Imbono YeBhayibhile

Ngaba Ukuthobeka Kububuthathaka Okanye Ukuba Namandla?

ABANTU abanekratshi bajongwa njengabanokuxeliswa. Ngokuqhelekileyo abantu abathobekileyo bajongwa njengababuthathaka, abangazithembanga okanye abanyabileyo. Kodwa ngaba ukuba ngothobekileyo kuthetha ukuba ubuthathaka? Ngaba ukuba nekratshi kuthetha ukuba unamandla? Ithini iBhayibhile ngako oku?

IBhayibhile ithetha kakuhle ngokuba neqhayiya. Ngokomzekelo, amaKristu afanele abe neqhayiya kuba uYehova enguThixo wawo yaye uyawazi. (INdumiso 47:4; Yeremiya 9:24; 2 Tesalonika 1:3, 4) Abazali basenokuba nebhongo kuba abantwana babo bengumzekelo omhle kwihambo yabo njengamaKristu yaye belumela ngokuqinileyo unqulo lokwenyaniso. (IMizekeliso 27:11) Noko ke, kukho ukuzigwagwisa okungafanelekanga.

Oko Kuthethwa Kukuba Nekratshi Nokuthobeka

Enye inkcazelo yegama elithi ikratshi kukuzidla. Ukuzigwagwisa okunjalo kwenza ubani acinge ukuba ubalulekile yaye wongamile kunabanye abantu, mhlawumbi ngenxa yokuba eyinzwakazi, eluhlanga oluthile, ekwisikhundla esiphezulu emsebenzini, enesiphiwo esithile okanye kuba esisityebi. (Yakobi 4:13-16) IBhayibhile ithetha ngomntu ‘okhukhumele likratshi.’ (2 Timoti 3:4) Ngamanye amazwi, umntu ozicingela ngokugqithiseleyo, kungekho sizathu sivakalayo.

Kwelinye icala, umntu othobekileyo, enyanisekile, uyazazi iintsilelo zakhe yaye uyavuma ukuba ungaphantsi xa ethelekiswa noThixo. (1 Petros 5:6) Ukongezelela, uyaqonda yaye uyavuya xa ebona iimpawu ezintle kwabanye. (Filipi 2:3) Kungako nje abantu abathobekileyo bengabi namona okanye babe nobukhwele. (Galati 5:26) Noko ke, licacile elokuba umntu othobeke ngokunyanisekileyo uba nolwalamano oluhle nabanye abantu yaye oko kuphumela ekubeni azive ekhuselekile ngokweemvakalelo yaye ezinze.

Makhe siqwalasele umzekelo kaYesu. Ngaphambi kokuba eze emhlabeni, wayesisidalwa somoya esinamandla sasezulwini. Xa wayesemhlabeni wayefezekile engenasono. (Yohane 17:5; 1 Petros 2:21, 22) Kwakungekho mntu wayenokuthelekiswa naye ngobukrelekrele namandla. Kodwa wawungenakuyibona loo nto kuba wayesoloko ethobekile. (Filipi 2:6) Ngesinye isihlandlo wahlamba iinyawo zabafundi bakhe yaye wayenomdla onyanisekileyo ebantwaneni. (Luka 18:15, 16; Yohane 13:4, 5) Enomntwana ecaleni kwakhe, uYesu wathi: “Nabani na othe wazithoba njengalo mntwana uselula nguye ongoyena mkhulu ebukumkanini bamazulu.” (Mateyu 18:2-4) Ewe, emehlweni kaYesu—nakaYise—ukuze siphakanyiswe, sifanele sithobeke kunokuba sibe nekratshi.—Yakobi 4:10.

Ukuthobeka Kuthetha Ukuba Namandla

Nakuba uYesu wayengumzekelo wokuthobeka wayenganyabanga okanye ebuthathaka. Ngenkalipho wayetheth’ inyaniso yaye wayengaboyiki abantu. (Mateyu 23:1-33; Yohane 8:13, 44-47; 19:10, 11) Ngenxa yoko, wayehlonelwa ngabantu kuquka nabantu ababemchasa. (Marko 12:13, 17; 15:5) Kodwa uYesu wayengenguye uzwilakhe. Kunoko, ethobekile, enobubele yaye enothando abantu batsaleleka kuye, yaye babengenakutsaleleka kumntu onekratshi. (Mateyu 11:28-30; Yohane 13:1; 2 Korinte 5:14, 15) Nanamhlanje abantu abaninzi bamthobela ngokunyanisekileyo uKristu ngenxa yokuba bemthanda yaye bemhlonela.—ISityhilelo 7:9, 10.

ILizwi likaThixo lisikhuthaza ukuba sithobeke ngenxa yokuba abantu abanjalo bayasamkela isiluleko yaye kulula ukubafundisa. (Luka 10:21; Kolose 3:10, 12) NjengoApolo, umKristu wenkulungwane yokuqala owayeliciko abantu abathobekileyo bakulungele ukutshintsha indlela abacinga ngayo xa kudluliselwa inkcazelo entsha. (IZenzo 18:24-26) Abakoyiki ukubuza xa bengaqondi nakuba umntu onekratshi engasoze abuze kuba engafuni ukubonakala ngathi akazi nto.

Phawula umzekelo wethenwa elingumTiyopiya, owayefunda indinyana yeZibhalo awayengayiqondi. Umfundi ongumKristu uFilipu wabuza: “Uyakwazi na okunene oku ukufundayo?” UmTiyopiya waphendula wathi: “Ngokwenene, ndingakwenza njani oko, ngaphandle kokuba ndikhokelwe nguthile?” Hayi indlela awayethobeke ngayo lo mthenwa! Ngenxa yokuthobeka, waziqonda iZibhalo.—IZenzo 8:26-38.

Ngokwahlukileyo kumTiyopiya, ababhali nabaFarisi abangamaYuda babezigqala njengabantu abakumgangatho ophezulu ngexesha labo. (Mateyu 23:5-7) Kunokuba ngokuthobeka bamphulaphule uYesu nabalandeli bakhe, bamgculela baze bajonga iimpazamo zabo. Ngenxa yoko, ikratshi labenza bahlala besebumnyameni ngokomoya.—Yohane 7:32, 47-49; IZenzo 5:29-33.

Ngaba Uludongwe Oluthambileyo Okanye Oluqinileyo?

IBhayibhile ifanisa uYehova nombumbi yaye abantu ibafanisa nodongwe. (Isaya 64:8) Ukuthobeka kunceda ubani abe njengodongwe oluthambileyo ezandleni zikaThixo, umntu amxonxa khon’ ukuze abe sisitya esinqwenelekayo; kwelinye icala umntu onekratshi ufana nodongwe olomileyo noluqinileyo olufuna nje ukutyunyuzwa. Omnye umzekelo womntu onekratshi nguFaro waseYiputa yamandulo, owagatya uYehova nto leyo eyaphumela ekubeni aphulukane nobomi bakhe. (Eksodus 5:2; 9:17; INdumiso 136:15) Ukufa kukaFaro kuzalisekisa lo mzekeliso: “Ikratshi liphambi kokuwa, yaye umoya wekratshi uphambi kokukhubeka.”—IMizekeliso 16:18.

Oku kuchazwe ngasentla akuthethi kuthi abantu bakaThixo abazange babe nengxaki yokuba nekratshi. Ngokomzekelo, abapostile bakaYesu babephikisana ngokuba ngubani oyena mkhulu phakathi kwabo. (Luka 22:24-27) Sekunjalo, abazange balawulwe likratshi kodwa bamphulaphula uYesu yaye ekugqibeleni basitshintsha isimo sabo sengqondo.

USolomon wabhala wathi: “Umphumo wentobeko nokoyika uYehova bubutyebi, uzuko nobomi.” (IMizekeliso 22:4) Ngokuqinisekileyo sinesizathu esivakalayo sokuhlakulela ukuthobeka! Ukuthobeka asilophawu nje lwamandla okanye uphawu oluthandekayo kodwa ngenxa yalo uThixo uyakholiswa sithi yaye siya kufumana ubomi obungunaphakade.—2 Samuweli 22:28; Yakobi 4:10.

NGABA WAKHA WAZIBUZA

◼ Ngaba zonke iindlela zokuba nekratshi azifanelekanga?—2 Tesalonika 1:3, 4.

◼ Ukuthobeka kusikhuthaza ukuba sifunde ntoni?—IZenzo 8:26-38.

◼ Ngaba abakhonzi bakaThixo kufuneka behlakulele ukuthobeka?—Luka 22:24-27.

◼ Liliphi ikamva elibekelwe abantu abathobekileyo?—IMizekeliso 22:4.

[Umfanekiso okwiphepha 20, 21]

Abantwana babetsalelekile kuYesu kuba wayethobekile