Andiselilo Ikhoboka Lotywala

Ukuba utywala busetyenziswa kakuhle bunokwenza isidlo sibe mnandi baze nabantu bonwabe ngeso sihlandlo. Noko ke, kwabanye abantu, ukusel’ utywala kukhokelela kwiingxaki ezinzulu. Makhe sive oko kwenzeka kwindoda ethile eyayekayo ukuba likhoboka lotywala.

KUSEBUHLUNGU nangoku ukubalisa ngemeko enxubisayo yasekhaya. UTata noMama babedla ngokuqala ngokusela. Emva koko, uTata wayedla ngokumbetha uMama. Nam lo ayedla ngokundifumana loo manqindi. Xa bagqiba ekubeni bahlukane, ndandineminyaka emine ubudala. Ndikhumbula ndisiya kuhlaliswa noMakhulu.

Ndaziva ndingafunwa. Xa ndandineminyaka esixhenxe ubudala, ndandidla ngokuya ekoyini ndize ndisele, yaye oku kwakundinika isiqabu. Umama nomakhulu baba nengxabano eshushu ngam xa ndandineminyaka eli-12 ubudala. UMama ebila ngumsindo wandigibisela ngefolokhwe. Ndaphepha. Esi yayingekuphela kwesihlandlo ubomi bam busengozini. Noko ke, iziva ezisemzimbeni azikho nzulu njengezo zingaphakathi.

Xa ndandineminyaka eli-14 ubudala, ndandilinxila, yaye xa ndandineminyaka eli-17 ubudala ndalishiya ikhaya. Xa ndisele ndandisenza nantoni na, ndandiba nomsindo, ndibe yingxaki nje eshibhini. Ukunxila yayikuphela kwento eyayindonwabisa. Ngosuku, ndandidla ngokusela iwayini engangeelitha ezi-5, ibhiya eziliqela kuquka igrangqa.

Naxa ndandisele nditshatile, ukunxila kwaba luxanduva kumfazi wam. Ingqumbo yakhula yaye ndandiyibeth’ inkosikazi nabantwana, ndibaphethe ngale ndlela nam ndakhula ngayo. Ngomvuzo wam wonke ndandithenga utywala. Sasingenayo ifanitshala, ngoko ke, mna nenkosikazi sasilala phantsi. Ndandingayazi ukuba ndiphilela ntoni yaye kwakungekho nto ndiyenzayo ukuphucula imeko.

Ngenye imini ndancokola nelinye iNgqina likaYehova. Ndalibuza ukuba kutheni kukho ukubandezeleka okungaka yaye landibonisa ngokusuka eBhayibhileni ukuba uThixo uthembisa ihlabathi elingenazo iingxaki. Oko kwandeyisela ekubeni ndiqalise ukufunda iBhayibhile namaNgqina. Njengokuba ndandisele ndikusebenzisa oko ndikufunde eBhayibhileni yaye ndinciphisa nalaph’ etywaleni, iimeko zaba bhetele noko entsatsheni. Sekunjalo, ndaqonda ukuba, ukuba ndifuna ukukhonza uYehova uThixo ngendlela eyamkelekileyo, kwakufuneka ndoyise ingxaki yam yotywala. Emva kweenyanga ezintathu ndisiwa ndivuka, ndayeka ukuba likhoboka lotywala. Emva kweenyanga ezintandathu ndazahlulela kuThixo ndaza ndabhaptizwa.

Ngokwahlukana kwam notywala, ndahlawula amatyala endandinawo. Ndathenga indlu nemoto, esiyisebenzisayo xa sisiya kwiintlanganiso zamaKristu nasentsimini. Ekugqibeleni, nam ndaqalisa ukuzihlonela.

Maxa wambi xa sonwabile ndikhe ndinikwe utywala. Abantu abaninzi abazi ukuba ndilwa nobukhoboka botywala yaye ndiyazi ukuba, ukusela nje kube kanye kunokundenza ndivukwe likakade. Ndikhe ndibubawele maxa wambi. Kuye kufuneke ndithandaze ndize ndizixelele ukuba andinikezeli. Xa ndinxaniwe, ndisela kakhulu nasiphi na isiselo ngaphandle kotywala. Ngoku ndineminyaka elishumi ndingazange ndifake nethontsi.

UYehova wenza izinto ezingenakwenziwa ngabantu. Uye wandinceda ndanenkululeko endandingacingi ukuba ndiya kuze ndiyifumane. Ndisambinambineka ngenxa yeziva endazifumana ndisengumntwana yaye ndisaqhubeka ndisilwa nokuxinezeleka. Kwelinye icala, ndiyakuvuyela ukuba nolwalamano oluhle noThixo, abahlobo abanyanisekileyo nentsapho yam esingamaNgqina sonke. Inkosikazi nabantwana bayandixhasa ngokusuk’ entliziyweni kumlo wam wotywala. Inkosikazi ithi: “Ngaphambili ubomi bam babukade bunzima. Namhlanje ndiyambulela kakhulu uYehova ngenxa yokuba ndiyakuvuyela ukuba kunye nomyeni nabantwana bam ababini.”—Linikelwe.

[Amagama acatshulweyo akwiphepha 21]

Xa ndandineminyaka eli-14 ubudala, ndandilinxila

[Amagama acatshulweyo akwiphepha 22]

UYehova wenza izinto ezingenakwenziwa ngabantu

[Ibhokisi/Imifanekiso ekwiphepha 22]

IBHAYIBHILE NOTYWALA

◼ IBhayibhile ayikugatyi ukusela utywala. Ithi ‘iwayini eyenza intliziyo yomntu ofayo ibe nemihlali’ sisipho uThixo asiphe abantu. (INdumiso 104:14, 15) Kwakhona iBhayibhile ibhekisela kwisidiliya njengomqondiso wempumelelo nonqabiseko. (Mika 4:4) Enyanisweni, ummangaliso wokuqala uYesu Kristu awawenzayo kukujika amanzi abe yiwayini. (Yohane 2:7-9) Xa umpostile uPawulos weva ukuba uTimoti ‘ukhathazwa yimpilo’ wamcebisa ukuba asebenzise “iwayini encinane.”—1 Timoti 5:23.

◼ IBhayibhile iyakugatya ukusetyenziswa kotywala ngendlela engafanelekanga:

‘Amanxila . . . akayi kubudla ilifa ubukumkani bukaThixo.’—1 Korinte 6:9-11

“Musani ukunxila yiwayini, ekukho kuko uburheletyo, kodwa hlalani nizaliswa ngumoya.”—Efese 5:18.

“Ngubani na othi yeha? Ngubani na onokungakhululeki? Ngubani na onosukuzwano? Ngubani na oxhalabileyo? Ngubani na onamanxeba ngaphandle kwesizathu? Ngubani na onorhatyazo emehlweni? Ngabo bahlala ixesha elide ewayinini, abo bafika befuna iwayini ephithikeziweyo. Musa ukuyikhangela iwayini xa ivelisa umbala obomvu, xa ibengezela endebeni, xa isihla ngokulula. Ukuphela kwayo iluma njengenyoka, yaye ikhupha ityhefu njengerhamba. Amehlo akho aya kubona izinto ezingaqhelekanga, yaye intliziyo yakho iya kuthetha izinto ezigwenxa.”—IMizekeliso 23:29-33.

Njengokuba kubonisiwe kwinqaku lale bhokisi, abanye abantu abebenengxaki yotywala ngobulumko baye bakhetha ukungabuphathi kwaukubuphatha utywala.—Mateyu 5:29.