IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g 1/07 iphe. 20-22
  • Umkhombe KaNowa Nokwakhiwa Kweenqanawa

No video available for this selection.

Sorry, there was an error loading the video.

  • Umkhombe KaNowa Nokwakhiwa Kweenqanawa
  • Vukani!—2007
  • Imixholwana
  • Amanqaku Afanayo
  • Indlela Owawakhiwe Ngayo
  • Ukuzinza Kwenqanawa Elwandle
  • Wawukhuselekile
  • Abantu Abayi-8 Basindela Kumhlaba Omtsha
    Indifundisa Ntoni IBhayibhile?
  • Yintoni ityeya yesivumelwano?
    Imibuzo YeBhayibhile Iyaphendulwa
  • Umkhombe KaNowa
    Indifundisa Ntoni IBhayibhile?
  • UMkhukula Omkhulu
    Incwadi Yam Yamabali EBhayibhile
Khangela Okunye
Vukani!—2007
g 1/07 iphe. 20-22

Umkhombe KaNowa Nokwakhiwa Kweenqanawa

KANGANGEMINYAKA engaphezu kwama-40, bendisebenza njengomzobi nomakhi weenqanawa. Umsebenzi wam ibukukuzoba iinqanawa ezahlukahlukeneyo nezingalinganiyo, nezinye izinto eziyimfuneko ukuze inqanawa ihambe. Ngowe-1963, xa ndandihlala eBritish Columbia, eKhanada, elinye iNgqina likaYehova landibonisa ukuba incwadi yeBhayibhile yeGenesis ithi umkhumbi kaNowa wawuyibhokisi ende. Oku kwandenza ndanomdla, yaye ndagqiba kwelokuba ndenze uphando.

IGenesis ithi uThixo wayezimisele ukushenxisa ubungendawo emhlabeni ngomkhukula wamanzi womhlaba uphela. Waxelela uNowa ukuba akhe umkhombe owawuza kusindisa yena, intsapho yakhe neendidi zonke zezilwanyana. UThixo wayalela uNowa ukuba loo mkhombe ufanele ube ziikubhite ezingama-300 ubude, iikubhite ezingama-50 ububanzi, neekubhite ezingama-30 ukuphakama. (Genesis 6:15) Ngokutsho kolunye uqikelelo, oku kwakuthetha ukuba loo mkhombe wawuza kuba ziimitha ezili-134 ubude, neemitha ezingama-22 ububanzi, neemitha ezili-13 ukuphakama.a Oku kuthetha ukuba umkhombe wawunomthamo weekyubhik-mitha ezingama-40 000, umthamo ophantse ulingane nalowo wenqanawa yodumo iTitanic.

Indlela Owawakhiwe Ngayo

Umkhombe wawunemigangatho emithathu nto leyo eyawenza womelela ngakumbi waza wanendawo yokufak’ iimpahla eziiskwemitha ezingama-8 900. Loo mkhombe wawakhiwe ngomthi onentlaka—ukuze ungangeni manzi—ekusenokwenzeka ukuba lo yayingumsipres, yaye waqatywa itela ngaphakathi nangaphandle. (Genesis 6:14-16) Asixelelwa ukuba uNowa wayidibanisa njani le mithi. Kodwa kwanangaphambi kokuba kuthethwe ngoMkhukula, iBhayibhile ithetha ngabakhandi bezixhobo zobhedu nentsimbi. (Genesis 4:22) Phofu ke, nanamhlanje. kusasetyenziswa izikhonkwane zomthi xa kusakhiwa inqanawa yomthi.

Umkhombe wawunamagumbi angaphakathi, ecaleni kukho ucango, netsoʹhar eyayiyikubhite ukuphakama ekunokwenzeka ukuba yayinophahla olutsolo, kukho imingxuma ngezantsi kwayo yokungenisa umoya nokukhanya. Noko ke, le ngxelo yeGenesis ayithethi nto ngomphantsi okanye umphambili, iiseyile, amaphini omkhombe. Enyanisweni, igama eliguqulelwe ngokuthi “umkhombe” lisetyenziswe nakwingobozi eyayityatyekwe ngebhitumene netela eyasetyenziswa ngunina wosana olunguMoses ukuze lungaziki kumanzi oMlambo umNayile.—Eksodus 2:3, 10.

Ukuzinza Kwenqanawa Elwandle

Ubude bomkhombe babubuphinda kathandathu ububanzi buze bukuphinde kalishumi ukuphakama kwawo. Iinqanawa ezininzi zale mihla zinemilinganiselo efanayo, nangona kuzo ubude nobubanzi buxhomekeke kumandla afunekayo ukuze zihambe. Kanti ke, wona umkhombe wawuza kudada nje ngaphezulu. Wawuza kudada kakuhle kangakanani?

Ukuba inqanawa iyakwazi ukumelana nomoya namaza kuthiwa izinzile. Oku kuxhomekeke kubude, ububanzi nokuphakama kwenqanawa. IBhayibhile ichaza izantyalantyala zemvula ezabangela uMkhukula ize ithi kamva uThixo wenza kwabhudla umoya. (Genesis 7:11, 12, 17-20; 8:1) IZibhalo azisixeleli ukuba ayemakhulu kangakanani na amaza nomoya, kodwa kusenokwenzeka ukuba umoya namaza ayenamandla yaye ayeguquguquka njengokuba kusenokuba njalo nanamhlanje. Okukhona umoya ubhudla ixesha elide yaye usiba namandla, kokukhona namaza esiba makhulu yaye eqelelelana. Kwakhona, nenyikima yayiya kuvelisa amaza amakhulu.

Ubude, ububanzi nokuphakama komkhombe kwawenza wazinza, nto leyo eyenza ukuba ungawi. Kwakhona wakhiwa ukuze ukwazi ukujamelana nemimoya eyayinokuwenza udlokove xa ulwandle lugqutha. Ukudlokoviswa gqitha ngamaza kwakuza kubenza abantu nezilwanyana bangahlali ngokukhululekileyo ngaphakathi kumkhombe. Kwakhona oku kwakuza kuwonakalisa umkhombe. Indlela owawakhiwe ngayo kwakufanele ungophuki phakathi xa amaza ewuphakamisa macal’ omabini ngexesha elinye. Kanti, xa uphakanyiswa liliza elikhulu embindini, kungekho nto yokuwuxhasa, umphambili nomva wenqanawa wawusenokugoba. UThixo waxelela uNowa ukuba ubude bomkhombe buwuphindaphinde kalishumi umlinganiselo wokuphakama. Abakhi beenqanawa bamva bafunda kabuhlungu ukuba loo mlinganiselo wawuza kukwazi ukumelana nezi meko.

Wawukhuselekile

Ekubeni umkhombe wawumile okwetyesi, umoya wawuza kuwubetha ngendlela efanayo macala onke, nto leyo eyayiza kuwenza uzinze emanzini. Wanobunzima obulinganayo macala onke. Kusenokwenzeka ukuba uNowa waqinisekisa ukuba umthwalo—kuquka izilwanyana nokutya okwakuza kubagcina unyaka wonke—kwakubekwe kwalingana macala onke. Xa umthwalo ubekwe walingana oko kunciphisa ukubulaleka kwenqanawa. Phofu ke, ezona zinto zimbini ezabangela ukuba umkhombe nabantu ababekuwo basinde kuMkhukula—kukuba nguThixo owayalela indlela ofanele wakhiwe ngayo nenkuselo kaYehova. Ngokuqinisekileyo uThixo wenza ukuba umkhombe ume kwindawo ekhuselekileyo nefanelekileyo.

Ukuphanda kwam ngalo mbandela kwandikhokelela kwisigqibo esithi oko kuthethwa yiBhayibhile ngomkhombe kaNowa kuyinyaniso yaye kuyahambisana neendlela zokwakha iinqanawa zanamhlanje. Phofu ke, zininzi iinkcukacha eziphathelele umkhombe noMkhukula ezingakhankanywanga kwingxelo yeGenesis. Ndinethemba lokuba ngeny’ imini, emva kovuko, ndiya kudibana noNowa apha emhlabeni, ephila neentsapho nezilwanyana ezalondolozwa ngumkhombe awasebenza nzima ewakha. (IZenzo 24:15; Hebhere 11:7) Ndiya kuqala ngokumbulela yena nentsapho yakhe. Emva koko ndiya kumpheka ndimophula ngemibuzo.—Linikelwe.

[Umbhalo osemazantsi]

a Ikubhite yindlela yamandulo yokubala esenokulingana nomgama osuka engqinibeni ukusa kwiincam zeminwe. Ngexesha lamaSirayeli, kubonakala ukuba lo mlinganiselo wokubala wenziwa waziisentimitha ezingama-44,5.

[Ibhokisi/Umfanekiso okwiphepha 22]

UMKHOMBE OMNCINANE

Unokulinga ukuzenzela owakho umkhombe oncinane ngokusebenzisa le milinganiselo ilandelayo. (Usenokwakha omkhulu ngokuyandisa le milinganiselo ingezantsi.) Usenokusebenzisa iphepha eliqhelekileyo uze uliqabe umthwebeba okanye ipensile ekuthiwa yicrayon. Yandula ke uligobe iphepha uze ezikoneni ulincamathelise. Faka ngaphakathi izinto eziza kuwenza uzinze—njengeengqekembe zemali ezigqagqaniswe ngokulinganayo uze uzincamathelise—ude umkhombe uzinze yaye uzike nje kancinane emanzini.

Ukuze ukhangele enoba umkhombe wakho uza kuzinza, wujike uze uwubeke ngobude emanzini njengasebhafini. Zama ukwenza amaza amancinane ngokufaka iphanga lobisi okanye nantoni na enjengalo inqamleze emanzini ize uyitshonise emanzini kancinane ngesingqi esifanayo.

[Umzobo]

(Ukuba ufuna inkcazelo ehlahlelwe kakuhle, yiya kwimpapasho)

GOBA APHA GOBA APHA

GOBA APHA GOBA APHA

[Umfanekiso]

Umkhombe wawulingana neenqanawa zanamhlanje ngobude, ububanzi nokuphakama

[Umzobo/Imifanekiso ekwiphepha 20, 21]

(Ukuba ufuna inkcazelo ehlahlelwe kakuhle, yiya kwimpapasho)

Umphambili

Icala

Umphezulu

Umphambili

Icala

Umphezulu

[Imifanekiso]

Umkhombe wawunomthamo ophantse ulingane nowenqanawa “iTitanic”

[Inkcazelo]

Iplani yeTitanic: Courtesy Dr. Robert Hahn/www.titanic-plan.com; ifoto: Courtesy of The Mariners’ Museum, Newport News, VA

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share