Uya kuzenza izinto ngendlela uYesu awazenza ngayo. Ngoxa ngokuthembeka eya kuthobela imithetho yelizwe ahlala kulo, akasayi kuba nanxaxheba kwimicimbi yezobupolitika. (Yohane 12:47, 48) Akayi kulalanisa kwimigaqo yamaKristu, kwanaxa enyanzelwa. (1 Petros 2:21-23) Kwangaxeshanye, umKristu akasayi kusonga nje izandla. UmKristu wokwenyaniso uya kuba nomdla kwintlalo-ntle yabantu abamngqongileyo, njengokuba noYesu wenzayo. (Marko 6:34) Kwakhona uya kusebenzisa ixesha namandla akhe ukuze ancede abanye baphile ubomi obonwabisayo ngokubanceda baqonde baze baphile ngokuvisisana neemfundiso zikaKristu.—Yohane 13:17.
Ngoko ke, amaNgqina kaYehova namhlanje azama ukuxelisa uKristu ngendlela aqhubana ngayo nabantu ababangqongileyo. Nakuba engabemi abathobela imithetho karhulumente, akayiyo inxalenye yehlabathi. Njengokuba uYesu wenjenjalo, akabandakanyeki kugonyamelo neengxwabangxwaba zezobupolitika ezixhaphakileyo namhlanje. Athembe uBukumkani bukaThixo njengobuya kucombulula iingxaki zoluntu. AmaKristu okwenyaniso aphila ubomi obonwabisayo yaye amanyene. (Yohane 13:34, 35) Ngokuqinisekileyo ubuKristu bokwenyaniso abukhange busilele.
NGABA WAKHA WAZIBUZA?
◼ Ngaba amaKristu afanele abandakanyeke kwezobupolitika?—Yohane 6:15.
◼ Ngaba uYesu wakhuthaza ugonyamelo ukuze kuconjululwe iingxaki?—Mateyu 26:50-53.
◼ Siwabona ngantoni amaKristu okwenyaniso?—Yohane 13:34, 35.
[Inkcazelo Ngomfanekiso okwiphepha 18]
EL COMERCIO, Quito, Ecuador